ಅಫ್ಘಾನ್ ಮಕ್ಕಳಲ್ಲಿ ತೀವ್ರ ಅಪೌಷ್ಟಿಕತೆಯ ಸಮಸ್ಯೆ: ವರದಿ ಹೆಚ್ಚುತ್ತಿರುವ ಆಹಾರ ಅಭದ್ರತೆ

ಕಾಬೂಲ್, ಮೇ 17:  ವಿಶ್ವದ ಅತ್ಯಂತ ಘೋರ ಮಾನವೀಯ ವಿಪತ್ತಿಗೆ ಸಾಕ್ಷಿಯಾಗಿರುವ ಅಫ್ಘಾನಿಸ್ತಾನದಲ್ಲಿ ಆಹಾರ ಅಭದ್ರತೆಯ ಸಮಸ್ಯೆ ಬಿಗಡಾಯಿಸಿದ್ದು ದೇಶದ ಜನಸಂಖ್ಯೆಯ ಮೂರನೇ ಎರಡರಷ್ಟು ಜನರಿಗೆ ಆಹಾರದ ಕೊರತೆ ಎದುರಾಗಿದೆ ಎಂದು ಮಾನವ ಹಕ್ಕುಗಳ ನಿಗಾ ಸಂಸ್ಥೆಯ ಇತ್ತೀಚಿನ ವರದಿ ಹೇಳಿದೆ.

ಅಫ್ಘಾನಿಸ್ತಾನವು ಮಾಧ್ಯಮದಿಂದ ಕಣ್ಮರೆಯಾಗಿದ್ದರೂ, ವಿಶ್ವದ ಅತ್ಯಂತ ಘೋರ ಮಾನವೀಯ ವಿಪತ್ತುಗಳಲ್ಲಿ ಒಂದಾಗಿದೆ. ಎನ್‍ಜಿಒಗಳಲ್ಲಿ ಮಹಿಳೆಯರು ಕೆಲಸ ಮಾಡುವುದನ್ನು ನಿಷೇಧಿಸಿದ ಬಳಿಕ ಬಿಕ್ಕಟ್ಟು ಮತ್ತಷ್ಟು ತೀವ್ರಗೊಂಡಿದೆ. 8,75,000 ಮಕ್ಕಳು ತೀವ್ರ ಅಪೌಷ್ಟಿಕತೆಯ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಮಹಿಳೆಯರು ಮತ್ತು ಹುಡುಗಿಯರು ಹೆಚ್ಚಿನ ಅಪಾಯದಲ್ಲಿದ್ದಾರೆ ಎಂದು ಮಾನವಹಕ್ಕುಗಳ ನಿಗಾ ಸಮಿತಿಯನ್ನು ಉಲ್ಲೇಖಿಸಿ ಟೋಲೋ ನ್ಯೂಸ್ ವರದಿ ಮಾಡಿದೆ.

ಮಾನವೀಯ ನೆರವು ಒದಗಿಸುವಲ್ಲಿ ಆಗಿರುವ ಅಡ್ಡಿಯು  ಹಲವು ಅಫ್ಘನ್ನರನ್ನು ಬಡತನ ಮತ್ತು ಹಸಿವಿನ ಸಮಸ್ಯೆಗೆ ದೂಡಲಿದೆ. ಅಫ್ಘಾನ್‍ನಲ್ಲಿ ಮಾನವೀಯ ಪರಿಸ್ಥಿತಿ ಅತ್ಯಂತ ಗಂಭೀರವಾಗಿ ಉಳಿದಿದೆ ಮತ್ತು ನಮ್ಮ ಕಾರ್ಯಾಚರಣೆಗೆ ಆರ್ಥಿಕ ನಿಧಿಯ ಕೊರತೆ ಎದುರಾಗಿದೆ ಎಂದು ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಅಂಟೋನಿಯೊ ಗುಟೆರಸ್ ಅವರ ವಕ್ತಾರ ಸ್ಟೀಫನ್ ಡ್ಯುಜೆರಿಕ್ ಹೇಳಿದ್ದಾರೆ.

ದುರಂತ ಮಟ್ಟದ ಆಹಾರ ಬಿಕ್ಕಟ್ಟನ್ನು ಎದುರಿಸುತ್ತಿರುವ 7 ದೇಶಗಳಲ್ಲಿ ಅಫ್ಘಾನಿಸ್ತಾನವೂ ಒಂದಾಗಿದೆ ಎಂದು ಇದಕ್ಕೂ ಮುನ್ನ ಬಿಡುಗಡೆಗೊಂಡಿರುವ ವಿಶ್ವಬ್ಯಾಂಕ್‍ನ ವರದಿ ಹೇಳಿದೆ. ಅಫ್ಘಾನಿಸ್ತಾನ, ಬುರ್ಕಿನಾ ಫಾಸೊ, ಹೈಟಿ, ನೈಜೀರಿಯಾ, ಸೊಮಾಲಿಯಾ, ದಕ್ಷಿಣ ಸುಡಾನ್ ಮತ್ತು ಯೆಮೆನ್ ಈ 7 ದೇಶಗಳಲ್ಲಿ 2017ರ ಬಳಿಕದ ಅತ್ಯಧಿಕ ಆಹಾರ ಬಿಕ್ಕಟ್ಟು ತಲೆದೋರಿದೆ ಎಂದು ವರದಿ ಹೇಳಿದೆ. ಈ ಮಧ್ಯೆ, ದೇಶದಲ್ಲಿ ವ್ಯಾಪಕವಾದ ಮಾನವೀಯ ಬಿಕ್ಕಟ್ಟಿನ ಮಧ್ಯೆ ಹಣಕಾಸಿನ ಕೊರತೆಯಿಂದಾಗಿ ಅಫ್ಘಾನಿಸ್ತಾನದಲ್ಲಿ ನಿರ್ಣಾಯಕ ಆಹಾರ ನೆರವಿನ ಕೊರತೆ ಎದುರಾಗಿದೆ ಎಂದು ಯುನಿಸೆಫ್ ಎಚ್ಚರಿಸಿದೆ.

ಅಫ್ಘಾನಿಸ್ತಾನದಲ್ಲಿ ತೀವ್ರವಾದ ಅಪೌಷ್ಟಿಕತೆಯ ಕಾರಣದಿಂದಾಗಿ ಈ ವರ್ಷದಲ್ಲಿಯೇ  ಸಾವಿರಾರು ದುರ್ಬಲ ಮಕ್ಕಳು ಸಾಯಬಹುದು ಎಂದು ವಿಶ್ವಸಂಸ್ಥೆ ಮಕ್ಕಳ ನಿಧಿ(ಯುನಿಸೆಫ್)ಯ ಅಧಿಕಾರಿ ಮೆಲಾನಿ ಗಾಲ್ವಿನ್ ಹೇಳಿದ್ದಾರೆ. ಅಪೌಷ್ಟಿಕತೆ ನಿವಾರಿಸಲು ಮತ್ತು ದೇಶದಾದ್ಯಂತ ಆರೋಗ್ಯ ಕಾರ್ಯಕರ್ತರಿಗೆ ತರಬೇತಿ ನೀಡಲು ಯುನಿಸೆಫ್‍ಗೆ 21 ದಶಲಕ್ಷ ಡಾಲರ್ ನಿಧಿಯ ತುರ್ತು ಅಗತ್ಯವಿದೆ. ಅಲ್ಲದೆ ಬಳಕೆಗೆ ಸಿದ್ಧವಾದ ಚಿಕಿತ್ಸಕ ಆಹಾರ(ಆರ್‍ಯುಟಿಎಫ್)ದ ಕೊರತೆಯಿದೆ ಎಂದವರು ಹೇಳಿದ್ದಾರೆ. ಅಪೌಷ್ಟಿಕತೆಯ ಸಮಸ್ಯೆಯಿಂದ ಬಳಲುತ್ತಿರುವ ಮಕ್ಕಳನ್ನು ಗುಣಪಡಿಸಲು ಅಗತ್ಯವಾದ ಸಿದ್ಧ ಆಹಾರವೆಂದು ಆರ್‍ಯುಟಿಎಫ್ ಅನ್ನು ಪರಿಗಣಿಸಲಾಗಿದೆ.

ಅಫ್ಘಾನಿಸ್ತಾನದಲ್ಲಿ 15 ದಶಲಕ್ಷಕ್ಕೂ ಹೆಚ್ಚಿನ ಮಕ್ಕಳು ಸೇರಿದಂತೆ 28 ದಶಲಕ್ಷಕ್ಕೂ ಅಧಿಕ ಜನರಿಗೆ ಮಾನವೀಯ ನೆರವು ಮತ್ತು ಭದ್ರತೆಯ ಅಗತ್ಯವಿದೆ. 2022ಕ್ಕೆ ಹೋಲಿಸಿದರೆ ಈ ಪ್ರಮಾಣ 4 ದಶಲಕ್ಷದಷ್ಟು ಅಧಿಕವಾಗಿದೆ ಎಂದು ಯುನಿಸೆಫ್‍ನ ವರದಿ ಹೇಳಿದೆ.