16 ವರ್ಷದಿಂದ ದುಡಿಯುತ್ತಿದ್ದ ಉದ್ಯೋಗಿಗಗಳನ್ನು ಮುಂಜಾನೆ ಮೂರು ಗಂಟೆಗೆ ವಜಾಗೊಳಿಸಿದ ಗೂಗಲ್

ಕ್ಯಾಲಿಫೋರ್ನಿಯಾ: ಮೌಂಟೇನ್ ವ್ಯೂನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ದೈತ್ಯ ತಂತ್ರಜ್ಞಾನ ಕಂಪನಿ ಗೂಗಲ್‌ನ ಮಾತೃಸಂಸ್ಥೆ ಆಲ್ಫಬೆಟ್ ಇಂಕ್  ತನ್ನಲ್ಲಿನ 12,000 ಉದ್ಯೋಗಿಗಳನ್ನು ಮುಂಜಾನೆ ಮೂರು ಗಂಟೆಯಲ್ಲಿ ವಜಾಗೊಳಿಸಿದೆ. ಈ ಪೈಕಿ ಒಬ್ಬರಾಗಿರುವ ಜಸ್ಟಿನ್ ಮೂರ್ ಎಂಬ ತಾಂತ್ರಿಕ ವ್ಯವಸ್ಥಾಪಕರು, "ಗೂಗಲ್ ಥರದ ದೈತ್ಯ, ಮುಖೇಡಿ ಸಂಸ್ಥೆ ವಜಾಗೊಳಿಸಿರುವ 12,000 ಉದ್ಯೋಗಿಗಳ ಪೈಕಿ ನಾನೂ ಒಬ್ಬನಾಗಿದ್ದು, ಗೂಗಲ್‌ನೊಂದಿಗಿನ ನನ್ನ ಹದಿನಾರು ವರ್ಷಕ್ಕೂ ಹೆಚ್ಚಿನ ಸೇವೆಯು ಅದ್ಭುತವಾಗಿತ್ತು" ಎಂದು ಬಣ್ಣಿಸಿದ್ದಾರೆ.

"ವಜಾಗೊಂಡ 12,000 ಅದೃಷ್ಟವಂತರ ಪೈಕಿ ಒಬ್ಬನಾಗಿದ್ದ ನನ್ನನ್ನು ಗೂಗಲ್‌ನೊಂದಿಗಿನ 16.5 ವರ್ಷಗಳ ಸಹಭಾಗಿತ್ವದ ನಂತರ ಮುಂಜಾನೆ 3 ಗಂಟೆಯಲ್ಲಿ ಸ್ವಯಂಚಾಲಿತವಾಗಿ ನನ್ನ ಖಾತೆಯನ್ನು ನಿಷ್ಕ್ರಿಯಗೊಳಿಸುವ ಮೂಲಕ ಬಿಡುಗಡೆಗೊಳಿಸಲಾಯಿತು. ಈ ಕುರಿತು ನಾನು you've been let go' ಎಂಬ ಸಂದೇಶವಲ್ಲದೇ ಅಂತರ್ಜಾಲ ತಾಣದಿಂದ ಮತ್ಯಾವ ಮಾಹಿತಿಯನ್ನೂ ಪಡೆಯಲಿಲ್ಲ (ನಾನೀಗ ಆ ಅಂತರ್ಜಾಲ ತಾಣವನ್ನು ಪ್ರವೇಶಿಸಲೂ ಸಾಧ್ಯವಿಲ್ಲ) ಮತ್ತು ನಾನದನ್ನು ಸ್ವೀಕರಿಸಬೇಕು ಎಂದು ಸೂಚಿಸಲಾಗಿತ್ತು" ಎಂದು ಲಿಂಕ್ಡ್ಇನ್ ಖಾತೆಯಲ್ಲಿ ಬರೆದುಕೊಂಡಿರುವ ಜಸ್ಟಿನ್ ಮೂರ್, ಕಳೆದ ಹಲವಾರು ವರ್ಷಗಳಿಂದ ನಾನು ಮತ್ತು ನನ್ನ ತಂಡ ಹಾಕಿರುವ ಶ್ರಮದ ಬಗ್ಗೆ ಹೆಮ್ಮೆಯಿದೆ ಎಂದು ಹೇಳಿಕೊಂಡಿದ್ದಾರೆ.

"ಈ ಪ್ರಕ್ರಿಯೆಯು ನಿಮಗೆ ಉದ್ಯೋಗವೇ ಜೀವನವಲ್ಲ ಎಂಬುದನ್ನು ನೀವು ಮನೆಗೆ ಮರಳುವಾಗ ಮನವರಿಕೆ ಮಾಡಿಕೊಡುತ್ತದೆ. ಇದರೊಂದಿಗೆ ಉದ್ಯೋಗದಾತರು, ಮುಖ್ಯವಾಗಿ ಗೂಗಲ್‌ನಂಥ ಮುಖೇಡಿ ಸಂಸ್ಥೆಗಳು ನಿಮ್ಮನ್ನು ಶೇ. 100ರಷ್ಟು ಹೊರಗೆಸೆಯಬಲ್ಲವರು ಎಂದೇ ಭಾವಿಸುತ್ತವೆ. ನೀವು ಜೀವನವನ್ನು ಜೀವಿಸಿ, ಉದ್ಯೋಗವನ್ನಲ್ಲ" ಎಂದು ಅವರು ಕಿವಿಮಾತು ಹೇಳಿದ್ದಾರೆ.

"ನಾನು ನೆಲಕ್ಕೊರಗುತ್ತೇನೆ ಮತ್ತು ಕೆಲ ಹೊತ್ತು ನೆತ್ತರು ಸುರಿಸುತ್ತೇನೆ. ನಂತರ ಮತ್ತೆ ಮೇಲೆದ್ದು ಮರು ಹೋರಾಡುತ್ತೇನೆ" ಎಂಬ ಸರ್ ಆ್ಯಂಡ್ರ್ಯೂ ಬಾರ್ಟನ್ ಅವರ ಲಘು ಕಾವ್ಯದೊಂದಿಗೆ ತಮ್ಮ ಪೋಸ್ಟ್ ಮುಗಿಸಿರುವ ಜಸ್ಟಿನ್ ಮೂರ್, ಈ ಲಘು ಕಾವ್ಯವು ನನ್ನ ತಂದೆಯ ಅಚ್ಚುಮೆಚ್ಚಿನ ಉಲ್ಲೇಖಗಳ ಪೈಕಿ ಒಂದಾಗಿತ್ತು ಎಂದು ಬರೆದುಕೊಂಡಿದ್ದಾರೆ.

ಗೂಗಲ್ ಸಂಸ್ಥೆಯು ಜಾಗತಿಕವಾಗಿ ಉದ್ಯೋಗ ಕಡಿತ ಮಾಡಿದ್ದು, ಅಮೆರಿಕಾದಲ್ಲಿನ ತನ್ನ ಕಚೇರಿಯಲ್ಲಿ ತಕ್ಷಣದಿಂದಲೇ ಜಾರಿಗೊಳಿಸಿದೆ. ಈ ತ್ರಾಸದಾಯಕ ಸುದ್ದಿಯನ್ನು ಆಂತರಿಕ ಮೇಲ್ ಮೂಲಕ ಪ್ರಕಟಿಸಿರುವ ಗೂಗಲ್ ಸಿಇಒ ಸುಂದರ್ ಪಿಚ್ಚೈ, ಮಾನವ ಸಂಪನ್ಮೂಲ ಮತ್ತು ಕೆಲವು ಸಾಂಸ್ಥಿಕ ನಿರ್ವಹಣೆ ವಿಭಾಗಗಳಲ್ಲಿ ಉದ್ಯೋಗ ಕಡಿತ ಪ್ರಕಟಿಸಿದ್ದು, ಇವುಗಳೊಂದಿಗೆ ತಾಂತ್ರಿಕ ಹಾಗೂ ಉತ್ಪನ್ನ ವಿಭಾಗಗಳೂ ಸೇರಿವೆ.