ಪ್ರತಿ ನಾಲ್ಕು ಭಾರತೀಯರ ಪೈಕಿ ಮೂವರಿಗೆ ಮೊಬೈಲ್ ಸಂಪರ್ಕ ಕಡಿದುಕೊಳ್ಳುವ ಭೀತಿ: ವರದಿ

ಹೊಸ ದಿಲ್ಲಿ: ಪ್ರತಿ ನಾಲ್ಕು ಭಾರತೀಯರ ಪೈಕಿ ಮೂವರು ಭಾರತೀಯರು ತಮ್ಮ ಸ್ಮಾರ್ಟ್‌ಫೋನ್ ಚಾರ್ಜಿಂಗ್ ಇಲ್ಲವಾಗುವುದು ಅಥವಾ ಇನ್ನಿತರೆ ಕಾರಣಗಳಿಂದ ಮೊಬೈಲ್ ಸಂಪರ್ಕ ಕಡಿದುಕೊಳ್ಳುವ ಭೀತಿ (NoMoPhobia) ಎದುರಿಸುತ್ತಿದ್ದಾರೆ ಎಂದು ಶುಕ್ರವಾರ ಮೊಬೈಲ್ ಫೋನ್ ಉತ್ಪಾದಕ ಕಂಪನಿ ಓಪ್ಪೊ ಹಾಗೂ ಮಾರುಕಟ್ಟೆ ಸಂಶೋಧನಾ ಸಂಸ್ಥೆ ಕೌಂಟರ್ ಪಾಯಿಂಟ್ ಜಂಟಿಯಾಗಿ ನಡೆಸಿರುವ ಅಧ್ಯಯನದಲ್ಲಿ ಬಹಿರಂಗಗೊಂಡಿದೆ ಎಂದು gadget360.com ವರದಿ ಮಾಡಿದೆ.

ಈ ವರದಿಯ ಪ್ರಕಾರ, ತಮ್ಮ ಸ್ಮಾರ್ಟ್ ಫೋನ್‌ಗಳಲ್ಲಿ ಚಾರ್ಜಿಂಗ್ ಇಲ್ಲವಾದಾಗ ಶೇ. 65ರಷ್ಟು ಸ್ಮಾರ್ಟ್‌ಫೋನ್ ಬಳಕೆದಾರರು ಭಾವನಾತ್ಮಕ ಅಸೌಖ್ಯಗಳಾದ ಚಿಂತೆ ಅಥವಾ ಗಾಬರಿ, ಸಂಪರ್ಕ ಕಡಿದುಕೊಂಡ ಅನುಭವ, ಅಸಹಾಯಕತೆ, ಭಯ ಅಥವಾ ಕಳೆದು ಹೋಗುವ ಭೀತಿ, ಹೆದರಿಕೆ, ಅಸುರಕ್ಷಿತದಂತಹ ಭಾವನೆಗಳನ್ನು ಅನುಭವಿಸುತ್ತಾರೆ ಎಂಬ ಸಂಗತಿ ಸಮೀಕ್ಷೆಯಲ್ಲಿ ವ್ಯಕ್ತವಾಗಿದೆ ಎಂದು ಹೇಳಲಾಗಿದೆ.

ಈ ಭೀತಿಯನ್ನು ಸಂಕ್ಷಿಪ್ತವಾಗಿ NoMoPhobia (No Mobile Phobia) ಎಂದು ಕರೆಯಲಾಗುತ್ತಿದ್ದು, ಕೆಲಸ ನಿರ್ವಹಿಸದ ಮೊಬೈಲ್ ಫೋನ್‌ನಿಂದ ಉಂಟಾಗುವ ಹೆದರಿಕೆ ಅಥವಾ ಗಾಬರಿಗೆ ಹೀಗೆಂದು ಕರೆಯುತ್ತಾರೆ.

ಆಧುನಿಕ ಸ್ಮಾರ್ಟ್‌ಫೋನ್ ಬಳಕೆದಾರರ ಬ್ಯಾಟರಿ ಸಾಮರ್ಥ್ಯದ ಕುರಿತ ಗಾಬರಿಯನ್ನು ಅಧ್ಯಯನ ಮಾಡಲು ಓಪ್ಪೊ ಇಂಡಿಯಾ ಕೌಂಟರ್ ಪಾಯಿಂಟ್ ಸಹಯೋಗದೊಂದಿಗೆ ಸಮೀಕ್ಷೆ ನಡೆಸಿತ್ತು. ಈ ಸಮೀಕ್ಷೆಯಲ್ಲಿ ಮೊದಲ ಶ್ರೇಣಿ ಹಾಗೂ ಎರಡನೇ ಶ್ರೇಣಿ ನಗರಗಳ ಒಟ್ಟು 1,500 ಮಂದಿ ಬಳಕೆದಾರರು ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದರು.

ಶೇ. 74ರಷ್ಟು ಮಹಿಳೆಯರಿಗೆ ಹೋಲಿಸಿದರೆ ಶೇ. 82ರಷ್ಟು ಪುರುಷರು ಹೆಚ್ಚು ಗಾಬರಿ ಅನುಭವಿಸುತ್ತಾರೆ ಎಂಬ ಸಂಗತಿ ಅಧ್ಯಯನ ವರದಿಯಲ್ಲಿ ವ್ಯಕ್ತವಾಗಿದೆ.

ಶೇ. 92.5 ಮಂದಿ ಬಳಕೆದಾರರು ಪವರ್ ಸೇವ್ ಮೋಡ್‌ನಲ್ಲಿ ತಮ್ಮ ಸ್ಮಾರ್ಟ್ ಫೋನ್ ಬಳಸಿದರೆ, ಶೇ. 87 ಮಂದಿ ತಮ್ಮ ಸ್ಮಾರ್ಟ್ ಫೋನ್ ಚಾರ್ಜ್ ಆಗುವಾಗಲೇ ಬಳಸುತ್ತಾರೆ ಎಂಬ ಸಂಗತಿಯೂ ಅಧ್ಯಯನ ವರದಿಯಲ್ಲಿ ಬಹಿರಂಗಗೊಂಡಿದೆ.