'ಮೈತೈ' ಜನರನ್ನು ರಕ್ಷಿಸಿ: ಮಿಜೋರಾಮ್ ಸಿಎಂಗೆ ಮಣಿಪುರ ಮುಖ್ಯಮಂತ್ರಿ ಮನವಿ

ಇಂಫಾಲ: ಮಣಿಪುರ ಮುಖ್ಯಮಂತ್ರಿ ಎನ್. ಬಿರೇನ್ ಸಿಂಗ್ ರವಿವಾರ ಮಿಜೋರಾಮ್ ಮುಖ್ಯಮಂತ್ರಿ ಝೊರಮ್ ಜೊತೆಗೆ ಮಾತನಾಡಿ, ಮಿಜೋರಾಮ್ ನಲ್ಲಿ ವಾಸಿಸುತ್ತಿರುವ  ಸಮುದಾಯದ ಜನರಿಗೆ ರಕ್ಷಣೆ ನೀಡುವಂತೆ ಕೋರಿದ್ದಾರೆ.

ಮಿಜೋರಾಮ್ ಮುಖ್ಯಮಂತ್ರಿಯೊಂದಿಗೆ ಫೋನ್ನಲ್ಲಿ ಮಾತನಾಡಿರುವ ಬಗ್ಗೆ ಮಣಿಪುರ ಮುಖ್ಯಮಂತ್ರಿ ಟ್ವೀಟ್ ಮಾಡಿದ್ದಾರೆ. ಆದರೆ, ಕುಕಿ ಸಮುದಾಯದ ಜನರಿಗೂ ರಕ್ಷಣೆ ನೀಡುವಂತೆ ತಾನು ಮನಿವಿ ಮಾಡಿದ್ದೇನೆಯೇ ಎನ್ನುವುದನ್ನು ಅವರು ತಿಳಿಸಿಲ್ಲ.

ಮಣಿಪುರದಲ್ಲಿ ಮೈತೈ ಮತ್ತು ಕುಕಿ ಬುಡಕಟ್ಟು ಜನರು ಸಂಘರ್ಷದಲ್ಲಿ ತೊಡಗಿದ್ದು, ರಾಜ್ಯವು ಮೇ 3ರಿಂದ ಹೊತ್ತಿ ಉರಿಯುತ್ತಿದೆ. ಹಿಂಸಾಚಾರದಲ್ಲಿ ಈವರೆಗೆ 100ಕ್ಕೂ ಅಧಿಕ ಮಂದಿ ಮೃತಪಟ್ಟಿದ್ದಾರೆ ಮತ್ತು 300ಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದಾರೆ. ಸಾವಿರಾರು ಮಂದಿ ನಿರ್ವಸಿತರಾಗಿದ್ದಾರೆ.

ಮಿಜೋರಾಮ್ ನಲ್ಲಿ, ಮೈತೈ ಮತ್ತು ಕುಕಿ ಎರಡೂ ಸಮುದಾಯಗಳಿಗೆ ಸೇರಿದ ಜನರು ಸಾಕಷ್ಟು ಸಂಖ್ಯೆಯಲ್ಲಿ ಮಿಜೋರಾಮ್ ನಲ್ಲಿದ್ದಾರೆ.

ಮಣಿಪುರದಲ್ಲಿ ಜನಾಂಗೀಯ ಹಿಂಸಾಚಾರ ಆರಂಭಗೊಂಡ ಬಳಿಕ, ಕುಕಿ ಸಮುದಾಯದ ಸುಮಾರು 10,000 ಜನರು ಮಿಜೋರಾಮ್ ನಲ್ಲಿ ಆಶ್ರಯ ಪಡೆದಿದ್ದಾರೆ.
ಮಿಜೋರಾಮ್ ಮುಖ್ಯಮಂತ್ರಿ ಝೊರಮ್ ತಂಗ ರವಿವಾರ ಟ್ವೀಟ್ ಮಾಡಿ, ನನ್ನ ಸರಕಾರ, ಜನರು ಮತ್ತು ಸರಕಾರೇತರ ಸಂಘಟನೆಗಳು ಮೈತೈ ಜನರ ಬಗ್ಗೆ ಸಹಾನುಭೂತಿ ಹೊಂದಿದ್ದಾರೆ ಎಂದು ಹೇಳಿದರು.

‘‘ಹಾಗಾಗಿ, ಮಿಜೋರಾಮ್ ನಲ್ಲಿ ವಾಸಿಸುತ್ತಿರುವ ಮೈತೈ ಸಮುದಾಯದ ಜನರ ಬಗ್ಗೆ, ಅವರು ಮಿಜೋರಾಮ್ ನಲ್ಲಿ ಇರುವವರೆಗೂ ನೀವು ಯಾವುದೇ ಚಿಂತೆ ಮಾಡಬೇಕಾಗಿಲ್ಲ. ನಾವು ಅವರ ಸುರಕ್ಷತೆ ಮತ್ತು ಭದ್ರತೆಯನ್ನು ನೋಡಿಕೊಳ್ಳುತ್ತೇವೆ’’ ಎಂದು ಅವರು ಬರೆದಿದ್ದಾರೆ.

ರವಿವಾರ ರಾತ್ರಿ ಹೊಸದಾಗಿ ನಡೆದ ಹಿಂಸಾಚಾರದಲ್ಲಿ, ಪಶ್ಚಿಮ ಇಂಫಾಲ ಜಿಲ್ಲೆಯಲ್ಲಿ ನಡೆದ ಗುಂಡಿನ ಚಕಮಕಿಯಲ್ಲಿ ಸೈನಿಕರೊಬ್ಬರು ಗಾಯಗೊಂಡಿದ್ದಾರೆ. ಮಣಿಪುರದಲ್ಲಿ ನಡೆಯುತ್ತಿರುವ ಹಿಂಸಾಚಾರದ ಬಗ್ಗೆ ವೌನ ವಹಿಸಿರುವುದಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿಯನ್ನು ಪ್ರತಿಪಕ್ಷಗಳು ಟೀಕಿಸಿವೆ.

ಬಿಜೆಪಿ ಶಾಸಕರು ದಿಲ್ಲಿಯಲ್ಲಿ ಈ ನಡುವೆ, ಮಣಿಪುರದ ಮೈತೈ ಸಮುದಾಯಕ್ಕೆ ಸೇರಿದ ಡಝನ್ಗಟ್ಟಳೆ ಬಿಜೆಪಿ ಶಾಸಕರು ಪ್ರಧಾನಿ ನರೇಂದ್ರ ಮೋದಿಯನ್ನು ಭೇಟಿಯಾಗುವುದಕ್ಕಾಗಿ ಕಳೆದ ಎರಡು ಮೂರು ದಿನಗಳಿಂದ ರಾಷ್ಟ್ರ ರಾಜಧಾನಿಗೆ ಹೋಗಿದ್ದಾರೆ. ಮಣಿಪುರ ಮುಖ್ಯಮಂತ್ರಿಯೂ ಈ ವಾರ ಹೊಸದಿಲ್ಲಿಗೆ ಹೋಗುವ ನಿರೀಕ್ಷೆಯಿದೆ.

ರಾಷ್ಟ್ರಪತಿ ಆಡಳಿತ ಹೇರುವಂತೆ ಮನವಿ ಈ ನಡುವೆ, ಮಣಿಪುರದಲ್ಲಿ ರಾಷ್ಟ್ರಪತಿ ಆಡಳಿತ ಹೇರುವಂತೆ ಮಿಜೋರಾಮ್ ನ ಏಕೈಕ ರಾಜ್ಯಸಭಾ ಸದಸ್ಯ ಹಾಗೂ ಆಡಳಿತಾರೂಢ ಮಿರೆ ನ್ಯಾಶನಲ್ ಫ್ರಂಟ್ ನ ಸದಸ್ಯ ಕೆ. ವನ್ಲವೇನ ಕೇಂದ್ರ ಸರಕಾರವನ್ನು ಒತ್ತಾಯಿಸಿದ್ದಾರೆ.

‘‘ಹಿಂಸಾಚಾರವು ಅತ್ಯಂತ ಸುದೀರ್ಘಾವಧಿಗೆ ಮುಂದುವರಿಯುತ್ತಿದೆ. ಬಿರೇನ್ ಸಿಂಗ್ ಸರಕಾರವನ್ನು ಕೆಳಗಿಳಿಸಲು ಇದೀಗ ಸರಿಯಾದ ಸಮಯ’’ ಎಂದು ಪತ್ರಿಕೆಯೊಂದಕ್ಕೆ ಸಂದರ್ಶನ ನೀಡಿದ ಅವರು ಅಭಿಪ್ರಾಯಪಟ್ಟಿದ್ದಾರೆ. ‘‘ಕೇಂದ್ರ ಸರಕಾರವು ಮಣಿಪುರದಲ್ಲಿ ರಾಷ್ಟ್ರಪತಿ ಆಡಳಿತವನ್ನು ಹೇರಬೇಕು. ರಾಜ್ಯದ ಕಾನೂನು ಮತ್ತು ವ್ಯವಸ್ಥೆಯ ಉಸ್ತುವಾರಿಯನ್ನು ಕೇಂದ್ರೀಯ ಪಡೆಗಳು ವಹಿಸಬೇಕು’’ ಎಂದು ಅವರು ಹೇಳಿದ್ದಾರೆ.