ನಿಮಗೆ ಟಾಯ್ಲೆಟ್‌ನಲ್ಲಿಯೂ ಫೋನ್ ಬಳಸುವ ಅಭ್ಯಾಸವಿದ್ದರೆ ಅದನ್ನು ಈಗಲೇ ನಿಲ್ಲಿಸಿ | Vartha Bharati- ವಾರ್ತಾ ಭಾರತಿ

--

ನಿಮಗೆ ಟಾಯ್ಲೆಟ್‌ನಲ್ಲಿಯೂ ಫೋನ್ ಬಳಸುವ ಅಭ್ಯಾಸವಿದ್ದರೆ ಅದನ್ನು ಈಗಲೇ ನಿಲ್ಲಿಸಿ

ಹಲವರು ಸಮಯವನ್ನು ಕೊಲ್ಲಲು ಟಾಯ್ಲೆಟ್‌ನಲ್ಲಿಯೂ ಫೋನ್‌ಗಳನ್ನು ಬಳಸುತ್ತಾರೆ. ಆದರೆ ಇದು ಸರಿಯೇ? ಸಾಮಾಜಿಕ ಮಾಧ್ಯಮಗಳಲ್ಲಿ ಏನಾಗುತ್ತಿದೆ ಎನ್ನುವುದನ್ನು ತಿಳಿಯಲು ಅಥವಾ ಸ್ನೇಹಿತರೊಂದಿಗೆ ಸಂಪರ್ಕದಲ್ಲಿರಲು ಬಹಳಷ್ಟು ಜನರು ಟಾಯ್ಲೆಟ್‌ಗೆ ಫೋನ್‌ನ್ನೂ ಒಯ್ಯುತ್ತಾರೆ. ಇಂತಹವರಲ್ಲಿ ನೀವೂ ಸೇರಿದ್ದರೆ ಫೋನ್ ಇಲ್ಲದ ಸಂದರ್ಭಕ್ಕೆ ಹೋಲಿಸಿದರೆ ಫೋನ್ ಜೊತೆಯಲ್ಲಿದ್ದಾಗ ನಿಮ್ಮ ದೈನಂದಿನ ಕರ್ಮಗಳನ್ನು ಮುಗಿಸಲು ನೀವು ಹೆಚ್ಚು ಸಮಯ ತೆಗೆದುಕೊಳ್ಳುತ್ತೀರಿ ಎನ್ನುವುದು ಎಂದಾದರೂ ನಿಮ್ಮ ಗಮನಕ್ಕೆ ಬಂದಿದೆಯೇ? ಇದು ಹಲವಾರು ಆರೋಗ್ಯ ಸಮಸ್ಯೆಗಳನ್ನುಂಟು ಮಾಡುವ ಕೆಟ್ಟ ಅಭ್ಯಾಸವಾಗಿದ್ದು,ಇದನ್ನು ನೀವು ತಕ್ಷಣವೇ ನಿಲ್ಲಿಸುವ ಅಗತ್ಯವಿದೆ. ಇದು ನಿಮ್ಮನ್ನು ಆಗಾಗ್ಗೆ ಅನಾರೋಗ್ಯಕ್ಕೆ ಗುರಿ ಮಾಡುವ,ನೀವು ಗಮನಿಸಿಯೇ ಇಲ್ಲದ ಆರೋಗ್ಯಕ್ಕೆ ಸಂಬಂಧಿಸಿದ ತಪ್ಪು ಎನ್ನುವುದರಲ್ಲಿ ಯಾವುದೇ ಶಂಕೆ ಬೇಡ. ಟಾಯ್ಲೆಟ್ ಸೀಟ್‌ನಲ್ಲಿ ಕುಳಿತುಕೊಂಡು ಮೊಬೈಲ್ ಬಳಸುವುದರ ದುಷ್ಪರಿಣಾಮಗಳ ಬಗ್ಗೆ ಮಾಹಿತಿಯಿಲ್ಲಿದೆ.......

►ಸೂಕ್ಷ್ಮಾಣುಜೀವಿಗಳ ವಾಹಕ

ನಿಮ್ಮ ಟಾಯ್ಲೆಟ್‌ನಲ್ಲಿ ಅಸಂಖ್ಯಾತ ರೋಗಕಾರಕ ಸೂಕ್ಷ್ಮಾಣುಜೀವಿಗಳಿರುತ್ತವೆ ಮತ್ತು ಅಲ್ಲಿ ಫೋನ್ ಬಳಸುವುದರಿಂದ ಅದು ಈ ರೋಗಕಾರಕಗಳ ವಾಹಕವಾಗುತ್ತದೆ ಎಂದು ನೀವೆಂದಾದರೂ ಆಲೋಚಿಸಿದ್ದೀರಾ? ನಂತರ ನೀವು ಫೋನ್‌ನ್ನು ಎಲ್ಲೆಲ್ಲಿ ಒಯ್ಯುತ್ತೀರೋ ಅಲ್ಲಿಗೆಲ್ಲ ಈ ರೋಗಕಾರಕ ಬ್ಯಾಕ್ಟೀರಿಯಾಗಳು ಮತ್ತು ಸೂಕ್ಷ್ಮಾಣುಜೀವಿಗಳೂ ನಿಮ್ಮಾಂದಿಗೇ ಸಾಗುತ್ತವೆ ಹಾಗೂ ನಿಮ್ಮೊಂದಿಗೆ ನೇರ ಸಂಪರ್ಕಕ್ಕೆ ಬರುವ ವಸ್ತುಗಳು ಮತ್ತು ಜನರಿಗೆ ರವಾನೆಯಾಗುತ್ತವೆ.

► ಮಲಬದ್ಧತೆ ಮತ್ತು ಮಲವಿಸರ್ಜನೆಯ ಕಷ್ಟ

ಮೊಬೈಲ್ ಬಳಕೆಯೊಂದಿಗೆ ಟಾಯ್ಲೆಟ್ ಸೀಟ್‌ನಲ್ಲಿ ತುಂಬ ಸಮಯ ಕಳೆಯುವುದನ್ನು ನಿಮ್ಮ ಶರೀರವು ರೂಢಿಸಿಕೊಳ್ಳುವುದರಿಂದ ಅದು ಮಲಬದ್ಧತೆಗೆ ಕಾರಣವಾಗಬಲ್ಲದು. ಇದರಿಂದಾಗಿ ಕಡಿಮೆ ಸಮಯದಲ್ಲಿ ಮಲವಿಸರ್ಜನೆಯ ಕಾರ್ಯವನ್ನು ಪೂರೈಸಲು ನಿಮಗೆ ಸಾಧ್ಯವಾಗುವುದಿಲ್ಲ ಮತ್ತು ಇದು ನಿಮ್ಮ ಜೀರ್ಣಾಂಗವನ್ನು ವ್ಯತ್ಯಯಗೊಳಿಸುತ್ತದೆ. ಅಲ್ಲದೆ ನೀವು ಮಲವಿಸರ್ಜನೆಗಿಂತ ಮೊಬೈಲ್ ವೀಕ್ಷಣೆಗೇ ಹೆಚ್ಚಿನ ಗಮನವನ್ನು ಕೇಂದ್ರೀಕರಿಸುವುದು ಹೆಚ್ಚು ಕಳವಳಕಾರಿಯಾಗುತ್ತದೆ. ಈ ಅಭ್ಯಾಸವು ಮಲವಿಸರ್ಜನೆಯ ನೈಸರ್ಗಿಕ ವಿದ್ಯಮಾನಕ್ಕೆ ವ್ಯತ್ಯಯವನ್ನುಂಟು ಮಾಡುತ್ತದೆ ಮತ್ತು ಮಲವು ಗಟ್ಟಿಯಾಗಿ ಕರುಳಿನಲ್ಲಿ ಸಿಕ್ಕಿಕೊಂಡು ‘ಫೀಕಲ್ ಇಂಪ್ಯಾಕ್ಷನ್ ’ನಿಂದ ನೀವು ನರಳುವುದಕ್ಕೆ ಕಾರಣವಾಗುತ್ತದೆ. ಅಂದ ಹಾಗೆ ಈ ಕೊರೋನ ವೈರಸ್ ಯುಗದಲ್ಲಿ ಟಾಯ್ಲೆಟ್‌ನ್ನು ಫ್ಲಷ್ ಮಾಡುವ ಮುನ್ನ ಮುಚ್ಚಳವನ್ನು ಹಾಕಲು ಮರೆಯಬೇಡಿ.

►ಬೇಧಿ ಮತ್ತು ಮೂತ್ರನಾಳ ಸೋಂಕು

 ಹೌದು,ಈ ಕೆಟ್ಟ ಅಭ್ಯಾಸ ನಿಮ್ಮನ್ನು ಮೂತ್ರನಾಳ ಸೋಂಕುಗಳಿಗೂ ಗುರಿಯಾಗಿಸಬಲ್ಲದು. ಟಾಯ್ಲೆಟ್ ಸೀಟ್,ಟಾಯ್ಲೆಟ್ ಪೇಪರ್ ಇತ್ಯಾದಿಗಳನ್ನು ಸ್ಪರ್ಶಿಸುವ ಮೂಲಕ ಸೂಕ್ಷ್ಮಾಣುಜೀವಿಗಳನ್ನು ಹೊತ್ತಿರುವ ಅದೇ ಕೈಗಳಿಂದ ನೀವು ಪೋನ್‌ನ್ನು ಬಳಸುತ್ತೀರಿ ಮತ್ತು ಈ ರೋಗಕಾರಕಗಳು ನಿಮ್ಮ ಫೋನ್‌ಗೆ ವರ್ಗಾವಣೆಗೊಳ್ಳುತ್ತವೆ. ಫೋನ್‌ನ್ನು ಸ್ಪರ್ಶಿಸಿದ ಬಳಿಕ ನೀವು ಏನನ್ನಾದರೂ ತಿಂದಾಗ ಈ ರೋಗಕಾರಕಗಳು ನಿಮ್ಮ ಶರೀರವನ್ನು ಪ್ರವೇಶಿಸುತ್ತವೆ ಮತ್ತು ಬೇಧಿ,ಜೀರ್ಣ ಸಮಸ್ಯೆ,ಕರುಳಿನ ರೋಗ ಹಾಗೂ ಮೂತ್ರನಾಳ ಸೋಂಕುಗಳನ್ನುಂಟು ಮಾಡುತ್ತವೆ. ಸ್ವಲ್ಪ ಈ ಬಗ್ಗೆ ಯೋಚಿಸಿ.

►ಮೂಲವ್ಯಾಧಿಗೆ ಆಹ್ವಾನ

ಮೂಲವ್ಯಾಧಿ ಗಂಭೀರ ಆರೋಗ್ಯ ಸಮಸ್ಯೆಯಾಗಿದೆ. ಟಾಯ್ಲೆಟ್‌ನಲ್ಲಿ ಫೋನ್ ಬಳಕೆ ನಿಮ್ಮನ್ನು ಮೂಲವ್ಯಾಧಿಗೆ ಗುರಿ ಮಾಡುತ್ತದೆ ಎನ್ನುವ ಕಟುಸತ್ಯ ನಿಮಗೆ ಆಘಾತವನ್ನುಂಟು ಮಾಡಬಹುದು. ಮಲವಿಸರ್ಜನೆಗೆ ಸುದೀರ್ಘ ಸಮಯ ನಿಮ್ಮ ಶರೀರಕ್ಕೆ ಅಭ್ಯಾಸವಾಗಿರುತ್ತದೆ ಮತ್ತು ಇದು ಗುದದ್ವಾರದ ಅಭಿಧಮನಿಗಳ ಮತ್ತು ಗುದನಾಳದ ಸುತ್ತ ಉರಿಯೂತಕ್ಕೆ ಕಾರಣವಾಗುತ್ತದೆ. ಮೂಲವ್ಯಾಧಿಯು ಗುದನಾಳ ರಕ್ತಸ್ರಾವಕ್ಕೂ ಕಾರಣವಾಗುತ್ತದೆ.

►ಮಿದುಳಿಗೆ ಒತ್ತಡ

ಟಾಯ್ಲೆಟ್ ಸಮಯವನ್ನು ‘ನಿಮ್ಮದೇ ’ ಸಮಯವನ್ನಾಗಿ ಬಳಸಿಕೊಳ್ಳಿ. ಅದು ವಿಶ್ರಾಂತಿಯ ಅವಧಿ ಎಂದು ಪರಿಗಣಿಸಿ ಮತ್ತು ನಿಮ್ಮ ಮಿದುಳಿಗೆ ವಿರಾಮವನ್ನು ನೀಡಿ. ನೀವು ಟಾಯ್ಲೆಟ್‌ಗೆ ಫೋನ್ ಒಯ್ದಾಗ ನಿಮ್ಮ ಮಿದುಳು ಕೂಡ ಕೆಲಸ ಮಾಡುತ್ತಿರುತ್ತದೆ ಮತ್ತು ಇದು ಆರೋಗ್ಯಕರ ಲಕ್ಷಣವಲ್ಲ. ಇದು ಅನಗತ್ಯ ಒತ್ತಡವನ್ನುಂಟು ಮಾಡುತ್ತದೆ ಮತ್ತು ನಿಮ್ಮ ಗಮನ ಹಾಗೂ ಏಕಾಗ್ರತೆಗೆ ವ್ಯತ್ಯಯವನ್ನುಂಟು ಮಾಡಬಹುದು.

ಟಾಯ್ಲೆಟ್‌ನಲ್ಲಿ ಫೋನ್ ಬಳಕೆಯಿಂದ ಈ ಆರೋಗ್ಯಾಪಾಯಗಳಲ್ಲದೆ ಇತರ ಹಲವಾರು ಅನಾನುಕೂಲಗಳೂ ಇವೆ. ಅದು ನೀವು ಟಾಯ್ಲೆಟ್‌ನಲ್ಲಿ ಅನಗತ್ಯವಾಗಿ ಸಮಯವನ್ನು ಕಳೆಯುವಂತೆ ಮಾಡುತ್ತದೆ. ಅದು ನಿಮ್ಮ ಮಿದುಳನ್ನು ಆವರಿಸಿಕೊಳ್ಳುತ್ತದೆ ಮತ್ತು ಮಾಹಿತಿಗಳ ಸಂಸ್ಕರಣೆಗೆ ವ್ಯತ್ಯಯಗಳನ್ನುಂಟು ಮಾಡುತ್ತದೆ. ಕೊನೆಯದಾಗಿ ನೀವು ಫೋನ್‌ನ್ನು ಕಮೋಡ್‌ನಲ್ಲಿ ಅಥವಾ ನೀರು ತುಂಬಿದ ಬಕೆಟ್‌ನಲ್ಲಿ ಬೀಳಿಸುವಂತೆ ಮಾಡಬಹುದು. ಹಲವಾರು ಜನರಿಗೆ ಇದರ ಅನುಭವವಾಗಿದೆ. ಹೀಗಾಗಿ ನಿಮ್ಮ ಆರೋಗ್ಯ ಮತ್ತು ಸುರಕ್ಷತೆಯ ದೃಷ್ಟಿಯಿಂದ ಟಾಯ್ಲೆಟ್‌ನಲ್ಲಿ ಪೋನ್ ಬಳಕೆಯನ್ನು ನಿವಾರಿಸುವುದು ಬುದ್ಧಿವಂತಿಕೆಯಾಗುತ್ತದೆ. 

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top