ಪ್ರೇಕ್ಷಕರ ಕೊರತೆಯಿಂದಾಗಿ ‘ದಿ ಕೇರಳ ಸ್ಟೋರಿ’ ಪ್ರದರ್ಶನ ಕಾಣುತ್ತಿಲ್ಲ: ಸುಪ್ರೀಂ ಕೋರ್ಟ್ ಗೆ ತಮಿಳುನಾಡು ಮಾಹಿತಿ

ಹೊಸದಿಲ್ಲಿ: ಥಿಯೇಟರ್ಗಳ ಮಾಲಕರು ಪ್ರೇಕ್ಷಕರ ಕೊರತೆ ಸೇರಿದಂತೆ ವಿವಿಧ ಕಾರಣಗಳಿಂದಾಗಿ ‘ದಿ ಕೇರಳ ಸ್ಟೋರಿ’ ಚಿತ್ರ ಬಿಡುಗಡೆಗೊಂಡ ಎರಡೇ ದಿನಗಳಲ್ಲಿ ಅದರ ಪ್ರದರ್ಶನವನ್ನು ನಿಲ್ಲಿಸಲು ನಿರ್ಧರಿಸಿದ್ದರಿಂದ ತಾನು ಈ ವಿಷಯದಲ್ಲಿ ಅಸಹಾಯಕನಾಗಿದ್ದೇನೆ ಎಂದು ತಮಿಳುನಾಡು ಸರಕಾರವು ಸರ್ವೋಚ್ಚ ನ್ಯಾಯಾಲಯಕ್ಕೆ ತಿಳಿಸಿದೆ.

ವಾಸ್ತವದಲ್ಲಿ ‘ದಿ ಕೇರಳ ಸ್ಟೋರಿ’ ಹಿಂದಿ ಚಿತ್ರವು ಮೇ 5ರಂದು ರಾಜ್ಯದ 19 ಮಲ್ಟಿಪ್ಲೆಕ್ಸ್ ಗಳಲ್ಲಿ ಬಿಡುಗಡೆಗೊಂಡಿತ್ತು. ಆದರೆ ಚಿತ್ರದ ವಿರುದ್ಧದ ಟೀಕೆ, ಖ್ಯಾತ ನಟರ ಕೊರತೆ, ಕಳಪೆ ಪ್ರದರ್ಶನ ಮತ್ತು ಪ್ರೇಕ್ಷಕರ ಕಳಪೆ ಪ್ರತಿಕ್ರಿಯೆಗಳನ್ನು ಪರಿಗಣಿಸಿ ಮಲ್ಟಿಪ್ಲೆಕ್ಸ್ ಮಾಲಕರು ಮೇ 7ರಿಂದ ಚಿತ್ರದ ಪ್ರದರ್ಶನವನ್ನು ನಿಲ್ಲಿಸಲು ಸ್ವಪ್ರೇರಣೆಯಿಂದ ನಿರ್ಧರಿಸಿದ್ದು,ಅವರ ನಿರ್ಧಾರದ ಮೇಲೆ ತಾನು ಯಾವುದೇ ನಿಯಂತ್ರಣವನ್ನು ಹೊಂದಿಲ್ಲ ಎಂದು ತಮಿಳುನಾಡು ಸರಕಾರವು ಹೇಳಿದೆ.

ಮೇ ತಿಂಗಳ ಆರಂಭದಲ್ಲಿ ನಡೆದಿದ್ದ ವಿಚಾರಣೆ ಸಂದರ್ಭದಲ್ಲಿ ಸರ್ವೋಚ್ಚ ನ್ಯಾಯಾಲಯವು, ಚಲನಚಿತ್ರವು ವೀಕ್ಷಣೆಗೆ ಯೋಗ್ಯವಾಗಿದೆಯೇ ಇಲ್ಲವೇ ಎನ್ನುವುದನ್ನು ಅಂತಿಮವಾಗಿ ಜನರೇ ನಿರ್ಧರಿಸುತ್ತಾರೆ ಎಂದು ಹೇಳಿತ್ತು. ನಿರ್ಮಾಪಕರು ಚಿತ್ರದ ನಿರ್ಮಾಣಕ್ಕಾಗಿ ಸುರಿದಿರುವ ಹಣ ಮತ್ತು ನಟರ ಪರಿಶ್ರಮವನ್ನು ನ್ಯಾಯಾಲಯವು ಪ್ರಸ್ತಾಪಿಸಿತ್ತು. ಚಿತ್ರವು ಇಡೀ ಮುಸ್ಲಿಮ್ ಸಮುದಾಯವನ್ನು, ನಿರ್ದಿಷ್ಟವಾಗಿ ‘ಲವ್ ಜಿಹಾದ್’ ಮೂಲಕ ಕೇರಳದಲ್ಲಿ ಯುವತಿಯರಿಗೆ ಆಮಿಷವೊಡ್ಡಲಾಗುತ್ತಿದೆ ಮತ್ತು ಐಸಿಸ್ಗೆ ಸೇರಿಸಲು ಅವರನ್ನು ಪಶ್ಚಿಮ ಏಶ್ಯಾಕ್ಕೆ ಸಾಗಿಸಲಾಗುತ್ತಿದೆ ಎಂಬ ದುರುದ್ದೇಶಪೂರಿತ ಅಪಪ್ರಚಾರದೊಂದಿಗೆ ಮುಸ್ಲಿಮ್ ಯುವಕರನ್ನು ರಾಕ್ಷಸರನ್ನಾಗಿ ಬಿಂಬಿಸಿದೆ ಎಂದು ಆ ಸಂದರ್ಭ ಹಲವಾರು ಅರ್ಜಿದಾರರು ಸರ್ವೋಚ್ಚ ನ್ಯಾಯಾಲಯದಲ್ಲಿ ವಾದಿಸಿದ್ದರು.

ಸರಕಾರವು ಚಿತ್ರವನ್ನು ಅನಧಿಕೃತವಾಗಿ ನಿಷೇಧಿಸಿದೆ ಎಂಬ ಅರ್ಜಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸುವ ಸೋಗಿನಲ್ಲಿ ಚಿತ್ರಕ್ಕೆ ಪ್ರಚಾರವನ್ನು ಪಡೆದುಕೊಳ್ಳಲು ನಿರ್ಮಾಪಕರು ಪ್ರಯತ್ನಿಸುತ್ತಿದ್ದಾರೆ ಎಂದು ತಮಿಳುನಾಡು ಹೇಳಿದೆ.

ನಿರ್ಮಾಪಕರು ಸರ್ವೋಚ್ಚ ನ್ಯಾಯಾಲಯದ ಪ್ರಕ್ರಿಯೆಯನ್ನು ದುರುಪಯೋಗಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ ಎಂದು ಸರಕಾರವು ಆರೋಪಿಸಿದೆ. ತಮಿಳುನಾಡು ಸರಕಾರವು ಚಿತ್ರದ ಸಾರ್ವಜನಿಕ ಪ್ರದರ್ಶನವನ್ನು ತಡೆದಿದೆ ಎಂಬ ಉದ್ದೇಶಪೂರ್ವಕ ಸುಳ್ಳು ಹೇಳಿಕೆಯನ್ನು ಅವರು ನೀಡಿದ್ದಾರೆ ಎಂದು ಅದು ತಿಳಿಸಿದೆ. ತಮಿಳುನಾಡು ಸರಕಾರವು ಚಿತ್ರವನ್ನು ನಿಷೇಧಿಸಿದೆ ಎಂಬ ತಮ್ಮ ಆರೋಪವನ್ನು ಸಮರ್ಥಿಸಿಕೊಳ್ಳಲು ನಿರ್ಮಾಪಕರು ಒಂದೇ ಒಂದು ಪುರಾವೆಯನ್ನು ಒದಗಿಸಿಲ್ಲ ಎಂದು ಎಡಿಜಿಪಿ (ಕಾನೂನು ಮತ್ತು ಸುವ್ಯವಸ್ಥೆ ) ಮೂಲಕ ಸಲ್ಲಿಸಿರುವ ಅಫಿಡವಿಟ್ ನಲ್ಲಿ ಸರಕಾರವು ತಿಳಿಸಿದೆ,

ಇನ್ನೊಂದೆಡೆ,ಚಿತ್ರ ನಿರ್ಮಾಪಕರ ವಾಕ್ ಮತ್ತು ಅಭಿವ್ಯಕ್ತಿ ಸ್ವಾತಂತ್ರ್ಯವನ್ನು ರಕ್ಷಿಸಲು ಸರಕಾರವು ಎಲ್ಲ ಕ್ರಮಗಳನ್ನು ತೆಗೆದುಕೊಂಡಿದೆ. ಪೊಲೀಸರ ನಿಯೋಜನೆ ಮತ್ತು ಪ್ರತಿಭಟನಾಕಾರರ ವಿರುದ್ಧ ಎಫ್ಐಆರ್ ದಾಖಲಿಸುವಿಕೆಯಂತಹ ಸಾಕಷ್ಟು ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ಪ್ರಮಾಣೀಕೃತ ಚಲನಚಿತ್ರವನ್ನು ತಾವುದೇ ಅಡಚಣೆಯಿಲ್ಲದೆ ಪ್ರದರ್ಶಿಸಲು ಅನುಕೂಲವಾಗುವಂತೆ ರಾಜ್ಯದ ಆಡಳಿತ ಯಂತ್ರವನ್ನು ಕಟ್ಟೆಚ್ಚರದಲ್ಲಿರಿಸಲಾಗಿದೆ ಎಂದೂ ತಮಿಳುನಾಡು ಸರ್ವೋಚ್ಚ ನ್ಯಾಯಾಲಯಕ್ಕೆ ತಿಳಿಸಿದೆ.

ಚಲನಚಿತ್ರವನ್ನು ಪ್ರದರ್ಶಿಸಿದರೆ ಅದರಿಂದುಂಟಾಗುವ ಯಾವುದೇ ಅಹಿತಕರ ಘಟನೆಯ ಸಂದರ್ಭದಲ್ಲಿ ತಾನು ಬೆಂಬಲಿಸುವುದಿಲ್ಲ ಎಂದು ಸರಕಾರವು ಥಿಯೇಟರ್ಗಳ ಮಾಲಿಕರಿಗೆ ಅನೌಪಚಾರಿಕ ಸೂಚನೆಯನ್ನು ನೀಡಿತ್ತು ಎಂಬ ನಿರ್ಮಾಪಕರ ಆರೋಪವು ಆಧಾರರಹಿತವಾಗಿದೆ ಎಂದು ರಾಜ್ಯವು ಅಫಿಡವಿಟ್ ನಲ್ಲಿ ಹೇಳಿದೆ.