ಬಲಪ್ರಯೋಗಿಸಿ ಅಧಿಕಾರ ಪಡೆದರೆ ತಾಲಿಬಾನ್ ಗೆ ಮಾನ್ಯತೆ ಇಲ್ಲ: ಯುರೋಪಿಯನ್ ಯೂನಿಯನ್
ಕಾಬೂಲ್, ಆ.2: ಅಪಘಾನಿಸ್ತಾನದಲ್ಲಿ ಹಿಂಸಾಚಾರ ಮುಂದುವರಿದಿರುವಂತೆಯೇ, ತಾಲಿಬಾನ್ ಬಲಪ್ರಯೋಗಿಸಿ ಅಧಿಕಾರ ಪಡೆದರೆ ಅವರ ಆಡಳಿತಕ್ಕೆ ಯುರೋಪಿಯನ್ ಯೂನಿಯನ್ ಹಾಗೂ ಇತರ ದೇಶಗಳು ಮಾನ್ಯತೆ ನೀಡುವುದಿಲ್ಲ ಎಂದು ಯುರೋಪಿಯನ್ ಯೂನಿಯನ್ ಪುನರುಚ್ಚರಿಸಿದೆ.
ಅಪಘಾನಿಸ್ತಾನದ ಭದ್ರತಾ ಪರಿಸ್ಥಿತಿ ಆತಂಕಕಾರಿಯಾಗಿದೆ. ಅಪಘಾನಿಸ್ತಾನದ ವಿಷಯದಲ್ಲಿ ಸಾಧ್ಯವಾದಷ್ಟು ಮಟ್ಟಿಗೆ ಭಾಗಿಯಾಗಿರಲು ಪ್ರಯತ್ನಿಸುತ್ತೇವೆ ಮತ್ತು ಅಭಿವೃದ್ಧಿ ಕಾರ್ಯಕ್ಕೆ ನಮ್ಮ ನೆರವು ಮುಂದುವರಿಯಲಿದೆ. ರಾಜಕೀಯವಾಗಿಯೂ ನಾವು ಭಾಗಿಯಾಗುತ್ತೇವೆ ಎಂದು ಅಪಘಾನಿಸ್ತಾನದಲ್ಲಿ ಯುರೋಪಿಯನ್ ಯೂನಿಯನ್ ನಿಯೋಗದ ಮುಖ್ಯಸ್ಥ ಥಾಮಸ್ ನಿಕಲ್ಸನ್ ಹೇಳಿರುವುದಾಗಿ ‘ ದಿ ಅಪಘಾನಿಸ್ತಾನ್ ಟೈಮ್ಸ್’ ವರದಿ ಮಾಡಿದೆ.
ಮಾತುಕತೆ ಸಂದರ್ಭ ತಾಲಿಬಾನ್ನಿಂದ ಯಾವುದೇ ಪ್ರಸ್ತಾವನೆ ಬಂದಿಲ್ಲ. ಆದರೆ ಅವರು 1990ರಂತೆ, ಇಸ್ಲಾಮಿಕ್ ಎಮಿರೇಟ್ಸ್ನ ಸ್ಥಾಪನೆಯ ಪ್ರಸ್ತಾವನೆ ಅಥವಾ ಇಸ್ಲಾಮಿಕ್ ಎಮಿರೇಟ್ಸ್ ಕುರಿತಾದ ಯಾವುದೇ ಪ್ರಸ್ತಾವನೆ ಸ್ವೀಕಾರಾರ್ಹವಲ್ಲಎಂದು ನಿಕಲ್ಸನ್ ಸ್ಪಷ್ಟಪಡಿಸಿದ್ದಾರೆ.
ಈ ಮಧ್ಯೆ, ರವಿವಾರ ನಡೆದ ವರ್ಚುವಲ್ ಸಚಿವ ಸಂಪುಟ ಸಭೆಯಲ್ಲಿ ಮಾತನಾಡಿದ ಅಪಘಾನ್ ಅಧ್ಯಕ್ಷ ಅಶ್ರಫ್ ಘನಿ ‘ ಎರಡು ದಶಕಗಳಿಂದ ತಾಲಿಬಾನ್ ಮತ್ತಷ್ಟು ಕ್ರೂರ ಮತ್ತು ಕಠೋರವಾಗಿದೆ. ಅವರು ಬದಲಾಗಿದ್ದಾರೆ ಆದರೆ ಋಣಾತ್ಮಕವಾಗಿ. ಅವರಿಗೆ ಶಾಂತಿ, ಸಮೃದ್ಧಿ ಅಥವಾ ಪ್ರಗತಿಯ ಆಶಯವಿಲ್ಲ. ನಾವು ಶಾಂತಿ ಬಯಸುತ್ತೇವೆ, ಆದರೆ ಅವರು ಸರಕಾರ ಹಾಗೂ ಜನತೆ ಅವರ ನಿಯಂತ್ರಣದಲ್ಲಿರಬೇಕೆಂದು ಬಯಸುತ್ತಾರೆ’ ಎಂದಿದ್ದಾರೆ. ಈ ವರ್ಷದ ಆರಂಭದ 6 ತಿಂಗಳಲ್ಲಿ ಅಪಘಾನಿಸ್ತಾನದಲ್ಲಿ 1,677 ಜನತೆ ಸಾವನ್ನಪ್ಪಿದ್ದು 3,644 ಮಂದಿ ಗಾಯಗೊಂಡಿದ್ದು 2020ರ ಇದೇ ಅವಧಿಗೆ ಹೋಲಿಸಿದರೆ ಇದು 80%ರಷ್ಟು ಹೆಚ್ಚಳವಾಗಿದೆ ಎಂದು ಅಪಘಾನಿಸ್ತಾನ್ ಇಂಡಿಪೆಂಡೆಂಟ್ ಹ್ಯೂಮನ್ ರೈಟ್ಸ್ ಕಮಿಷನ್(ಎಐಎಚ್ಆರ್ಸಿ) ರವಿವಾರ ವರದಿ ಮಾಡಿದೆ.