ಪಾಕಿಸ್ತಾನ ಸಂಯೋಜಿತ ಯುರೇನಿಯಂ ಸರಕು ಲಂಡನ್ ವಿಮಾನ ನಿಲ್ದಾಣದಲ್ಲಿ ಜಫ್ತಿ: ವರದಿ

ಲಂಡನ್, ಜ.12: `ಡರ್ಟಿ ಬಾಂಬ್' ತಯಾರಿಸಲು ಬಳಸಬಹುದಾದ ಹಲವಾರು ಕಿ.ಗ್ರಾಂನಷ್ಟು ಯುರೇನಿಯಂ ಅನ್ನು ಒಳಗೊಂಡಿರುವ ಸಾಗಣೆಯನ್ನು ಲಂಡನ್ ನ ಹೀಥ್ರೂ ವಿಮಾನನಿಲ್ದಾಣದಲ್ಲಿ ಪಾಕಿಸ್ತಾನದಿಂದ ಬಂದ ಸರಕು ರವಾನೆಯಲ್ಲಿ ವಶಪಡಿಸಿಕೊಳ್ಳಲಾಗಿದೆ ಎಂದು `ದಿ ಸನ್' ವರದಿ ಮಾಡಿದೆ.

ಒಮಾನ್ ನಿಂದ ಬಂದ ವಿಮಾನದಲ್ಲಿ ಇದು ಪತ್ತೆಯಾಗಿದ್ದು ಪಾಕಿಸ್ತಾನದಿಂದ ರವಾನಿಸಿರುವ ಶಂಕೆಯಿದೆ. ಬ್ರಿಟನ್ ನಲ್ಲಿ ಇರಾನ್ ಗೆ ಸಂಬಂಧಿಸಿದ ಸಂಸ್ಥೆಗೆ ಈ ಸರಕನ್ನು ತಲುಪಿಸುವ ಯೋಜನೆಯಿತ್ತು ಎಂದಿರುವ ಅಧಿಕಾರಿಗಳು ಈ ಪ್ರಕರಣದ ಹಿನ್ನೆಲೆಯಲ್ಲಿ ಭಯೋತ್ಪಾದನಾ ನಿಗ್ರಹ ತನಿಖೆಯನ್ನು ಆರಂಭಿಸಲಾಗಿದೆ ಎಂದು ಹೇಳಿದ್ದಾರೆ.

ಪರಮಾಣು ಶಕ್ತಿಯ ಉತ್ಪಾದನೆಯಲ್ಲಿ ಯುರೇನಿಯಂ ಅನ್ನು ವ್ಯಾಪಕವಾಗಿ ಬಳಸಲಾಗುತ್ತದೆ ಮತ್ತು ಸಾಮಾನ್ಯವಾಗಿ ಇದು ಮಾರಣಾಂತಿಕವಾಗಿದೆ. ವಿಮಾನ ನಿಲ್ದಾಣದಲ್ಲಿ ವಾಡಿಕೆಯಂತೆ ಸರಕುಗಳ ಸ್ಕ್ರೀನಿಂಗ್ ಸಂದರ್ಭ ಒಂದು ಪ್ಯಾಕೆಟ್ ನಲ್ಲಿ ಅತ್ಯಲ್ಪ ಪ್ರಮಾಣದ ಯುರೇನಿಯಂ ಕಂಡು ಬಂದಿದೆ. ಇದು ಸಾರ್ವಜನಿಕರಿಗೆ ಯಾವುದೇ ಅಪಾಯ ಉಂಟುಮಾಡುವುದಿಲ್ಲ ಎಂದು ತಜ್ಞರು ನಿರ್ಧರಿಸಿದ್ದಾರೆ. ಇದು ಆಯುಧ ತಯಾರಿಕೆ ದರ್ಜೆಯ ಯುರೇನಿಯಂ ಅಲ್ಲ. ಆದರೆ ಡರ್ಟಿ ಬಾಂಬ್ ತಯಾರಿಸಬಹುದು' ಎಂದು ಅಧಿಕಾರಿಗಳನ್ನು ಉಲ್ಲೇಖಿಸಿ ಮಾಧ್ಯಮಗಳು ವರದಿ ಮಾಡಿವೆ.

ಡರ್ಟಿ ಬಾಂಬ್ ಎನ್ನುವುದು ಡೈನಮೈಟ್ನಂತಹ ಸ್ಫೋಟಕಗಳ ಮಿಶ್ರಣವಾಗಿದ್ದು ವಿಕಿರಣಶೀಲ ಪುಡಿಯೊಂದಿಗೆ ಡೈನಮೈಟ್ ಅಥವಾ ಇತರ ಸ್ಫೋಟಕಗಳನ್ನು ಹೊಂದಿಸಿದಾಗ ಸ್ಫೋಟವು ವಿಕಿರಣಶೀಲ ವಸ್ತುಗಳನ್ನು ಸುತ್ತಮುತ್ತಲಿನ ಪ್ರದೇಶಕ್ಕೆ ಪಸರಿಸುತ್ತದೆ. `ಇದುವರೆಗಿನ ನಮ್ಮ ವಿಚಾರಣೆಯ ಪ್ರಕಾರ, ಇದು ಯಾವುದೇ ನೇರ ಬೆದರಿಕೆಗೆ ಸಂಬಂಧಿಸಿರುವಂತೆ ತೋರುತ್ತಿಲ್ಲ. ಆದರೂ ಇದನ್ನು ಖಚಿತಪಡಿಸಲು ನಮ್ಮ ತನಿಖೆ ಮುಂದುವರಿಯಲಿದೆ. ಪ್ರಕರಣಕ್ಕೆ ಸಂಬಂಧಿಸಿ ಇದುವರೆಗೆ ಯಾವುದೇ ಬಂಧನವಾಗಿಲ್ಲ ಎಂದು ಮೆಟ್ರೊಪಾಲಿಟನ್ ಪೊಲೀಸ್ ಸೇವೆಯ ಭಯೋತ್ಪಾದನಾ ನಿಗ್ರಹ ಘಟಕದ ಮುಖ್ಯಸ್ಥ ರಿ ಚರ್ಡ್ ಸ್ಮಿತ್ ಹೇಳಿದ್ದಾರೆ.

ವರದಿ ನಿರಾಕರಿಸಿದ ಪಾಕಿಸ್ತಾನ

ಲಂಡನ್ ನ ವಿಮಾನನಿಲ್ದಾಣದಲ್ಲಿ ಬಂದಿಳಿದಿದ್ದ ಒಮಾನ್ ವಿಮಾನದ ಸರಕು ವಿಭಾಗದಲ್ಲಿ ಪತ್ತೆಯಾಗಿದ್ದ ಯುರೇನಿಯಂ ಅನ್ನು ಕರಾಚಿಯಿಂದ ಸಾಗಿಸಲಾಗುತ್ತಿತ್ತು ಎಂಬ ಬ್ರಿಟಿಷ್  ಮಾಧ್ಯಮಗಳ ವರದಿಯನ್ನು ಪಾಕಿಸ್ತಾನ ಗುರುವಾರ ನಿರಾಕರಿಸಿದೆ.

ಈ ವರದಿ ವಾಸ್ತವವಲ್ಲ ಮತ್ತು ಬ್ರಿಟನ್ನ ಅಧಿಕಾರಿಗಳು ಅಂತಹ ಮಾಹಿತಿಯನ್ನು ಹಂಚಿಕೊಂಡಿಲ್ಲ. ಈ ವರದಿಗಳು ತಪ್ಪು ಎಂಬ ವಿಶ್ವಾಸ ನಮಗಿದೆ  ಎಂದು ಪಾಕ್ ವಿದೇಶಾಂಗ ಇಲಾಖೆಯ ವಕ್ತಾರೆ ಮುಮ್ತಾಝ್ ಝಹ್ರಾರನ್ನು ಉಲ್ಲೇಖಿಸಿ `ಡಾನ್' ದಿನಪತ್ರಿಕೆ ವರದಿ ಮಾಡಿದೆ.