ಬ್ರಿಟನ್: ಅಕ್ರಮ ವಲಸಿಗರಿಗೆ ಹಡಗಿನಲ್ಲಿ ವಾಸ್ತವ್ಯ ಯೋಜನೆ ಪ್ರಕಟಿಸಿದ ರಿಶಿ ಸುನಕ್

ಲಂಡನ್,ಜೂ.5: ಬ್ರಿಟನ್ನ ಕರಾವಳಿಗೆ  ದೋಣಿಗಳ ಮೂಲಕ ಅಕ್ರಮ ವಲಸಿಗರ ಆಗಮನವನ್ನು ತಡೆಯುವ ತನ್ನ ಯೋಜನೆಯನ್ನು  ರಿಶಿ ಸುನಕ್ ಸೋಮವಾರ ಪ್ರಕಟಿಸಿದ್ದಾರೆ.  ತೆರಿಗೆಪಾವತಿದಾರರ ಹಣದಿಂದ ಅಕ್ರಮ ವಲಸಿಗರಿಗೆ ಹೊಟೇಲ್  ಗಳಲ್ಲಿ ಅಶ್ರಯ ಒದಗಿಸುವ ಬದಲು ಅವರಿಗೆ ಹಡಗುಗಳಲ್ಲಿ ವಾಸ್ತವ್ಯಕ್ಕೆ ಏರ್ಪಾಡು ಮಾಡಲಾಗುವುದೆಂದು ಅವರು ಹೇಳಿದ್ದಾರೆ.

ಬ್ರಿಟನ್ ನ ಗಡಿ ಭಾಗದ ಪಟ್ಟಣವಾದ ಕೆಂಟ್ ನಲ್ಲಿ ಮಂಗಳವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಾ , ಅಕ್ರಮ ವಲಸಿಗರಿಗೆ  ವಾಸ್ತವ್ಯಕ್ಕಾಗಿ ಮೊದಲ ಹಡಗೊಂದು ತಿಂಗಳಾಂತ್ಯದಲ್ಲಿ ಸಿದ್ಧವಾಗಲಿದೆ. ಅದರಲ್ಲಿ 1 ಸಾವಿರಕ್ಕೂ ಅಧಿಕ ವಲಸಿಗರಿಗೆ ಶೀಘ್ರದಲ್ಲೇ ಅದರಲ್ಲಿ   ಆಶ್ರಯ ಒದಗಿಸಲಿದ್ದೇವೆ ಎಂದರು.

‘‘ಬ್ರಿಟನ್ ಸಂಸತ್ ನ ಕೆಳಮನೆ (ಹೌಸ್ ಆಫ್ ಕಾಮನ್ಸ್)ಯಲ್ಲಿ  ಅಕ್ರಮ ವಲಸಿಗರ ವಿಧೇಯಕವು ಅಂಗೀಕಾರಗೊಂಡಿದೆ . ದೇಶವನ್ನು ಅಕ್ರಮವಾಗಿ ಪ್ರವೇಶಿಸುವವರನ್ನು ಬಂಧಿಸಲು ಹಾಗೂ ಗಡಿಪಾರು ಮಾಡುವ ಹಕ್ಕನ್ನು ಈ ವಿಧೇಯಕವು ಸರಕಾರಕ್ಕೆ ನೀಡುತ್ತದೆ ’’ಎಂದು ಸುನಕ್ ಹೇಳಿದರು.

‘‘ ಅಕ್ರಮ ವಲಸಿಗರನ್ನು ಹೊಟೇಲ್ ಗಳಿಂದ ಹೊರತಂದು, ಅವರನ್ನು ಸೇನಾ ಸೌಕರ್ಯಗಳು ಸೇರಿದಂತೆ ಇತರ ಪರ್ಯಾಯ ಸ್ಥಳಗಳಿಗೆ ವರ್ಗಾಯಿಸಲಿದ್ದೇವೆ’’ ಎಂದರು.

ಬಿಬ್ಬಿ ಸ್ಟಾಕ್ಹೋಮ್  ಆಕ್ರಮ ವಲಸಿಗರಿಗೆ ಆಶ್ರಯ ನೀಡಲಿರುವ ಮೊದಲ ಹಡಗಾಗಿದ್ದು ಅದು ಪೋರ್ಟ್‌ಲ್ಯಾಂಡ್‌ ನಲ್ಲಿ  ಲಂಗರು ಹಾಕಲಿದೆ. 200 ಹಾಸಿಗೆಗಳು, ಮೂರು ಮಹಡಿಗಳಿರುವ ಈ ಹಡಗಿನಲ್ಲಿ ಸುಮಾರು 500 ವಲಸಿಗರಿಗೆ ಆಶ್ರಯ ನೀಡಬಹುದಾಗಿದೆ’’ ಎಂದು ಸುನಕ್ ಹೇಳಿರರು.

ಸುರಕ್ಷಿತ ರಾಷ್ಟ್ರಗಳಿಂದ ವಲಸೆ ಬರುವ ಜನರಿಂದಾಗಿಯೇ  ಬ್ರಿಟನ್ನ ‘ ವಲಸಿಗರಿಗೆ ಆಶ್ರಯ ವ್ಯವಸ್ಥೆ ’ ತುಂಬಿತುಳುಕುತ್ತಿದೆ.  ಇದರಿಂದಾಗಿ ನಿಜಕ್ಕೂ ಆಶ್ರಯದ ಅತ್ಯಂತ ಅಗತ್ಯವಿರುವವರಿಗೆ ನೆರವಾಗುವ ಸರಕಾರದ ಸಾಮರ್ಥ್ಯದ ಮೇಲೆ ಪ್ರತಿಕೂಲ ಪರಿಣಾಮವುಂಟಾಗುತ್ತಿದೆ. ಅಕ್ರಮ ವಲಸಿಗರ ವಸತಿಗಾಗಿ ಸರಕಾರವು ದಿನಕ್ಕೆ 6 ಲಕ್ಷ ಡಾಲರ್ನಷ್ಟು ತೆರಿಗೆಪಾವತಿದಾರರ ಹಣವನ್ನು ಖರ್ಚು ಮಾಡುತ್ತಿದೆಯಂದು ಸುನಕ್ ಹೇಳಿದರು.