ಅದಾನಿ ಶೇರುಗಳಲ್ಲಿ ಶಂಕಾಸ್ಪದ ವಹಿವಾಟಿಗಾಗಿ ಆರು ಸಂಸ್ಥೆಗಳ ಮೇಲೆ ನಿಗಾ: ಸುಪ್ರೀಂ ಕೋರ್ಟ್ ಸಮಿತಿ

ಹೊಸದಿಲ್ಲಿ: ಅಮೆರಿಕದ ಹೂಡಿಕೆ ಸಂಸ್ಥೆ ಹಿಂಡೆನ್ಬರ್ಗ್ ವರದಿ ಬಿಡುಗಡೆಗೊಳ್ಳುವ ಮುನ್ನ ಅದಾನಿ ಗ್ರೂಪ್ ಕಂಪನಿಗಳ ಶೇರುಗಳಲ್ಲಿ ಶಂಕಾಸ್ಪದ ವಹಿವಾಟಿಗಾಗಿ ನಾಲ್ಕು ವಿದೇಶಿ ಪೋರ್ಟ್ಫೋಲಿಯೊ ಹೂಡಿಕೆದಾರ (ಎಫ್ಪಿಐ)ರು ಸೇರಿದಂತೆ ಆರು ಸಂಸ್ಥೆಗಳ ಮೇಲೆ ನಿಗಾಯಿರಿಸಲಾಗಿದೆ ಎಂದು ಸರ್ವೋಚ್ಚ ನ್ಯಾಯಾಲಯದಿಂದ ನೇಮಕಗೊಂಡಿದ್ದ ತಜ್ಞರ ಸಮಿತಿಯು ಹೇಳಿದೆ.

ಅದಾನಿ ಗ್ರೂಪ್ ವಿರುದ್ಧ ಆರೋಪಗಳನ್ನು ಮಾಡಿರುವ ಹಿಂಡೆನ್ಬರ್ಗ್ ವರದಿಯು ಜ.24ರಂದು ಬಿಡುಗಡೆಗೊಳ್ಳುವ ಮುನ್ನ ಅದಾನಿ ಶೇರುಗಳಲ್ಲಿ ಗಣನೀಯ ಪ್ರಮಾಣದಲ್ಲಿ ಶಾರ್ಟ್ ಪೊಸಿಷನ್ಗಳಿದ್ದವು. ವರದಿ ಬಿಡುಗಡೆಯಾದ ಬಳಿಕ ಅದಾನಿ ಶೇರುಗಳು ಭಾರೀ ಕುಸಿತಕ್ಕೊಳಗಾಗಿದ್ದು, ಶಾರ್ಟ್ ಪೊಸಿಷನ್ ಹೊಂದಿದ್ದವವರು ಅಪಾರ ಲಾಭವನ್ನು ಮಾಡಿಕೊಂಡಿದ್ದರು ಎಂದು ಸಮಿತಿಯು ತನ್ನ ವರದಿಯಲ್ಲಿ ತಿಳಿಸಿದೆ.

ಶಾರ್ಟ್ ಪೊಸಿಷನ್ ಸಾಮಾನ್ಯವಾಗಿ ಹೂಡಿಕೆದಾರರು ತಮ್ಮ ಬಳಿ ಇಲ್ಲದ ಶೇರುಗಳನ್ನು ಬ್ರೋಕರ್ ಗಳಿಂದ ಎರವಲು ಪಡೆದುಕೊಂಡು ಮಾರಾಟ ಮಾಡಿ ಅವುಗಳ ಬೆಲೆ ಇಳಿದ ಬಳಿಕ ಖರೀದಿಸಿ ಬ್ರೋಕರ್ ಗೆ ಮರಳಿಸುವುದನ್ನು ಒಳಗೊಂಡಿದೆ. ಮಾರಾಟ ಮತ್ತು ಖರೀದಿ ಬೆಲೆಗಳ ನಡುವಿನ ವ್ಯತ್ಯಾಸವು ಅವರ ಲಾಭವಾಗುತ್ತದೆ.

ಅದಾನಿ ಗ್ರೂಪ್ ತನ್ನ ಕಂಪನಿಗಳ ಶೇರುಗಳ ಬೆಲೆಗಳನ್ನು ಕೃತಕವಾಗಿ ಹೆಚ್ಚಿಸಿತ್ತು ಮತ್ತು ನಿಯಮಗಳನ್ನು ಉಲ್ಲಂಘಿಸಿತ್ತು ಎಂಬ ಆರೋಪಗಳಿಗೆ ಯಾವುದೇ ಸಾಕ್ಷ್ಯಾಧಾರಗಳು ಕಂಡು ಬಂದಿಲ್ಲ ಎಂದು ತನ್ನ ವರದಿಯಲ್ಲಿ ತಿಳಿಸಿರುವ ನಿವೃತ್ತ ಸುಪ್ರೀಂ ಕೋರ್ಟ್ ನ್ಯಾಯಾಧೀಶ ಎ.ಎಂ.ಸಪ್ರೆ ನೇತೃತ್ವದ ಸಮಿತಿಯು, ಆರು ಸಂಸ್ಥೆಗಳು ಶಂಕಾಸ್ಪದ ವಹಿವಾಟುಗಳನ್ನು ನಡೆಸಿರುವುದು ಗಮನಕ್ಕೆ ಬಂದಿದೆ. ಇವುಗಳಲ್ಲಿ ನಾಲ್ಕು ಎಫ್ಪಿಐಗಳು,ಒಂದು ಕಾರ್ಪೊರೇಟ್ ಸಂಸ್ಥೆ ಮತ್ತು ಓರ್ವ ವ್ಯಕ್ತಿ ಸೇರಿದ್ದಾರೆ ಎಂದು ಹೇಳಿದೆ. ವರದಿಯು ಈ ಪೈಕಿ ಯಾರನ್ನೂ ಹೆಸರಿಸಿಲ್ಲ.

ಹಿಂಡೆನ್ಬರ್ಗ್ ವರದಿಯ ಬಿಡುಗಡೆಗೆ ಮುನ್ನ ಈ ಸಂಸ್ಥೆಗಳು ಅದಾನಿ ಶೇರುಗಳಲ್ಲಿ ಗಣನೀಯ ಶಾರ್ಟ್ ಪೊಸಿಷನ್ಗಳನ್ನು ಹೊಂದಿದ್ದವು ಮತ್ತು ವರದಿಯು ಬಿಡುಗಡೆಗೊಂಡ ಬಳಿಕ ತಮ್ಮ ಶಾರ್ಟ್ ಪೊಸಿಷನ್ಗಳಿಂದ ಹೊರಬರುವ ಮೂಲಕ ಗಣನೀಯ ಲಾಭ ಗಳಿಸಿದ್ದು,ಈ ವಹಿವಾಟುಗಳು ಶಂಕೆಯನ್ನು ಮೂಡಿಸಿವೆ ಎಂದು ಸಮಿತಿಯು ಹೇಳಿದೆ.
ಈ ಆರು ಸಂಸ್ಥೆಗಳ ವಹಿವಾಟುಗಳ ಕುರಿತಂತೆ ವಿವರವಾದ ತನಿಖೆಯನ್ನು ನಡೆಸಲಾಗುತ್ತಿದೆ ಎಂದು ಅದು ತಿಳಿಸಿದೆ.