ಭಟ್ಕಳ: 32 ಸಾವಿರಕ್ಕೂ ಅಧಿಕ ಮತಗಳಿಂದ ಕಾಂಗ್ರೆಸ್‌ನ ಮಾಂಕಾಳ್ ವೈದ್ಯ ಗೆಲುವು

ಭಟ್ಕಳ: ಭಟ್ಕಳ ಹೊನ್ನಾವರ ವಿಧಾನಸಭಾ ಕ್ಷೇತ್ರದ ಚುನಾವಣಾ ಫಲಿತಾಂಶವನ್ನು ಅಧಿಕೃತವಾಗಿ ಘೋಷಿಸಲಾಗಿದ್ದು ಕಾಂಗ್ರೆಸ್ ಅಭ್ಯರ್ಥಿ ಮಾಂಕಾಳ್ ಎಸ್. ವೈದ್ಯ 100442 ಮತಗಳನ್ನು ಪಡೆಯುವುದರ ಮೂಲಕ 32671 ಮತಗಳ ಅಂತರದಿಂದ ಬಿಜೆಪಿಯ ಸುನಿಲ್ ನಾಯ್ಕರನ್ನು ಪರಾಭವಗೊಳಿಸಿದ್ದಾರೆ. 

ಬಿಜೆಪಿಯ ಹಾಲಿ ಶಾಸಕ ಸುನಿಲ್ ನಾಯ್ಕರು 67771 ಮತಗಳನ್ನು ಪಡೆದು 2ನೇ ಸ್ಥಾನಕ್ಕೆ ತೃಪ್ತಿಪಟ್ಟು ಕೊಂಡಿದ್ದಾರೆ. ಆಪ್ ಪಕ್ಷದ ಡಾ.ನಸೀಮ್ ಖಾನ್ 1007, ಜೆ.ಡಿ.ಎಸ್ ನ ನಾಗೇಂದ್ರ ನಾಯ್ಕ 1502, ಇತರ ಅಭ್ಯರ್ಥಿಗಳಾದ ಪ್ರಕಾಶ್ ಪಿಂಟೋ 627, ಯೋಗೇಶ್ ನಾಯ್ಕ 646, ಗುಣವಂತೆ ಶಂಕರ್ ಗೌಡ 558, ಗಫೂರ್ ಸಾಬ್ 662, ಮುಹಮ್ಮದ್ ಜಬರೂದ್ 410 ಮತಗಳನ್ನು ಪಡೆದಿದ್ದಾರೆ. ವಿಶೇಷ ಎಂದರೆ ಈ ಕ್ಷೇತ್ರ ದಲ್ಲಿ ಇತರ ಅಭ್ಯರ್ಥಿಗಳಿಗಿಂತ ‘ನೋಟಾ’ ಕ್ಕೆ 1223 ಮತಗಳು ಬಿದ್ದಿವೆ. ಅಂದರೆ 1223 ಜನರು ಈ ಮೇಲಿನ ಯಾವ ಅಭ್ಯರ್ಥಿಯನ್ನೂ ಬೆಂಬಲಿಸಿಲ್ಲ.

ಭಟ್ಕಳದಲ್ಲಿ ವಿಜಯೋತ್ಸವ : ಮಾಂಕಾಳ ವೈದ್ಯರ ಗೆಲುವು ಘೋಷಣೆಯಾಗುತ್ತಿದ್ದಂತೆ ಭಟ್ಕಳದ ಶಮ್ಸುದ್ದೀನ್ ವೃತ್ತದಲ್ಲಿ ಜನರು ಪಟಾಕಿ ಸಿಡಿಸಿ ಸಿಹಿ ಹಂಚುವುದರ ಮೂಲಕ ವಿಜಯೋತ್ಸವ ಆಚರಿಸಿದರು. ಹೊನ್ನಾವರದಿಂದ ಭಟ್ಕಳದ ವರೆಗೆ ಮೆರವಣೆಗೆ ನಡೆಸಿದ ಮಾಂಕಾಳ್ ಅಭಿಮಾನಿಗಳು ಭಟ್ಕಳದ ಶಮ್ಸುದ್ದೀನ್ ವೃತ್ತದ ಮೂಲಕ ಬೃಹತ್ ಮೆರವಣೆಗೆ ನಡೆಸಿದರು.