ಮಾಧ್ಯಮಗಳು ಸತ್ಯ ತಲುಪಿಸಬೇಕಾಗಿರುವುದು ಅಗತ್ಯ: ಫಾ.ಫರ್ಡಿನಾಂಡ್ ಗೊನ್ಸಾಲ್ವಿಸ್

ಉಡುಪಿ, ಮೇ 28: ಆಧುನಿಕ ಕಾಲದಲ್ಲಿ ಮಾಧ್ಯಮ ಮನುಷ್ಯನ ಜೀವನದ ಮೇಲೆ ಅಗಾಧ ಪರಿಣಾಮ ಬೀರು ತ್ತಿದೆ. ಮಾಧ್ಯಮಗಳಿಂದ ದೂರವಿರದೆ, ಅವುಗಳ ಮೂಲಕ ನಮ್ಮ ಒಳ್ಳೆಯ ಚಿಂತನೆಗಳನ್ನು ಹಾಗೂ ಸಮಾಜ ಮುಖಿ ಕಾರ್ಯಚಟುವಟಿಕೆಗಳನ್ನು ಇನ್ನಷ್ಟು ಪ್ರಚುರಗೊಳಿಸಿ, ಸಮಾಜಕ್ಕೆ ಉತ್ತಮ ಸಂದೇಶವನ್ನು ಮತ್ತು ಸತ್ಯವನ್ನು ತಲುಪಿಸಬೇಕಾದ ಅಗತ್ಯವಿದೆ ಎಂದು ಉಡುಪಿ ಧರ್ಮಪ್ರಾಂತ್ಯದ ಶ್ರೇಷ್ಟಗುರು ಅತಿ ವಂ. ಫಾ.ಫರ್ಡಿನಾಂಡ್ ಗೊನ್ಸಾಲ್ವಿಸ್ ಹೇಳಿದ್ದಾರೆ.

ಉಡುಪಿ ಧರ್ಮಪ್ರಾಂತ್ಯ, ದೀಪಾ ಟ್ರಸ್ಟ್, ಉಜ್ವಾಡ್ ಕೊಂಕಣಿ ಪಾಕ್ಷಿಕ, ಸಾಮಾಜಿಕ ಸಂಪರ್ಕ ಆಯೋಗ ಮತ್ತು ಸಿಗ್ನಿಸ್ ಇಂಡಿಯಾ ವತಿಯಿಂದ ಅಂಬಾಗಿಲು ಬಳಿಯ ಅನುಗ್ರಹ ಪಾಲನಾ ಕೇಂದ್ರದಲ್ಲಿ ರವಿವಾರ ನಡೆದ ಚರ್ಚ್ ಮತ್ತು ಮಾಧ್ಯಮ ಎಂಬ ವಿಶೇಷ ಕಾರ್ಯಾಗಾರವನ್ನು ಉದ್ಘಾಟಿಸಿ ಅವರು ಮಾತನಾಡುತಿದ್ದರು.

ಮುಖ್ಯ ಅತಿಥಿಗಳಾಗಿ ಧರ್ಮಪ್ರಾಂತ್ಯದ ಕುಲಪತಿ ಅತಿ ವಂ.ಡಾ.ರೋಶನ್ ಡಿಸೋಜ ಮಾತನಾಡಿ, ಇದು ಮಾಧ್ಯಮದ ಯುಗವಾಗಿದ್ದು, ಕಥೊಲಿಕ್ ಧರ್ಮಸಭೆ ಇದರಿಂದ ಹೊರತಾಗಿರುವುದು ಸಾಧ್ಯವಿಲ್ಲ. ಧರ್ಮ ಸಭೆಯು ನಡೆಸುವ ಕಾರ್ಯಕ್ರಮಗಳು ಮಾಧ್ಯಮಗಳಲ್ಲಿ ಕಾಣಲು ಸಿಗುವುದು ವಿರಳ. ಆದರೆ ಇತ್ತೀಚಿನ ದಿನ ಗಳಲ್ಲಿ ರಾಜಕೀಯ ಪಕ್ಷಗಳು ಮಾಧ್ಯಮದ ಮೂಲಕ ಸಾವಿರಾರು ಜನರನ್ನು ಸುಲಭವಾಗಿ ಸಂಪರ್ಕಿಸುತ್ತವೆ. ಧರ್ಮಸಭೆ ಮಾಧ್ಯಮದಲ್ಲಿ ತಮ್ಮ ಇರುವಿಕೆಯನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಹೆಚ್ಚಿನ ಗಮನ ನೀಡುವಂತಾಗಬೇಕು ಎಂದರು.

ಉಡುಪಿ ಧರ್ಮಪ್ರಾಂತ್ಯದ ಸಾರ್ವಜನಿಕ ಸಂಪರ್ಕಾಧಿಕಾರಿ ವಂದನೀಯ ಫಾದರ್ ಡೆನಿಸ್ ಡೆಸಾ ಸ್ವಾಗತಿಸಿ, ಪ್ರಾಸ್ತಾವಿಕ ಮಾತುಗಳನ್ನಾಡಿದರು. ಸಂದೇಶ ಫೌಂಡೇಶನ್ ನಿರ್ದೇಶಕರಾದ ಫಾ.ಸುದೀಪ್ ಪೌಲ್, ಕೆಪಿಎಸ್ಸಿ ಸದಸ್ಯ ಡಾ. ರೊನಾಲ್ಡ್ ಅನಿಲ್ ಫೆರ್ನಾಂಡಿಸ್, ವಾರ್ತಾ ಇಲಾಖೆಯ ಸಹಾಯಕ ಆಯುಕ್ತೆ ರೋಹಿಣಿ ಉಪಸ್ಥಿತರಿದ್ದರು.

ಸಂಪನ್ಮೂಲ ವ್ಯಕ್ತಿಗಳಾದ ಫಾ.ಸುದೀಪ್ ಪೌಲ್ ಪ್ರಸ್ತುತ ಕಾಲಘಟ್ಟದಲ್ಲಿ ಚರ್ಚ್ ಮತ್ತು ಮಾಧ್ಯಮದ ಸಂಬಂಧದ ಕುರಿತು, ಕೆಪಿಎಸ್ಸಿ ಸದಸ್ಯ ರೊನಾಲ್ಡ್ ಅನಿಲ್ ಫೆರ್ನಾಂಡಿಸ್ ಚರ್ಚ್ ಮತ್ತು ಮುದ್ರಣ ಮಾಧ್ಯಮದ ಕುರಿತಾಗಿ, ದಾಯ್ಜಿವರ್ಲ್ಡ್ ಮಾಧ್ಯಮದ ಸಂಸ್ಥಾಪಕ ವಾಲ್ಟರ್ ನಂದಳಿಕೆ ಚರ್ಚ್ ಮತ್ತು ವೆಬ್-ಸೋಷಿಯಲ್ ಮೀಡಿಯಾ ಕುರಿತು ಮತ್ತು ಟಿವಿ 9 ಗ್ರೂಪ್ನ್ ನಿರ್ದೇಶಕ  ಕ್ಲಿಫರ್ಡ್ ಪಿರೇರಾ ಚರ್ಚ್ ಮತ್ತು ದೃಶ್ಯ ಮಾಧ್ಯಮದ ಕುರಿತಾಗಿ ಉಪನ್ಯಾಸ ನೀಡಿದರು.

ಸಮಾರೋಪ ಸಮಾರಂಭ: ಸಮಾರೋಪ ಸಮಾರಂಭದ ಅಧ್ಯಕ್ಷತೆಯನ್ನು ಉಡುಪಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷ ಅ.ವಂ. ಡಾ.ಜೆರಾಲ್ಡ್ ಐಸಾಕ್ ಲೋಬೊ ವಹಿಸಿದ್ದರು.

ಮುಖ್ಯ ಅತಿಥಿ ಸಿಗ್ನಿಸ್ ಇಂಡಿಯಾ ಅಧ್ಯಕ್ಷ ವಂ.ಫಾದರ್ ವಿಕ್ಟರ್ ವಿಜಯ್ ಲೋಬೋ, ಕಲ್ಯಾಣಪುರ ಮಿಲಾಗ್ರಿಸ್ ಕೆಥೆದ್ರಲ್‌ನ ರೆಕ್ಟರ್ ಫಾ.ವಲೇರಿಯನ್ ಮೆಂಡೋನ್ಸಾ ಮಾತನಾಡಿದರು.

ಈ ಸಂದರ್ಭದಲ್ಲಿ ಉಜ್ವಾಡ್ ಪಾಕ್ಷಿಕದ ಸಂಪಾದಕ ವಂ.ಫಾ.ರೊಯ್ಸನ್ ಫೆರ್ನಾಂಡಿಸ್ ಅವರ ಸಣ್ಣ ಕಥೆಗಳ ಚೊಚ್ಚಲ ಪುಸ್ತಕ ಪಯ್ಲಿ ಭೆಟ್’ ಕೃತಿ ಬಿಡುಗಡೆಗೊಂಡಿತು. ವಂ.ಫಾ.ಆಲ್ವಿನ್ ಸಿಕ್ವೇರಾ ಮತ್ತು ಜೋಶಿತಾ ಮಿನೇಜಸ್ ಕಾರ್ಯಕ್ರಮ ನಿರ್ವಹಿಸಿದರು. ಫಾ.ರೊಯ್ಸನ್ ಫೆರ್ನಾಂಡಿಸ್ ವಂದಿಸಿದರು.