3 ತಿಂಗಳಲ್ಲಿ ದೈಹಿಕ ಕ್ಷಮತೆ ಪಡೆಯಿರಿ, ಇಲ್ಲದಿದ್ದರೆ ನಿವೃತ್ತರಾಗಿ: ಅಸ್ಸಾಮ್ ಪೊಲೀಸರಿಗೆ ಡಿಜಿಪಿ ಎಚ್ಚರಿಕೆ

ಗುವಾಹಟಿ, ಮೇ 16: ಪೊಲೀಸ್ ಪಡೆಯಲ್ಲಿರುವ ನಿಷ್ಕ್ರಿಯರನ್ನು ತೆಗೆದುಹಾಕುವುದಕ್ಕಾಗಿ, ಐಪಿಎಸ್ ಅಧಿಕಾರಿಗಳು ಸೇರಿದಂತೆ ತನ್ನೆಲ್ಲ ಸಿಬ್ಬಂದಿಯ ಎತ್ತರ-ತೂಕ ಪ್ರಮಾಣ (BMI)ವನ್ನು ವೃತ್ತಿಪರವಾಗಿ ದಾಖಲಿಸಿಡಲು ಅಸ್ಸಾಮ್ ಪೊಲೀಸ್ ಇಲಾಖೆಯು ನಿರ್ಧರಿಸಿದೆ. ದೈಹಿಕ ಕ್ಷಮತೆಯನ್ನು ಹೊಂದಲು ಪೊಲೀಸರಿಗೆ ಮೂರು ತಿಂಗಳ ಕಾಲಾವಕಾಶ ನೀಡಲಾಗುವುದು ಹಾಗೂ ಆ ಬಳಿಕ ಬಿಎಮ್‌ಐಯನ್ನು ದಾಖಲಿಸಲಾಗುವುದು.

‘‘ಐಪಿಎಸ್ ಮತ್ತು ಎಪಿಎಸ್ ಅಧಿಕಾರಿಗಳು ಸೇರಿದಂತೆ ಎಲ್ಲಾ ಅಸ್ಸಾಮ್ ಪೊಲೀಸ್ ಸಿಬ್ಬಂದಿಗೆ ದೈಹಿಕ ಕ್ಷಮತೆಯನ್ನು ಹೊಂದಲು ಮೂರು ತಿಂಗಳ, ಅಂದರೆ ಆಗಸ್ಟ್ 15ರವರೆಗೆ ಕಾಲಾವಕಾಶವನ್ನು ನೀಡಲು ನಾವು ನಿರ್ಧರಿಸಿದ್ದೇವೆ. ಬಳಿಕ, ಮುಂದಿನ 15 ದಿನಗಳಲ್ಲಿ ಬಿಎಮ್‌ಐ ದಾಖಲಾತಿಯನ್ನು ಆರಂಭಿಸಲಾಗುವುದು’’ ಎಂದು ಅಸ್ಸಾಮ್ ಪೊಲೀಸ್ ಮಹಾನಿರ್ದೇಶಕ (DGP) ಜಿ.ಪಿ. ಸಿಂಗ್ ಮಂಗಳವಾರ ಟ್ವೀಟ್ ಮಾಡಿದ್ದಾರೆ.

ಬೊಜ್ಜು ಹೊಂದಿರುವ, ಅಂದರೆ 30ಕ್ಕಿಂತಲೂ ಅಧಿಕ ಬಿಎಮ್‌ಐ ಸಂಖ್ಯೆ ಹೊಂದಿರುವ ಎಲ್ಲರಿಗೂ ತೂಕ ಕಡಿಮೆ ಮಾಡಲು ಇನ್ನೂ ಮೂರು ತಿಂಗಳ ಸಮಯಾವಕಾಶ ನೀಡಲಾಗುವುದು ಹಾಗೂ ಆ ಬಳಿಕ ಅವರಿಗೆ ಸ್ವಯಂ ನಿವೃತ್ತಿ ಯೋಜನೆ (VRS) ತೆಗೆದುಕೊಳ್ಳುವಂತೆ ಸೂಚಿಸಲಾಗುತ್ತದೆ ಎಂದು ಅವರು ಹೇಳಿದರು. ಹೈಪೊತೈರೋಯ್ಡಿಸಮ್ ಮುಂತಾದ ನೈಜ ವೈದ್ಯಕೀಯ ಕಾರಣಗಳನ್ನು ಹೊಂದಿರುವವರಿಗೆ ವಿನಾಯಿತಿ ನೀಡಲಾಗುವುದು ಎಂದು ಡಿಜಿಪಿ ಸಿಂಗ್ ಹೇಳಿದರು.

ಆಗಸ್ಟ್ 16ರಂದು ನಾನೇ ಮೊದಲಿಗನಾಗಿ ಬಿಎಮ್‌ಐಗೆ ಒಳಪಡುತ್ತೇನೆ ಎಂದು ಅವರು ತಿಳಿಸಿದರು.

ಅಸ್ಸಾಮ್ ಪೊಲೀಸ್ ಇಲಾಖೆಯಲ್ಲಿ ಸುಮಾರು 70,000 ಸಿಬ್ಬಂದಿಯಿದ್ದಾರೆ.

ಇತ್ತೀಚೆಗೆ ಪೊಲೀಸ್ ಉನ್ನತಾಧಿಕಾರಿಗಳೊಂದಿಗೆ ಆನ್‌ಲೈನ್ ಸಭೆ ನಡೆಸಿದ್ದ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮ, ಕುಡಿತದ ದಾಸರು, ಭಾರೀ ಬೊಜ್ಜು ಹೊಂದಿದವರು ಮತ್ತು ಭ್ರಷ್ಟಾಚಾರ ಆರೋಪಗಳನ್ನು ಎದುರಿಸುವವರನ್ನು ತೆಗೆದುಹಾಕಿ ಪೊಲೀಸ್ ಪಡೆಗೆ ಚೈತನ್ಯ ನೀಡಬೇಕು ಎಂದು ಕರೆ ನೀಡಿದ್ದರು.