ಯುವಜನರು ಕೇವಲ ಮ್ಯಾನೇಜರ್ ಗಳಾಗದೆ ಲೀಡರ್ ಆಗಲು ಶ್ರಮಿಸಿ: ಸೈಯದ್ ಬ್ಯಾರಿ

ಮಂಗಳೂರು, ಮೇ 27: ಜಗತ್ತಿನಲ್ಲಿ ದಿನದಿಂದ ದಿನಕ್ಕೆ ತಂತ್ರಜ್ಞಾನಗಳ ಬದಲಾವಣೆಯಾಗುತ್ತಿದೆ. ದೇಶದ ಯುವ ಸಮೂಹವು ಕಾಲಕಾಲಕ್ಕೆ ಈ ಬದಲಾವಣೆಗಳಿಗೆ ಹೊಂದಿಕೊಂಡು ಆಧುನಿಕ ತಂತ್ರಜ್ಞಾನಗಳ ಅವಕಾಶಗಳನ್ನು ಸಂಪೂರ್ಣವಾಗಿ, ಸಮರ್ಥವಾಗಿ ಬಳಸಿಕೊಳ್ಳಬೇಕಿದೆ. ಯುವಜನರು  ‘ಮ್ಯಾನೇಜರ್’ ಅಗುವ ಬದಲು ‘ಲೀಡರ್’ ಆಗಲು ಹಂಬಲಿಸಬೇಕು. ಜವಾಬ್ದಾರಿಗಳನ್ನು ಗುಣಾತ್ಮಕವಾಗಿ ಬಳಸಿಕೊಳ್ಳಬೇಕು. ಅದಕ್ಕಾಗಿ  ತ್ಯಾಗಕ್ಕೂ ಸಿದ್ಧರಾಗಬೇಕು. ಆವಾಗ ಮಾತ್ರ  ಗುರಿ ತಲುಪಬಹುದು. ಭಾರತದ ಗತ ವೈಭವವನ್ನು ಮರಳಿ ತರಬಹುದು. ಯುವಜನರು  ವಿಶಾಲ ಹೃದಯಿಗಳಾಗಿ  ಆಧ್ಯಾತ್ಮಿಕ ಚಿಂತನೆಯನ್ನೂ ಮೈಗೂಡಿಸಿಕೊಳ್ಳಬೇಕಿದೆ ಎಂದು  ಬ್ಯಾರೀಸ್ ಅಕಾಡಮಿ ಆಫ್ ಲರ್ನಿಂಗ್ ಅಧ್ಯಕ್ಷ ಸೈಯದ್ ಮುಹಮ್ಮದ್ ಬ್ಯಾರಿ ಕರೆ ನೀಡಿದರು.

ಇನೋಳಿಯ  ಬ್ಯಾರೀಸ್ ನಾಲೇಜ್ ಕ್ಯಾಂಪಸ್‌ನಲ್ಲಿ ಶನಿವಾರ ನಡೆದ ಬ್ಯಾರೀಸ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಬಿಐಟಿ), ಬ್ಯಾರೀಸ್ ಎನ್ವಿರೋ-ಆರ್ಕಿಟೆಕ್ಚರ್ ಡಿಸೈನ್ ಸ್ಕೂಲ್ (ಬೀಡ್ಸ್), ಬ್ಯಾರೀಸ್ ಇನ್‌ಸ್ಟಿಟ್ಯೂಟ್  ಆಫ್ ಇಂಜಿನಿಯರಿಂಗ್ ಸೈಯನ್ಸಸ್ ಹಾಗೂ ಬಿಐಟಿ ಪಾಲಿಟೆಕ್ನಿಕ್ ಇವುಗಳ ‘ಬ್ಯಾರೀಸ್ ಉತ್ಸವ್-2023’ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ವಿಶ್ವವು ಕ್ಷಿಪ್ರಗತಿಯಲ್ಲಿ ಬದಲಾಗುತ್ತಿದೆ. ಕಳೆದೊಂದು ಶತಮಾನದಲ್ಲಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಆದ ಬದಲಾವಣೆ ಈಗ  ಕೇವಲ 10 ವರ್ಷಗಳಲ್ಲಿ ಸಂಪೂರ್ಣ  ಬದಲಾವಣೆಯಾಗಿರುವುದು ಗಮನಾರ್ಹ ಬೆಳವಣಿಗೆಯಾಗಿದೆ. 21ನೇ ಶತಮಾನವು ಅತ್ಯಂತ ಡೈನಾಮಿಕ್ ಆಗಿದೆ. ಮುಂದಿನ 2-3 ವರ್ಷಗಳಲ್ಲಿ ತಂತ್ರಜ್ಞಾನದಲ್ಲಿ ಆಗಲಿರುವ ಬದಲಾವಣೆಯನ್ನು ಯಾರಿಗೂ ಊಹಿಸಲು ಸಾದ್ಯವಿಲ್ಲ ಎಂದ ಸೈಯದ್ ಮುಹಮ್ಮದ್ ಬ್ಯಾರಿ ‘ಹೆತ್ತವರು ತಮ್ಮ ಮಕ್ಕಳನ್ನು ಕಾಲೇಜಿಗೆ ಸೇರಿಸುವಾಗ ಉತ್ತಮ ವೈದ್ಯ, ಉತ್ತಮ ಇಂಜಿನಿಯರ್ ಆಗಲಿ ಒಂದು ಬಯಸುತ್ತಾರೆ. ಆದರೆ  ನಮ್ಮ ಮಕ್ಕಳನ್ನು ಉತ್ತಮ ಮನುಷ್ಯರಾಗಿ ರೂಪಿಸಿ, ಅಷ್ಟು ಸಾಕು ಎಂದು ಹೇಳುವ ಕಾಲ ಬೇಗ ಬರಲಿದೆ ’ ಎಂದು ಅವರು ಅಭಿಪ್ರಾಯಪಟ್ಟರು.

ಪದವೀಧರರು ಉದ್ಯೋಗ ಗಳಿಸಲು ಅಥವಾ ವೇತನ ಪಡೆಯಲು ಮಾತ್ರ ಹಂಬಲಿಸದೆ ಹೊಸತನ್ನು ಕಲಿಯಲು ಹೆಚ್ಚಿನ ಆದ್ಯತೆ ನೀಡಬೇಕು. ಭಾರತವು ಜಗತ್ತಿನ ಅತೀ ಹೆಚ್ಚು ಯುವ ಸಮೂಹವನ್ನು ಹೊಂದಿರುವ ದೇಶ. ಈ  ಯುವ ಸಮೂಹ  ತಮ್ಮ ಉನ್ನತ ಶಿಕ್ಷಣ ಕಲಿಕೆಯ  ಅವಧಿಯನ್ನು ಭವಿಷ್ಯದ ಹಿತದೃಷ್ಟಿಯಿಂದ ಅಮೂಲ್ಯ ಕ್ಷಣಗಳನ್ನಾಗಿ ಮಾರ್ಪಡಿಸಬೇಕು ಎಂದರು.

ಶತಮಾನದ ಹಿಂದೆ ಹಿರಿಯರಿಂದ ಸ್ಥಾಪಿಸಲ್ಪಟ್ಟ ಈ ಬ್ಯಾರೀಸ್ ಶಿಕ್ಷಣ ಸಮೂಹದಡಿ ಇಂದು 20ಕ್ಕೂ ಅಧಿಕ ಸಂಸ್ಥೆಗಳಿದ್ದು, 5 ಸಾವಿರಕ್ಕೂ ಅಧಿಕ ವಿದ್ಯಾರ್ಥಿಗಳು ಕಲಿಯುತ್ತಿದ್ದಾರೆ ಎಂದು ಸೈಯದ್ ಮುಹಮ್ಮದ್ ಬ್ಯಾರಿ ಹೇಳಿದರು.

ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದ ಮಂಗಳೂರು ನಗರ ಪೊಲೀಸ್ ಉಪಾಯುಕ್ತ (ಕಾನೂನು ಮತ್ತು ಸುವ್ಯವಸ್ಥೆ ವಿಭಾಗ) ಅಂಶುಕುಮಾರ್ ಮಾತನಾಡಿ, ಕಾಲೇಜಿನ ಬದುಕು ಅಮೂಲ್ಯವಾದುದು.  ಹಳೆಯ ಘಟನೆಗಳನ್ನು ನೆನಪಿಸುವಾಗ ಕಾಲೇಜು ದಿನಗಳ ನೆನಪು ಆಗದೇ ಇರದು. ಈ ಅದೃಷ್ಟದ ಕ್ಷಣಗಳನ್ನು ಮತ್ತೆಂದೂ ಮರಳಿ ಪಡೆಯಲು ಸಾಧ್ಯವಿಲ್ಲ. ಹಾಗಾಗಿ ಬದುಕಿನ ಭದ್ರತೆಗೆ ಅಡಿಪಾಯ ಹಾಕಬೇಕಿದ್ದರೆ ಕಾಲೇಜಿನ ದಿನಗಳಲ್ಲಿ ಪಠ್ಯೇತರದ ಜೊತೆಗೆ ಕಲಿಕೆಗೆ ಹೆಚ್ಚಿನ ಆದ್ಯತೆ ನೀಡಬೇಕು ಎಂದರು.

ಮತ್ತೋರ್ವ ಮುಖ್ಯ ಅತಿಥಿ ಮಂಗಳೂರಿನ ಕೋಡ್ ಕ್ರಾಫ್ಟ್ ಟೆಕ್ನಾಲಜೀಸ್‌ನ ಸಹ-ಸ್ಥಾಪಕ ಮತ್ತು ಸಿಟಿಒ ಪ್ರವೀಣ್ ಕ್ಯಾಸ್ಟಲಿನೊ  ಮಾತನಾಡಿ ಶಿಕ್ಷಣ, ಅನುಭವ, ಹಣಕಾಸು, ಕೌಟುಂಬಿಕ, ಆರೋಗ್ಯ ಹೀಗೆ ಎಲ್ಲದರಲ್ಲೂ  ಸಂತುಲನೆ ಕಾಯ್ದುಕೊಂಡರೆ ಬದುಕಿನಲ್ಲಿ ಅಭಿವೃದ್ಧಿ ಹೊಂದಲು ಸಾಧ್ಯವಿದೆ. ಸಣ್ಣ ಸಣ್ಣ ಹೆಜ್ಜೆಗಳನ್ನು ಮುಂದಿಡುತ್ತಲೇ ಬದುಕಿನ ಹಲವು ಆಯಾಮಗಳನ್ನು ಅರಿತುಕೊಂಡು ಮುನ್ನುಗ್ಗಬೇಕಿದೆ ಎಂದರು.

ಇನ್ನೋರ್ವ ಮುಖ್ಯ ಅತಿಥಿ ಅಂತಾರಾಷ್ಟ್ರೀಯ ಕಬಡ್ಡಿ ಆಟಗಾರ, ಏಷ್ಯನ್ ಗೇಮ್ಸ್‌ನ ಚಿನ್ನದ ಪದಕ ವಿಜೇತ, ಪ್ರೊ-ಕಬಡ್ಡಿ ಕೋಚ್ ಜಗದೀಶ್ ಕುಂಬ್ಳೆ ಮಾತನಾಡಿ ವಿದ್ಯಾರ್ಥಿ ಜೀವನದಲ್ಲಿ ಶಿಕ್ಷಣ ಮಾತ್ರ ಮುಖ್ಯವಾಗವಾರದು. ಪಠ್ಯೇತರ ಚಟುವಟಿಕೆಗೂ ಒತ್ತು ನೀಡಬೇಕು. ಅದರಲ್ಲೂ ಕ್ರೀಡೆಗೆ ವಿಶೇಷ ಆದ್ಯತೆ ನೀಡಬೇಕು ಎಂದರು.

ಬಿಐಟಿ ಪ್ರಾಂಶುಪಾಲ ಡಾ. ಎಸ್.ಐ. ಮಂಜೂರ್ ಬಾಷಾ, ಬೀಡ್ಸ್  ಪ್ರಾಂಶುಪಾಲ ಖಲೀಲ್ ಶೇಖ್, ಬಿಐಟಿ  ಪ್ರಾಂಶುಪಾಲ ಪ್ರೊ. ಪೃಥ್ವಿರಾಜ್ ಎಂ., ಬಿಐಇಎಸ್  ಪ್ರಾಂಶುಪಾಲ   ಡಾ. ಅಝೀಝ್ ಮುಸ್ತಫಾ ವಾರ್ಷಿಕ ವರದಿಗಳನ್ನು ವಾಚಿಸಿದರು. ಅಕಾಡಮಿ ವರ್ಷದ ಟಾಪರ್ಸ್, ಕ್ರೀಡಾ ಸಾಧಕರಿಗೆ, ಸಾಂಸ್ಕೃತಿಕ ಕಾರ್ಯಕ್ರಮಗಳ ವಿಜೇತರಿಗೆ ಪ್ರಮಾಣಪತ್ರ, ಸ್ಮರಣಿಕೆ ಹಾಗೂ ಕ್ರೀಡಾ ಚಾಂಪಿಯನ್‌ಗಳಿಗೆ ಟ್ರೋಫಿ ವಿತರಿಸಲಾಯಿತು.

ಮರಿಯತ್ ಶಬ್ನಂ, ಶಿರೀನ್ ಫಾತಿಮಾ ಅತಿಥಿಗಳನ್ನು ಪರಿಚಯಿಸಿದರು. ಡಾ. ವಿನುತಾ, ಪ್ರೊ. ಮುಬೀನಾ ಪರ್ವೀನ್ ತಾಜ್ ಸಾಧಕ ವಿದ್ಯಾರ್ಥಿಗಳ ಪಟ್ಟಿ ವಾಚಿಸಿದರು. ರೇಣುಕಾ ಮತ್ತು ತಂಡವು ಪ್ರಾರ್ಥನಾ ಗೀತೆ ಹಾಡಿತು. ಡಾ. ನಳಿನಿ ರೆಬೆಲ್ಲೊ ಸ್ವಾಗತಿಸಿದರು. ಮುಹಮ್ಮದ್ ಸಿನಾನ್ ವಂದಿಸಿದರು. ಬಿಲಾಲ್ ಕಾರ್ಯಕ್ರಮ ನಿರೂಪಿಸಿದರು.

ಬ್ಯಾರೀಸ್ ನಿಂದ ಮೈಕ್ರೋಸಾಫ್ಟ್ ನ ಪ್ರಪ್ರಥಮ ಡೇಟಾ ಸೆಂಟರ್ ನಿರ್ಮಾಣ : ಸಯ್ಯದ್ ಬ್ಯಾರಿ   

ಇವತ್ತು ದೇಶದಲ್ಲಿ ಮೈಕ್ರೋಸಾಫ್ಟ್ ನ ಪ್ರಪ್ರಥಮ ಡೇಟಾ ಸೆಂಟರ್ ಅನ್ನು ಹೈದರಾಬಾದ್ ನಲ್ಲಿ ಬ್ಯಾರೀಸ್ ಗ್ರೂಪ್ ನಿರ್ಮಿಸುತ್ತಿದೆ. ಅಂತಹ ಪ್ರತಿಷ್ಠಿತ ಯೋಜನೆಯಲ್ಲಿ ಕೆಲಸ ಮಾಡುವ ಅವಕಾಶ ಬಿಐಟಿಯ ಸಿವಿಲ್ ಹಾಗು ಮೆಕ್ಯಾನಿಕಲ್ ಇಂಜಿನಿಯರ್ ಗಳಿಗೆ ನಾವು ಒದಗಿಸಿದ್ದೇವೆ. ಅಲ್ಲಿ ಅವರು ದೇಶದ ಇತರ ಭಾಗದ ಇಂಜಿನಿಯರ್ ಗಳನ್ನೂ ಮೀರಿಸಿ ಅತ್ಯುತ್ತಮ ನಿರ್ವಹಣೆ ತೋರಿರುವುದು ನಮಗೆ ಹೆಮ್ಮೆಯ ಸಂಗತಿ. ಇವತ್ತು ಈ ಜಗತ್ತಿಗೆ ಬೇಕಿರುವುದು ಸಾಮಾನ್ಯ ಇಂಜಿನಿಯರ್ ಗಳಲ್ಲ. ತಾವು ಕಲಿತಿದ್ದನ್ನು ಹೇಗೆ ಕೆಲಸಕ್ಕೆ ಅತ್ಯುತ್ತಮವಾಗಿ ಬಳಸಬೇಕು ಎಂದು ಚೆನ್ನಾಗಿ ತಿಳಿದಿರುವ, ಅಸಾಮಾನ್ಯ ಪ್ರತಿಭೆಯ, ಬುದ್ಧಿವಂತ, ನಿಷ್ಠಾವಂತ, ಹೊಣೆಯರಿತ, ಸಮಯ ಪ್ರಜ್ಞೆ ಇರುವ ಇಂಜಿನಿಯರ್ ಗಳಿಗೆ ಇವತ್ತು ಇಡೀ ವಿಶ್ವದಲ್ಲೇ ಅತ್ಯುತ್ತಮ ಅವಕಾಶಗಳಿವೆ ಎಂದು ಸಯ್ಯದ್ ಬ್ಯಾರಿ ಹೇಳಿದರು.