ಮಂಗಳೂರು: ಆನ್‌ಲೈನ್‌ನಲ್ಲಿ ವಂಚನೆ; ಪ್ರಕರಣ ದಾಖಲು

ಮಂಗಳೂರು: ಕ್ಯಾಮರಾ ಪಾರ್ಸಲ್ ವಿಚಾರವಾಗಿ ಆ್ಯಕ್ಟಿವೇಶನ್ ಚಾರ್ಜ್ ಎಂದು 5 ರೂ. ಗೂಗಲ್ ಪೇ ಮಾಡು ವಂತೆ ಕಳುಹಿಸಿದ ಲಿಂಕ್‌ನಿಂದಾಗಿ 52,662 ರೂ. ಕಳೆದುಕೊಂಡಿರುವ ಬಗ್ಗೆ ನಗರದ ಸೆನ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಮೇ 12ರಂದು  ಬಂದ ಕರೆಯಲ್ಲಿ ‘ಕ್ಯಾಮರಾ ಪಾರ್ಸಲ್ ಇದೆ. ಆ್ಯಕ್ಟಿವೇಶನ್ ಚಾರ್ಜ್ 5 ರೂ. ಗೂಗಲ್ ಪೇ ಮೂಲಕ ಪಾವತಿಸಬೇಕು’ ಎಂದು ತಿಳಿಸಲಾಗಿತ್ತು. ಬಳಿಕ ಬಂದ ಲಿಂಕ್‌ಗೆ 5 ರೂ. ಪಾವತಿಸಿದ್ದು, ಆ ಮೆಸೇಜನ್ನು ಕರೆ ಮಾಡಿದ ವ್ಯಕ್ತಿ ಕಳುಹಿಸಿದ ಇನ್ನೊಂದು ನಂಬರ್‌ಗೆ ಫಾರ್ವಡ್ ಮಾಡಲಾಗಿತ್ತು. ಆದರೆ ಯಾವುದೇ ಪಾರ್ಸಲ್ ಬಾರದ ಕಾರಣ ಮತ್ತೆ ಕರೆ ಮಾಡಿದಾಗ ಅದು ಸ್ವಿಚ್ಡ್ ಆಫ್ ಆಗಿತ್ತು. ಇದರಿಂದ ಸಂಶಯಗೊಂಡು ತನ್ನ ಖಾತೆಯಲ್ಲಿದ್ದ ಹಣವನ್ನು ಹೆಂಡತಿಯ ಖಾತೆಗೆ ವರ್ಗಾಯಿಸಿದ್ದಾರೆ. ಅವರ ಖಾತೆಯಿಂದ ಯಾವುದೇ ಹಣ ಡ್ರಾ ಆಗದ ಹಿನ್ನೆಲೆಯಲ್ಲಿ ಮೇ 16ರಂದು ಹೆಂಡತಿಯ ಖಾತೆಯಿಂದ 45,000 ರೂ. ತನ್ನ ಖಾತೆಗೆ ವಾಪಾಸ್ ಹಾಕಿಸಿದ್ದಾರೆ.

ಮೇ 17ರಂದು ಅವರ ಮೊಬೈಲ್ ನಂಬರಿಗೆ ಮೆಸೇಜ್ ಬಂದಿದ್ದು, ಅದರಂತೆ ಒಂದು ಖಾತೆಯಿಂದ 46,020 ರೂ. ಮತ್ತು ಇನ್ನೊಂದರಿಂದ 6,642 ರೂ. ಕಡಿತಗೊಂಡಿದೆ. ಬ್ಯಾಂಕ್‌ನಲ್ಲಿ ವಿಚಾರಿಸಿದಾಗ ಆನ್‌ಲೈನ್ ವಂಚನೆಯಾಗಿರುವ ಕುರಿತು ಸ್ಟೇಟ್‌ಮೆಂಟ್ ನೀಡಿದ್ದಾರೆ. ಹಾಗಾಗಿ ವಂಚಕರನ್ನು ಪತ್ತೆ ಹಚ್ಚಿ ಹಣ ವಾಪಾಸು ನೀಡಬೇಕು ಎಂದು ದೂರಿನಲ್ಲಿ ತಿಳಿಸಲಾಗಿದೆ.