ಭಾರತದಿಂದ ಬಾಂಗ್ಲಾಗೆ 20 ಬ್ರಾಡ್ಗೇಜ್ ರೈಲು ಎಂಜಿನ್ ಹಸ್ತಾಂತರ
ಹೊಸದಿಲ್ಲಿ: ಬಾಂಗ್ಲಾದೇಶಕ್ಕೆ ಮಂಗಳವಾರ 20 ಬ್ರಾಡ್ಗೇಜ್ ಲೋಕೊಮೋಟಿವ್ ಹಸ್ತಾಂತರದ ಮೂಲಕ ಅಲ್ಲಿನ ಪ್ರಧಾನಿ ಶೇಖ್ ಹಸೀನಾ 2019ರಲ್ಲಿ ಭಾರತಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ ನೀಡಲಾದ ಭರವಸೆಯನ್ನು ಭಾರತ ಈಡೇರಿಸಿದಂತಾಗಿದೆ. ಈ ಲೋಕೋಮೋಟಿವ್ಗಳನ್ನು ಪ್ರಯಾಣಿಕ ರೈಲು ಹಾಗೂ ಸರಕು ಸಾಗಾಣಿಕೆ ರೈಲುಗಳಿಗೂ ಬಳಸಬಹುದಾಗಿದೆ.
ಈ ಲೋಕೊ ಹಸ್ತಾಂತರಿಸಿ ಮಾತನಾಡಿದ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರು, "ಬಾಂಗ್ಲಾದೇಶದ ಜತೆಗಿನ ಭಾರತದ ಸಂಬಂಧ ನಾಗರಿಕತೆ, ಸಾಂಸ್ಕೃತಿಕ, ಸಾಮಾಜಿಕ ಮತ್ತು ಆರ್ಥಿಕ ಸ್ವರೂಪದ್ದು. ಉಭಯ ದೇಶಗಳ ಪ್ರಧಾನಿಗಳು ಸಾಮಾಜಿಕ, ಆರ್ಥಿಕ ಮತ್ತು ರಾಕೀಯ ವಯಲಗಳಾದ್ಯಂತ ದ್ವಿಪಕ್ಷೀಯ ಸಂಬಂಧವನ್ನು ಸುಧಾರಿಸಲು ಪ್ರಯತ್ನಿಸುತ್ತಿದ್ದಾರೆ. ಗಡಿಪ್ರದೇಶದಾದ್ಯಂತ ರೈಲು ಸಂಪರ್ಕವನ್ನು ಸುಧಾರಿಸಲು ಮತ್ತು ಬಲಗೊಳಿಸಲು ಹಾಗೂ ಉಭಯ ದೇಶಗಳ ನಡುವಿನ ವ್ಯಾಪಾರ ಸಂಬಂಧವನ್ನು ಸುಧಾರಿಸಲು ಭಾರತೀಯ ರೈಲ್ವೆ ಪ್ರಮುಖ ಪಾತ್ರ ವಹಿಸುತ್ತಿದೆ" ಎಂದು ಬಣ್ಣಿಸಿದರು.
ಪ್ರಸ್ತುತ ಗೆಡಾ-ದರ್ಸಾನಾ, ಬೆನಪೋಲ್-ಪೆಟ್ರಾಪೋಲ್, ಸಿಂಗಾಬಾದ್- ರೋಹನ್ಪುರ, ರಾಧಿಕಾಪುರ- ಬಿರೋಲ್ ಹಾಗೂ ಹಲ್ದಿಬಾರಿ- ಚಿಲಾಹಾದಿ ನಡುವೆ ಐದು ಬ್ರಾಡ್ಗೇಜ್ ರೈಲುಗಳು ಕಾರ್ಯಾಚರಣೆ ನಡೆಸುತ್ತಿವೆ. ಉಭಯ ದೇಶಗಳ ನಡುವೆ ಸಂಪರ್ಕ ಕಲ್ಪಿಸುವ ಅಖೋರಾ- ಅತರ್ಗಲ ಮತ್ತು ಮಹಿಷಾಸನ- ಶಹಜಹಾನ್ಪುರ ನಡುವಿನ ಕಾಮಗಾರಿ ಪ್ರಗತಿಯಲ್ಲಿದ್ದು, ಸದ್ಯದಲ್ಲೇ ಕಾಮಗಾರಿ ಆರಂಭವಾಗುವ ನಿರೀಕ್ಷೆ ಇದೆ ಎಂದು ಸಚಿವರು ವಿವರಿಸಿದರು.
ಬಾಂಗ್ಲಾದೇಶದ ರೈಲ್ವೆ ಅಗತ್ಯತೆಗೆ ಅನುಸಾರವಾಗಿ ಈ ಲೋಕೊಮೋಟಿವ್ಗಳನ್ನು ಸೂಕ್ತವಾಗಿ ಆಧುನೀಕರಿಸಲಾಗಿದೆ.