ಜಲಂಧರ್ ಲೋಕಸಭಾ ಕ್ಷೇತ್ರ, ಉ.ಪ್ರ. ಒಡಿಶಾ, ಮೇಘಾಲಯದ ವಿಧಾನಸಭೆ ಕ್ಷೇತ್ರದಲ್ಲಿ ಇಂದು ಉಪ ಚುನಾವಣೆ

ಚಂಡಿಗಡ: ಪಂಜಾಬ್‌ನ ಒಂದು ಲೋಕಸಭಾ ಸ್ಥಾನ ಹಾಗೂ ಉತ್ತರಪ್ರದೇಶ, ಒಡಿಶಾ ಹಾಗೂ ಮೇಘಾಲಯದ ನಾಲ್ಕು ವಿಧಾನಸಭಾ ಕ್ಷೇತ್ರಗಳಿಗೆ ಉಪಚುನಾವಣೆ ಬುಧವಾರ ಆರಂಭವಾಗಿದೆ.

ಜಲಂಧರ್ ಲೋಕಸಭಾ ಕ್ಷೇತ್ರ, ಉತ್ತರ ಪ್ರದೇಶದ ಸ್ವರ್ ಮತ್ತು ಛನ್‌ಬೇ ವಿಧಾನಸಭಾ ಕ್ಷೇತ್ರಗಳು, ಒಡಿಶಾದ ಜರ್ಸುಗುಡಾ ಮತ್ತು ಮೇಘಾಲಯದ ಸೊಹಿಯಾಂಗ್‌ಗೆ ಇಂದು ಮತದಾನ ನಡೆಯುತ್ತಿದೆ. ಮೇ 13 ರಂದು ಮತ ಎಣಿಕೆ ನಡೆಯಲಿದೆ.

ಕಾಂಗ್ರೆಸ್ ಸಂಸದ ಸಂತೋಖ್ ಸಿಂಗ್ ಚೌಧರಿ ಅವರ ನಿಧನದ ನಂತರ ಜಲಂಧರ್ ಲೋಕಸಭೆ (ಮೀಸಲು) ಸ್ಥಾನ ತೆರವಾಗಿತ್ತು. ಈ ವರ್ಷದ ಜನವರಿಯಲ್ಲಿ ಜಲಂಧರ್‌ನ ಫಿಲ್ಲೌರ್‌ನಲ್ಲಿ ಪಕ್ಷದ ಭಾರತ್ ಜೋಡೋ ಯಾತ್ರೆಯ ಸಂದರ್ಭದಲ್ಲಿ ಚೌಧರಿ ಅವರು ಹೃದಯ ಸ್ತಂಭನಕ್ಕೆ ಒಳಗಾಗಿದ್ದರು.

ಫೆಬ್ರವರಿಯಲ್ಲಿ ಅಪ್ನಾ ದಳ (ಸೋನೆಲಾಲ್) ಶಾಸಕ ರಾಹುಲ್ ಪ್ರಕಾಶ್ ಕೋಲ್ ಅವರ ನಿಧನದ ನಂತರ ಮಿರ್ಜಾಪುರದ ಛನ್‌ಬೇ ಸ್ಥಾನ ತೆರವಾಗಿತ್ತು.

ಮೊರಾದಾಬಾದ್ ನ್ಯಾಯಾಲಯವು 15 ವರ್ಷಗಳ ಹಿಂದಿನ ಪ್ರಕರಣದಲ್ಲಿ ಅಬ್ದುಲ್ಲಾ ಅಝಂ ಖಾನ್‌ಗೆ ಎರಡು ವರ್ಷಗಳ ಜೈಲು ಶಿಕ್ಷೆ ವಿಧಿಸಿದ ನಂತರ ಫೆಬ್ರವರಿ 13 ರಂದು ಸ್ವರ್ ಅಸೆಂಬ್ಲಿ ಸ್ಥಾನವನ್ನು ಖಾಲಿ ಎಂದು ಘೋಷಿಸಲಾಯಿತು.

ಜನವರಿ 29 ರಂದು ಹಾಲಿ ಶಾಸಕ ಮತ್ತು ಆಗಿನ ಆರೋಗ್ಯ ಸಚಿವ ನಬಾ ಕಿಶೋರ್ ದಾಸ್ ಹತ್ಯೆಯ ನಂತರ ಒಡಿಶಾದ ಝಾರ್ಸುಗುಡಾ ವಿಧಾನಸಭಾ ಕ್ಷೇತ್ರಕ್ಕೆ ಉಪಚುನಾವಣೆ ಅನಿವಾರ್ಯವಾಗಿತ್ತು.