ಮಂಗಳೂರು: ಫ್ಲ್ಯಾಟ್ ಖರೀದಿಸುವುದಾಗಿ ಹೇಳಿ ವಂಚನೆ

ಮಂಗಳೂರು, ಮೇ 16: ತನ್ನನ್ನು ಸೈನಿಕನೆಂದು ನಂಬಿಸಿ ಬಾಡಿಗೆಗೆ ಫ್ಲ್ಯಾಟ್ ಪಡೆಯುವುದಾಗಿ ಹೇಳಿ ವಂಚಿಸಿ ರುವ ಬಗ್ಗೆ ವ್ಯಕ್ತಿಯೊಬ್ಬರು ಮಂಗಳೂರಿನ ಸೆನ್ ಠಾಣೆಗೆ ದೂರು ನೀಡಿದ್ದಾರೆ.

‘ಬೆಂಗಳೂರಿನಲ್ಲಿ ಬಾಡಿಗೆಗೆ ಫ್ಲ್ಯಾಟ್ ಇದೆ’ ಎಂದು ತಾನು ವೆಬ್‌ಸೈಟ್‌ನಲ್ಲಿ ಜಾಹೀರಾತು ನೀಡಿದ್ದೆ. ಅದನ್ನು ಗಮನಿಸಿದ ವ್ಯಕ್ತಿಯೋರ್ವ ತನ್ನನ್ನು ಸೈನಿಕ ದೀಪಕ್ ಪವಾರ್ ಎಂಬುದಾಗಿ ಪರಿಚಯಿಸಿಕೊಂಡು, ಬೆಂಗಳೂರಿಗೆ ವರ್ಗಾವಣೆಯಾಗಿರುವುದಾಗಿ ತಿಳಿಸಿ ಫ್ಲ್ಯಾಟ್ ಖರೀದಿಸಲು ಆಸಕ್ತಿ ಇದೆ ಎಂದ.  ಮೇ 15ರಂದು ಸಂಜೆ ಮುಂಗಡವಾಗಿ 50,000 ರೂ. ಪಾವತಿಸುವುದಾಗಿ ತಿಳಿಸಿದ. ಅಲ್ಲದೆ ಈ ಬಗ್ಗೆ ಶಿಬಿರದ ಮೇಲಾಧಿಕಾರಿಗಳು ಕರೆ ಮಾಡುತ್ತಾರೆ ಎಂದೂ ತಿಳಿಸಿದ. ಬಳಿಕ ತನಗೆ ಅಧಿಕಾರಿಯೆಂದು ಪರಿಚಯಿಸಿಕೊಂಡ ವ್ಯಕ್ತಿಯೋರ್ವ ಕರೆ ಮಾಡಿ ದೂರುದಾರರ ಬ್ಯಾಂಕ್ ಖಾತೆಗೆ ಸಂಪರ್ಕಗೊಂಡಿರುವ ಗೂಗಲ್ ಪೇ ಅಪ್ಲಿಕೇಷನ್ ತೆರೆಯಲು ಹೇಳಿದ. ಅದನ್ನು ನಂಬಿದ ತಾನು ಹಣ ಸ್ವೀಕರಿಸುವ ಉದ್ದೇಶದಿಂದ ಅಪರಿಚಿತ ವ್ಯಕ್ತಿ ಸೂಚಿಸಿದಂತೆಯೇ ಮಾಡಿದೆ. ಅಪರಿಚಿತ ವ್ಯಕ್ತಿಯು ತನ್ನ ಖಾತೆಗೆ ಹಣ ಸಂದಾಯ ಮಾಡಿದಂತೆ ತೋರಿಸಿ ವಹಿವಾಟು ವಿಫಲವಾಗಿದೆ ಎಂದ. ಹೀಗೆ ಎರಡು ಬಾರಿ ಮಾಡಿದ. ಈ ವೇಳೆ ತನ್ನ ಖಾತೆಯಿಂದಲೇ ಆತ 50,000 ರೂ. ಮತ್ತು 49,000 ರೂ.ಗಳನ್ನು ವರ್ಗಾಯಿಸಿಕೊಂಡು ವಂಚಿಸಿದ್ದಾನೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.