ಹಿರಿಯ ನಟ ಕಝಾನ್ ಖಾನ್ ಹೃದಯಾಘಾತದಿಂದ ನಿಧನ

ಚೆನ್ನೈ: ಹಿರಿಯ ನಟ ಕಝಾನ್ ಖಾನ್ ಹೃದಯಾಘಾತದಿಂದ ನಿಧನರಾಗಿದ್ದಾರೆ. ಪ್ರೊಡಕ್ಷನ್ ಕಂಟ್ರೋಲರ್ ಮತ್ತು ನಿರ್ಮಾಪಕ ಎನ್‌.ಎಂ. ಬಾದುಷಾ ತಮ್ಮ ಫೇಸ್‌ಬುಕ್ ಮೂಲಕ ನಟನ ಸಾವಿನ ಸುದ್ದಿಯನ್ನು ಖಚಿತಪಡಿಸಿದ್ದಾರೆ. 

ಕಝಾನ್ ಖಾನ್ ಅವರ ನಿಧನವು ಮಲಯಾಳಂ, ತಮಿಳು ಹಾಗೂ  ಕನ್ನಡ ಚಿತ್ರರಂಗಗಳಿಗೆ  ದೊಡ್ಡ ಆಘಾತವನ್ನುಂಟು ಮಾಡಿದೆ.

ಕಝಾನ್ ಖಾನ್ ಚಲನಚಿತ್ರಗಳಲ್ಲಿ ಖಳನಾಯಕನ ಪಾತ್ರದ ಮೂಲಕ  ಜನಪ್ರಿಯರಾಗಿದ್ದರು. ಮಮ್ಮುಟ್ಟಿಯ ‘ದಿ ಕಿಂಗ್‌’ ಚಿತ್ರದಲ್ಲಿ ವಿಕ್ರಮ್ ಘೋರ್ಪಡೆ ಪಾತ್ರವನ್ನು ನಿರ್ವಹಿಸಿದ ನಂತರ ಅವರು ಮಾಲಿವುಡ್‌ನಲ್ಲಿ ಖ್ಯಾತಿಯನ್ನು ಗಳಿಸಿದ್ದರು.

ಕಝಾನ್  ಖಾನ್ 1992 ರಲ್ಲಿ ಸೆಂತಮಿಝ್  ಪಾಟ್ಟು ಚಿತ್ರದಲ್ಲಿ ಬೂಪತಿಯಾಗಿ ಪಾದಾರ್ಪಣೆ ಮಾಡಿದರು. ತಮಿಳು ಚಿತ್ರಗಳಾದ ಕಲೈಜ್ಞಾನ್, ಸೇತುಪತಿ ಐಪಿಎಸ್, ಡ್ಯುಯೆಟ್, ಮುರೈ ಮಾಮನ್, ಆನಾಜಗನ್ ಹಾಗೂ  ಕರುಪ್ಪು ನಿಲಾ ಮುಂತಾದ ಚಿತ್ರಗಳಲ್ಲಿ  ನಟಿಸುವ ಮೂಲಕ ಖ್ಯಾತಿಯನ್ನು ಪಡೆದರು. 1995 ರಲ್ಲಿ, ಅವರು ಶಾಜಿ ಕೈಲಾಸ್ ಅವರ ದಿ ಕಿಂಗ್ ಮೂಲಕ ಮಲಯಾಳಂಗೆ ಪಾದಾರ್ಪಣೆ ಮಾಡಿದರು.

ಖಾನ್  ಅವರು ತಮಿಳು, ಮಲಯಾಳಂ ಮತ್ತು ಕನ್ನಡ ಚಿತ್ರಗಳಲ್ಲಿ 50 ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರೆ.