ಲಿಯೊನೆಲ್ ಮೆಸ್ಸಿಯನ್ನು ವಶಕ್ಕೆ ಪಡೆದ ಚೀನಾ ಪೊಲೀಸರು: ವರದಿ

ಬೀಜಿಂಗ್: ಅರ್ಜೆಂಟೀನದ ಸ್ಟಾರ್ ಫುಟ್ಬಾಲ್ ಆಟಗಾರ ಲಿಯೊನೆಲ್ ಮೆಸ್ಸಿ ಅವರನ್ನು ಚೀನಾ ಪೊಲೀಸರು ಸೋಮವಾರ ಬೀಜಿಂಗ್ ವಿಮಾನ ನಿಲ್ದಾಣದಲ್ಲಿ ವಶಕ್ಕೆ ಪಡೆದಿದ್ದಾರೆ ಎಂದು ವರದಿಯಾಗಿದೆ.

ಜೂನ್ 15 ರಂದು ಬೀಜಿಂಗ್‌ನ ವರ್ಕರ್ಸ್ ಸ್ಟೇಡಿಯಂನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೌಹಾರ್ದ ಪಂದ್ಯವನ್ನು ಆಡಲಿರುವ ಮೆಸ್ಸಿ ಅವರನ್ನು ಪಾಸ್‌ಪೋರ್ಟ್ ಹಾಗೂ ವೀಸಾ ವಿಚಾರಗಳಿಗಾಗಿ ವಿಮಾನ ನಿಲ್ದಾಣದಲ್ಲಿ ಸ್ವಲ್ಪ ಸಮಯ ನಿಲ್ಲಿಸಿದ್ದರಿಂದ ಮುಜುಗರದ ಸನ್ನಿವೇಶ ಎದುರಿಸುವಂತಾಯಿತು.

ಮಾಧ್ಯಮ ವರದಿಗಳ ಪ್ರಕಾರ, ಮೆಸ್ಸಿ ತನ್ನ ಅರ್ಜೆಂಟೀನದ ಪಾಸ್‌ಪೋರ್ಟ್ ಬದಲಿಗೆ ತನ್ನ ಸ್ಪ್ಯಾನಿಷ್ ಪಾಸ್‌ಪೋರ್ಟ್ ಅನ್ನು ಹೊಂದಿದ್ದರು. ಆದರೆ ಮೆಸ್ಸಿ ಅವರಲ್ಲಿ ಮಾನ್ಯವಾದ ಚೀನಿ ವೀಸಾ ಇರಲಿಲ್ಲ. ಸ್ಪ್ಯಾನಿಷ್ ಪಾಸ್‌ಪೋರ್ಟ್ ಚೀನಾಕ್ಕೆ ವೀಸಾ-ಮುಕ್ತ ಪ್ರವೇಶವನ್ನು ಹೊಂದಿಲ್ಲ, ಆದರೆ ಸ್ಪಾನಿಷ್ ಪ್ರಜೆಗಳು ವೀಸಾ ಇಲ್ಲದೆ ತೈವಾನ್‌ಗೆ ಪ್ರವೇಶಿಸಬಹುದು. ತೈವಾನ್ ಚೀನಾದ ಭಾಗವಾಗಿದೆ ಎಂದು ಮೆಸ್ಸಿ ತಪ್ಪು ಭಾವಿಸಿದ್ದರು. ಹೀಗಾಗಿ ಅವರು ಚೀನಾದ ವೀಸಾಗೆ ಅರ್ಜಿ ಸಲ್ಲಿಸಲಿಲ್ಲ.

ಸುಮಾರು 30 ನಿಮಿಷಗಳ ಚರ್ಚೆಯ ನಂತರ ಸಮಸ್ಯೆಯನ್ನು ಪರಿಹರಿಸಲಾಯಿತು ಹಾಗೂ ಮೆಸ್ಸಿ ತ್ವರಿತ ವೀಸಾವನ್ನು ಪಡೆದರು. ಇದು ಅವರಿಗೆ ಸೌಹಾರ್ದ ಪಂದ್ಯ ಆಡಲು ಸಾಧ್ಯವಾಗಿಸಿದೆ.

ಲಿಯೊನೆಲ್ ಮೆಸ್ಸಿ ನಾಯಕತ್ವದ ಅರ್ಜೆಂಟೀನ ಗುರುವಾರ ಚೀನಾದ ರಾಜಧಾನಿಯಲ್ಲಿ ಆಸ್ಟ್ರೇಲಿಯಾವನ್ನು ಎದುರಿಸಲಿದೆ. ನಂತರ ಅವರು ಜೂನ್ 19 ರಂದು ಜಕಾರ್ತದ ಗೆಲೋರಾ ಬಂಗ್ ಕಾರ್ನೋ ಸ್ಪೋರ್ಟ್ಸ್‌ನಲ್ಲಿ ಇಂಡೋನೇಶ್ಯವನ್ನು ಎದುರಿಸಲಿದ್ದಾರೆ.