ಕ್ಷಿಪ್ರ ವೇಗದಲ್ಲಿ ಉಲ್ಬಣಿಸುತ್ತಿರುವ ಹಕ್ಕಿಜ್ವರ : ಆರೋಗ್ಯತಜ್ಞರ ಕಳವಳ

ಪ್ಯಾರಿಸ್: ಜಾಗತಿಕ ಮಟ್ಟದಲ್ಲಿ ಏವಿಯನ್ ಇನ್ಫ್ಲೂಯೆಂಜಾ ಅಥವಾ ಹಕ್ಕಿಜ್ವರದ ಪ್ರಕರಣ ತೀವ್ರಗತಿಯಲ್ಲಿ ಉಲ್ಬಣಗೊಳ್ಳುತ್ತಿದ್ದು ದೇಶಗಳು ಕೋಳಿಗಳಿಗೆ ಲಸಿಕೆ ಹಾಕಲು ಅಗತ್ಯ ಕ್ರಮ ಕೈಗೊಳ್ಳಬೇಕು ಎಂದು ಆರೋಗ್ಯತಜ್ಞರು ಎಚ್ಚರಿಸಿದ್ದಾರೆ.

ಸಸ್ತನಿಗಳಲ್ಲಿ ಹಕ್ಕಿಜ್ವರದ ಪ್ರಕರಣ ಹೆಚ್ಚುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ. ಆದರೆ ಈ ಸೋಂಕು ಮನುಷ್ಯರಿಗೆ ಹರಡುವ ಅಪಾಯ ಕಡಿಮೆ ಎಂದು ಆರೋಗ್ಯತಜ್ಞರು ಹೇಳಿದ್ದಾರೆ. ‘1996ರಲ್ಲಿ ಮೊದಲ ಬಾರಿಗೆ ಕಾಣಸಿಕೊಂಡಿದ್ದ ಈ ಸೋಂಕು ಈ ಹಿಂದೆ ಕಾಲೋಚಿತ ಸೋಂಕು ಆಗಿತ್ತು. ಆದರೆ 2021ರ ಮಧ್ಯಭಾಗದಲ್ಲಿ ವೈರಸ್ಗಳ ಗುಂಪು ಹೆಚ್ಚು ಸಾಂಕ್ರಾಮಿಕಗೊಂಡಿತು.

 ಅಂದಿನಿಂದ ಏಕಾಏಕಿ ವರ್ಷಪೂರ್ತಿ ಕಾಣಿಸಿಕೊಂಡು ಹೊಸ ಪ್ರದೇಶಗಳಿಗೆ ಹರಡಿತು ಮತ್ತು ಕಾಡುಪಕ್ಷಿಗಳ ಸಾಮೂಹಿಕ ಸಾವಿಗೆ ಕಾರಣವಾಯಿತು ಎಂದು ಪ್ರಾಣಿಗಳಲ್ಲಿ ಸೋಂಕನ್ನು ಅಧ್ಯಯನ ಮಾಡುವ ವಿಶ್ವ ಆರೋಗ್ಯಕೇಂದ್ರದ ಸಹಸಂಸ್ಥೆಯ ಸಹಸಂಸ್ಥೆಯ ಅಧ್ಯಕ್ಷ ರಿಚರ್ಡ್ ವೆಬಿ ಹೇಳಿದ್ದಾರೆ.

ಆದರೆ ಮಾನವರಿಗೆ ಅಪಾಯದ ಪ್ರಮಾಣ ಕಡಿಮೆಯಾಗಿದ್ದರೂ ಸೋಂಕು ತೀವ್ರಗತಿಯಲ್ಲಿ ಬದಲಾಗುತ್ತಿದೆ ಎಂಬುದನ್ನು ಮರೆಯಬಾರದು. ಇತ್ತೀಚಿನ ದಿನಗಳಲ್ಲಿ ಸಸ್ತನಿಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ವೈರಸ್ ಪತ್ತೆಯಾಗಿರುವುದು ಅತ್ಯಂತ ಗಮನಾರ್ಹವಾಗಿದೆ. ಕಳೆದ ವಾರ ಚಿಲಿಯಲ್ಲಿ ಸುಮಾರು 9 ಸಾವಿರ ಸಮುದ್ರಸಿಂಹಗಳು, ಪೆಂಗ್ವಿನ್ ಗಳು, ನೀರು ನಾಯಿಗಳು, ಡಾಲ್ಫಿನ್ ಗಳು, ಸಮುದ್ರಹಂದಿಗಳು ಹಕ್ಕಿಜ್ವರದಿಂದ ಸಾವನ್ನಪ್ಪಿವೆ ಎಂದು ವೆಬಿ ಹೇಳಿದ್ದಾರೆ.

ಹಕ್ಕಿಜ್ವರವನ್ನು ನಿಯಂತ್ರಿಸುವ ಮತ್ತು ಅದು ಮಾನವನಿಗೆ ಹರಡುವ ಅಪಾಯವನ್ನು ಕಡಿಮೆಗೊಳಿಸುವ ಸರಳ ವಿಧಾನವೆಂದರೆ ಹಕ್ಕಿಗಳಿಗೆ, ಕೋಳಿಗಳಿಗೆ ಲಸಿಕೆ ನೀಡುವುದಾಗಿದೆ. ಈ ಬಗ್ಗೆ ಎಲ್ಲಾ ದೇಶಗಳೂ ಆದ್ಯತೆ ನೀಡಬೇಕಾಗಿದೆ ಎಂದು ಪ್ರಾಣಿಗಳ ಆರೋಗ್ಯಕ್ಕೆ ಸಂಬಂಧಿಸಿದ ವಿಶ್ವ ಸಂಘಟನೆಯ ಪ್ರಧಾನ ಕಾರ್ಯದರ್ಶಿ ಮೋನಿಕಾ ಎಲಾಯಿಟ್ ಆಗ್ರಹಿಸಿದ್ದಾರೆ.