ಭವಿಷ್ಯದಲ್ಲಿ ಅರಬ್ ರೈಲುಗಳ ಮೂಲಕ ಭಾರತೀಯ ಸರಕುಗಳು ಇಸ್ರೇಲ್ ನ ಹೈಫಾ ಬಂದರಿಗೆ ಬರಲಿವೆ: ಕೊಹೆನ್ ಆಶಯ
ಭಾರತ-ಇಸ್ರೇಲ್-ಅರಬ್ ರಾಷ್ಟ್ರಗಳ ಮೈತ್ರಿ ವೃದ್ಧಿಗೆ ಕರೆ
ಹೊಸದಿಲ್ಲಿ,ಮೇ 9: ಭವಿಷ್ಯದಲ್ಲಿ ಅರಬ್ ರೈಲು ಜಾಲಗಳು ಭಾರತೀಯ ಸರಕುಗಳನ್ನು ಇಸ್ರೇಲಿನ ಹೈಫಾ ಬಂದರಿಗೆ ಹೊತ್ತು ತರಲಿವೆಯೆಂದು ಇಸ್ರೇಲಿ ವಿದೇಶಾಂಗ ಸಚಿವ ಎಲಿ ಕೊಹೆನ್ ಮಂಗಳವಾರ ಹೇಳಿದ್ದಾರೆ. ಆ ಮೂಲಕ ಸೌದಿ ಆರೇಬಿಯ, ಯುಎಇ ಸೇರಿದಂತೆ ಗಲ್ಫ್ ಅರಬ್ ರಾಷ್ಟ್ರಗಳ ಜೊತೆ ಇಸ್ರೇಲ್ ನ ಮೈತ್ರಿಯನ್ನು ಬಲಪಡಿಸುವ ಆಶಯ ವ್ಯಕ್ತಪಡಿಸಿದ್ದಾರೆ.
ಹೊಸದಿಲ್ಲಿಯಲ್ಲಿ ಭಾರತೀಯ ಕೈಗಾರಿಕಾ ಒಕ್ಕೂಟ ಆಯೋಜಿಸಿದ್ದ ಭಾರತ-ಇಸ್ರೇಲ್ ಔದ್ಯಮಿಕ ವೇದಿಕೆಯನ್ನುದ್ದೇಶಿಸಿ ಮಾತನಾಡಿದ ಅವರು, ಇಸ್ರೇಲ್ನಲ್ಲಿ ಭಾರತೀಯ ಉದ್ಯೋಗಿಗಳ ಸಂಖ್ಯೆಯನ್ನು ಹೆಚ್ಚಿಸುವುದನ್ನು ತನ್ನ ಸರಕಾರ ಬೆಂಬಲಿಸುವುದಾಗಿ ತಿಳಿಸಿದರು. ಹೊಸದಿಲ್ಲಿ ಮತ್ತು ಟೆಲ್ಅವೀವ್ ನಡುವೆ ತ್ವರಿತವಾಗಿ ಮುಕ್ತ ವ್ಯಾಪಾರ ಒಪ್ಪಂದ ಏರ್ಪಡಬೇಕೆಂದು ಅವರು ಆಗ್ರಹಿಸಿದರು.
ಪಶ್ಚಿಮ ಏಶ್ಯದ ಪ್ರದೇಶದಲ್ಲಿ ನೂತನ ಪ್ರಾಂತೀಯ ಸಂಪರ್ಕ ಹಾಗೂ ವ್ಯಾಪಾರ ವ್ಯವಸ್ಥೆ ರೂಪುಗೊಳ್ಳುತ್ತಿರುವುದನ್ನು ಪ್ರಸ್ತಾವಿಸಿದ ಅವರು‘‘ ಇಸ್ರೇಲ್, ಗಲ್ಫ್ ಆರಬ್ ರಾಷ್ಟ್ರಗಳು ಹಾಗೂ ಭಾರತವು ಪಶ್ಚಿಮಕ್ಕೆ ಪೂರ್ವದ ದ್ವಾರವನ್ನು ಸೃಷ್ಟಿಸಬೇಕಾಗಿದೆ. ಭಾರತದಿಂದ ಬರುವ ಸರಕುಗಳು, ಅರಬ್ ಬಂದರಿನಲ್ಲಿ ಇಳಿಯಬೇಕು ಮತ್ತು ಅಲ್ಲಿಂದ ಹೈಫಾ ಬಂದರಿಗೆ ರವಾನೆಯಾಗಬೇಕು’’ ಎಂದು ಕೊಹೆನ್ ಆಶಯವನ್ನು ವ್ಯಕ್ತಪಡಿಸಿದರು.ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರು ಭಾರತಕ್ಕೆ ಭೇಟಿ ನೀಡುವ ಸಾಧ್ಯತೆಯಿರುವ ಹಿನ್ನೆಲೆಯಲ್ಲಿ ಕೊಹೆನ್ ಅವರು ಹೊಸದಿಲ್ಲಿ ಪ್ರವಾಸವು ಹೆಚ್ಚಿನ ಮಹತ್ವ ಪಡೆದುಕೊಂಡಿದೆ.
ಭಾರತ ಭೇಟಿ ಮೊಟಕುಗೊಳಿಸಿ ಸ್ವದೇಶಕ್ಕೆ ಕೊಹೆನ್ ವಾಪಸ್
ಗಾಝಾಪಟ್ಟಿಯಲ್ಲಿ ಫೆಲೆಸ್ತೀನ್ ಹೋರಾಟಗಾರರ ವಿರುದ್ಧ ನಡೆಯುತ್ತಿರುವ ಕಾರ್ಯಾಚರಣೆಗೆ ಸಂಬಂಧಿಸಿ ತಾಜಾ ಭದ್ರತಾ ಮಾಹಿತಿ ಬಂದಿರುವ ಹಿನ್ನೆಲೆಯಲ್ಲಿ ತನ್ನ ಭಾರತ ಭೇಟಿಯನ್ನು ಮೊಟಕುಗೊಳಿಸಿ ಸ್ವದೇಶಕ್ಕೆ ವಾಪಾಸಾಗುವುದಾಗಿ ಇಸ್ರೇಲ್ ವಿದೇಶಾಂಗ ಸಚಿವ ಎಲಿ ಕೊಹೆನ್ ಅವರು ಮಂಗಳವಾರ ತಿಳಿಸಿದ್ದಾರೆ.
ಎಲಿ ಕೊಹೆನ್ ಅವರು ಮೂರು ದಿನಗಳ ಭಾರತ ಪ್ರವಾಸಕ್ಕಾಗಿ ಮಂಗಳವಾರ ಹೊಸದಿಲ್ಲಿಗೆ ಆಗಮಿಸಿದ್ದರು. ಅವರು ಮುಂಬೈಗೂ ಭೇಟಿ ನೀಡುವವರಿದ್ದರು. ಕೊಹೆನ್ ಅವರು ಮಂಗಳವಾರ ವಿದೇಶಾಂಗ ಸಚಿವ ಎಸ್.ಜಯಶಂಕರ್ ಜೊತೆಗೂ ವಿಸ್ತೃತ ಮಾತುಕತೆ ನಡೆಸಿದರು.