ಜಗತ್ತಿನಾದ್ಯಂತ ಕೊರೊನಾಗೆ 3,100 ಮಂದಿ ಬಲಿ
90,000 ಜನರಿಗೆ ಸೋಂಕು
ಬೀಜಿಂಗ್ (ಚೀನಾ), ಮಾ. 3: ಜಾಗತಿಕ ಮಟ್ಟದಲ್ಲಿ ಕೊರೋನವೈರಸ್ನಿಂದಾಗಿ ಸಂಭವಿಸಿದ ಸಾವುಗಳ ಸಂಖ್ಯೆ ಮಂಗಳವಾರ 3,100ನ್ನು ದಾಟಿದೆ ಹಾಗೂ ಸೊಂಕಿಗೆ ಒಳಗಾದವರ ಸಂಖ್ಯೆ 90,000ವನ್ನು ಮೀರಿದೆ.
ಮಾರಕ ವೈರಸ್ ಹರಡದಂತೆ ನೋಡಿಕೊಳ್ಳಲು ಚೀನಾವು ಹಲವು ನಗರಗಳಲ್ಲಿ ಬೀಗಮುದ್ರೆಯನ್ನು ಹೇರಿದೆ ಹಾಗೂ ವಾರಗಳ ಕಾಲ ಜನರ ಓಡಾಟವನ್ನು ನಿರ್ಬಂಧಿಸಲು ಕಠಿಣ ಕ್ರಮಗಳನ್ನು ತೆಗೆದುಕೊಂಡಿದೆ. ಈ ಕಠಿಣ ಕ್ರಮಗಳು ಫಲ ನೀಡಿದಂತೆ ಕಂಡುಬಂದಿವೆ. ದೇಶದಲ್ಲಿ ಹೊಸ ಸೋಂಕು ಪ್ರಕರಣಗಳ ಸಂಖ್ಯೆಯಲ್ಲಿ ಗಣನೀಯ ಇಳಿಕೆ ಕಂಡುಬಂದಿದೆ.
ಇಟಲಿ ಕೂಡ ಹಲವು ನಗರಗಳನ್ನು ಬೀಗಮುದ್ರೆಯಲ್ಲಿಟ್ಟಿದೆ. ಆದರೆ, ಇತರ ರಾಷ್ಟ್ರಗಳು ಬೃಹತ್ ಜನಸಮುದಾಯಗಳ ಮೇಲೆ ದಿಗ್ಬಂಧನಗಳನ್ನು ವಿಧಿಸಲು ಮುಂದಾಗಿಲ್ಲ. ಆದರೆ ಬೃಹತ್ ಸಭೆಗಳನ್ನು ಅವು ನಿಷೇಧಿಸಿವೆ, ಕ್ರೀಡಾಕೂಟಗಳನ್ನು ಮುಂದಕ್ಕೆ ಹಾಕಿವೆ ಹಾಗೂ ಸೋಂಕುಪೀಡಿತ ದೇಶಗಳಿಂದ ಜನರು ಬರುವುದನ್ನು ನಿಷೇಧಿಸಿವೆ.
Next Story