ಚೀನಾದಿಂದ ಭದ್ರತೆಗೆ ಸವಾಲು : ನೇಟೊ ಘೋಷಣೆ
ಮ್ಯಾಡ್ರಿಡ್, ಜೂ.30: ಚೀನಾದ ಮಹಾತ್ವಾಂಕ್ಷೆ ಮತ್ತು ದಬ್ಬಾಳಿಕೆಯ ನೀತಿಯು ಪಾಶ್ಚಿಮಾತ್ಯ ಸಂಘಟನೆಯ ಹಿತಾಸಕ್ತಿ, ಭದ್ರತೆ ಮತ್ತು ಸಿದ್ಧಾಂತಗಳಿಗೆ ಬಹುದೊಡ್ಡ ಸವಾಲಾಗಿದೆ ಎಂದು ಘೋಷಿಸಿರುವ ನೇಟೊ, ಇದೇ ಪ್ರಥಮ ಬಾರಿಗೆ ಚೀನಾವನ್ನು ತನ್ನ ಕಾರ್ಯತಂತ್ರದ ಆದ್ಯತೆಯ ಪಟ್ಟಿಯಲ್ಲಿ ಸೇರಿಸಿದೆ.
ನೇಟೊ ಒಕ್ಕೂಟದ ಮುಂದಿನ ಒಂದು ದಶಕದ ಆದ್ಯತೆಗೆ ಸಂಬಂಧಿಸಿದ ಕಾರ್ಯತಂತ್ರದ ನೂತನ ಪರಿಕಲ್ಪನೆಯ ವಿವರವನ್ನು ಸ್ಪೇನ್ನ ಮ್ಯಾಡ್ರಿಡ್ನಲ್ಲಿ ನಡೆದ ಶೃಂಗಸಭೆಯಲ್ಲಿ ಅನುಮೋದಿಸಲಾಗಿದೆ. ಇದರಲ್ಲಿ ರಶ್ಯವನ್ನು ಕಟು ಶಬ್ದಗಳಲ್ಲಿ ಟೀಕಿಸಲಾಗಿದ್ದು , ರಶ್ಯವು ನೇಟೊದ ಶಾಂತಿ ಮತ್ತು ಭದ್ರತೆಗೆ ಅತ್ಯಂತ ಗಮನಾರ್ಹ ಮತ್ತು ನೇರ ಬೆದರಿಕೆಯಾಗಿದೆ ಎಂದು ಉಲ್ಲೇಖಿಸಲಾಗಿದೆ. ಆದರೆ, ಚೀನಾದ ಮಿಲಿಟರಿ ಮಹಾತ್ವಾಕಾಂಕ್ಷೆ, ತೈವಾನ್ ವಿಷಯದಲ್ಲಿ ಹೊಂದಿರುವ ಆಕ್ರಮಣಕಾರಿ ಧೋರಣೆ ಮತ್ತು ರಶ್ಯದ ಜತೆಗಿನ ನಿಕಟ ಬಾಂಧವ್ಯವು ನೇಟೊಗೆ ವ್ಯವಸ್ಥಿತ ಸವಾಲುಗಳನ್ನು ಒಡ್ಡಿದೆ ಎಂದಿದೆ.
ಚೀನಾವು ಪರಮಾಣು ಶಸ್ತ್ರಾಸ್ತ್ರ ಸೇರಿದಂತೆ ತನ್ನ ಪಡೆಯನ್ನು ಗಣನೀಯವಾಗಿ ಹೆಚ್ಚಿಸಿಕೊಳ್ಳುತ್ತಿದೆ, ನೆರೆಯ ದೇಶಗಳನ್ನು ಬೆದರಿಸುವುದು, ತೈವಾನ್ಗೆ ಬೆದರಿಕೆ ಹಾಕುತ್ತಿದೆ, ಆಧುನಿಕ ತಂತ್ರಜ್ಞಾನ ಬಳಸಿಕೊಂಡು ತನ್ನದೇ ನಾಗರಿಕರ ವಿರುದ್ಧ ಗೂಢಚರ್ಯೆ ಮಾಡುತ್ತಿದೆ ಮತ್ತು ರಶ್ಯದ ಸುಳ್ಳು ಹಾಗೂ ತಪ್ಪು ಮಾಹಿತಿ ಪ್ರಸಾರ ಮಾಡುತ್ತಿದೆ ಎಂದು ನೇಟೊದ ಪ್ರಧಾನ ಕಾರ್ಯದರ್ಶಿ ಜೆನ್ಸ್ ಸ್ಟಾಲ್ಟನ್ಬರ್ಗ್ ಸುದ್ಧಿಗೋಷ್ಟಿಯಲ್ಲಿ ಹೇಳಿದ್ದಾರೆ. ಚೀನಾ ನಮ್ಮ ಎದುರಾಳಿ ಅಲ್ಲ, ಆದರೆ ಅದು ಪ್ರತಿನಿಧಿಸುವ ಗಂಭೀರ ಸವಾಲುಗಳ ಬಗ್ಗೆ ನಾವು ಸ್ಪಷ್ಟವಾಗಿರಬೇಕು ಎಂದವರು ಇದೇ ಸಂದರ್ಭ ಸ್ಪಷ್ಟಪಡಿಸಿದ್ದಾರೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ಚೀನಾ, ಇದೊಂದು ನಿರರ್ಥಕ ಎಚ್ಚರಿಕೆಯಾಗಿದೆ. ನೇಟೊದ ಘೋಷಣೆಯನ್ನು ತಾನು ದೃಢವಾಗಿ ವಿರೋಧಿಸುವುದಾಗಿ ಹೇಳಿದೆ. ನೇಟೊದ ತಥಾಕಥಿತ ನೂತನ ಕಾರ್ಯತಂತ್ರದ ಪರಿಕಲ್ಪನೆಯು ವಾಸ್ತವಾಂಶವನ್ನು ಕಡೆಗಣಿಸಿದ್ದು ಕಪ್ಪು-ಬಿಳಿಯ ಬಗ್ಗೆ ಗೊಂದಲ ಹೊಂದಿದೆ. ಮತ್ತು ಚೀನಾದ ವಿದೇಶಾಂಗ ನೀತಿಯ ಬಗ್ಗೆ ಮಸಿ ಬಳಿದಿದೆ ಎಂದು ವಿದೇಶಾಂಗ ಸಚಿವಾಲಯದ ವಕ್ತಾರ ಝಾವೊ ಲಿಜಿಯನ್ ಪ್ರತಿಕ್ರಿಯಿಸಿದ್ದಾರೆ.
ಚೀನಾ ಮಾಡುತ್ತಿರುವ ಕೆಲಸವೆಂದರೆ, ನಾವು ಅನುಸರಿಸುವ, ವಿಶ್ವಾಸ ಇರಿಸಿರುವ, ನಾವು ನಿರ್ಮಿಸಲು ಸಹಾಯ ಮಾಡಿದ ನಿಯಮಗಳ ಆಧಾರಿತ ಅಂತರಾಷ್ಟ್ರೀಯ ವ್ಯವಸ್ಥೆಯನ್ನು ದುರ್ಬಲಗೊಳಿಸಲು ಪ್ರಯತ್ನಿಸುವುದು. ಹೀಗೆ ಚೀನಾ ಒಂದಲ್ಲ ಒಂದು ರೀತಿ ಸವಾಲೆಸೆಯುವುದನ್ನು ಮುಂದುವರಿಸಿದರೆ ಅದರ ವಿರುದ್ಧ ನಾವು ನಿಲ್ಲುತ್ತೇವೆ ಎಂದು ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಆ್ಯಂಟನಿ ಬ್ಲಿಂಕೆನ್ ಹೇಳಿದ್ದಾರೆ.