ವಿಶ್ವಸಂಸ್ಥೆ ಭದ್ರತಾ ಮಂಡಳಿಗೆ ರಶ್ಯ ಅಧ್ಯಕ್ಷ: ಉಕ್ರೇನ್ ನಿಂದ ತೀವ್ರ ವಿರೋಧ

ವಿಶ್ವಸಂಸ್ಥೆ, ಎ.1: ಉಕ್ರೇನ್ ನ ತೀವ್ರ ವಿರೋಧದ ನಡುವೆಯೇ ರಶ್ಯವು ವಿಶ್ವಸಂಸ್ಥೆ ಭದ್ರತಾ ಮಂಡಳಿಯ ಅಧ್ಯಕ್ಷತೆಯನ್ನು ವಹಿಸಿಕೊಂಡಿದೆ.

ಶನಿವಾರ(ಎಪ್ರಿಲ್ 1)ದಿಂದ 15 ಸದಸ್ಯರ ಭದ್ರತಾ ಮಂಡಳಿಯ ಅಧ್ಯಕ್ಷತೆಯನ್ನು ರಶ್ಯ ವಹಿಸಿಕೊಂಡಿದೆ . ಭದ್ರತಾ ಮಂಡಳಿಯ ಒಂದು ತಿಂಗಳ  ಅಧ್ಯಕ್ಷತೆಗೆ 15 ಸದಸ್ಯ ರಾಷ್ಟ್ರಗಳು ಪರ್ಯಾಯ ಕ್ರಮದಲ್ಲಿ ಆಯ್ಕೆಯಾಗುತ್ತವೆ. ಎಪ್ರಿಲ್ ತಿಂಗಳಾವಧಿಗೆ ರಶ್ಯ ಅಧ್ಯಕ್ಷತೆ ವಹಿಸಲಿದೆ, ಆದರೆ ರಶ್ಯದ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ವಿರುದ್ಧ ಯುದ್ಧಾಪರಾಧದ ಹಿನ್ನೆಲೆಯಲ್ಲಿ  ಅಂತರಾಷ್ಟ್ರೀಯ ಕ್ರಿಮಿನಲ್ ನ್ಯಾಯಾಲಯ ಬಂಧನ ವಾರಂಟ್ ಜಾರಿಗೊಳಿಸಿರುವುದರಿಂದ ರಶ್ಯವನ್ನು ಅಧ್ಯಕ್ಷತೆಯಿಂದ ಅನರ್ಹಗೊಳಿಸಬೇಕು ಎಂದು ಉಕ್ರೇನ್ ಪಟ್ಟುಹಿಡಿದಿತ್ತು.

ಎಪ್ರಿಲ್ 1ರಿಂದ ಅವರು(ರಶ್ಯ) ಅಸಂಬದ್ಧತೆಯ ಮಟ್ಟವನ್ನು ಹೊಸ ಹಂತಕ್ಕೆ ಕೊಂಡೊಯ್ಯಲಿದ್ದಾರೆ ಎಂದು ವಿಶ್ವಸಂಸ್ಥೆಯಲ್ಲಿ ಉಕ್ರೇನ್ನ ಕಾಯಂ ರಾಯಭಾರಿ ಸೆರ್ಗಿಯ್ ಕಿಸ್ಲಿಟ್ಸ್ಯಾ ಪ್ರತಿಕ್ರಿಯಿಸಿದ್ದಾರೆ.

ಸಂಘರ್ಷಗಳನ್ನು ತಡೆಗಟ್ಟುವುದು, ಬಿಕ್ಕಟ್ಟು ನಿವಾರಣೆಗೆ ಕ್ರಮ ಕೈಗೊಳ್ಳುವ ತನ್ನ ಪ್ರಾಥಮಿಕ ಜವಾಬ್ದಾರಿಯನ್ನು ನಿರ್ವಹಿಸಲು ವಿಶ್ವಸಂಸ್ಥೆ ಅಸಮರ್ಥವಾಗಿದೆ. ಆದ್ದರಿಂದ, ರಾಷ್ಟ್ರೀಯ ಹಿತಾಸಕ್ತಿಗೆ ಸಂಬಂಧಿಸಿದ ಪ್ರಮುಖ ಕಲಾಪವನ್ನು ಹೊರತುಪಡಿಸಿ ಎಪ್ರಿಲ್ ತಿಂಗಳಲ್ಲಿ (ರಶ್ಯದ ಅಧ್ಯಕ್ಷತೆಯಲ್ಲಿ) ನಡೆಯುವ ವಿಶ್ವಸಂಸ್ಥೆ ಭದ್ರತಾ ಮಂಡಳಿ ಸಭೆಯಲ್ಲಿ ಉಕ್ರೇನ್ ಪಾಲ್ಗೊಳ್ಳುವುದಿಲ್ಲ ಎಂದು ಉಕ್ರೇನ್ ರಾಯಭಾರಿ ಹೇಳಿದ್ದಾರೆ. ಉಕ್ರೇನ್ ಪ್ರಸ್ತುತ ವಿಶ್ವಸಂಸ್ಥೆ ಭದ್ರತಾ ಮಂಡಳಿಯ ಸದಸ್ಯನಲ್ಲ, ಆದರೆ ಯುದ್ಧಕ್ಕೆ ಸಂಬಂಧಿಸಿದ ಕಲಾಪದಲ್ಲಿ ಪಾಲ್ಗೊಳ್ಳಲು ಆ ದೇಶವನ್ನು ಆಹ್ವಾನಿಸಲಾಗುತ್ತಿದೆ.

ಈ ಮಧ್ಯೆ, ರಶ್ಯದ ಅಧ್ಯಕ್ಷತೆಯಲ್ಲಿ ನಡೆಯುವ ಭದ್ರತಾ ಮಂಡಳಿಯ ಕಲಾಪಗಳಿಗೆ ತಮ್ಮ ಕೆಳಮಟ್ಟದ ಪ್ರತಿನಿಧಿಗಳನ್ನು ಕಳುಹಿಸುವ ಬಗ್ಗೆ ಅಮೆರಿಕ, ಬ್ರಿಟನ್, ಫ್ರಾನ್ಸ್ ಹಾಗೂ ಇತರ ಕೆಲವು ದೇಶಗಳು ಸುಳಿವು ನೀಡಿವೆ. ಆದರೆ ಕಲಾಪವನ್ನು ಬಹಿಷ್ಕರಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ. ವೃತ್ತಿಪರವಾಗಿ ನಡೆದುಕೊಳ್ಳುವಂತೆ ರಶ್ಯವನ್ನು ಅಮೆರಿಕ ಆಗ್ರಹಿಸಿದೆ, ಆದರೆ ರಶ್ಯವು ಭದ್ರತಾ ಮಂಡಳಿಯ ಅಧ್ಯಕ್ಷತೆ ವಹಿಸದಂತೆ ತಡೆಯಲು ಪ್ರಯತ್ನಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.

ಮೂರ್ಖರ ದಿನದ ತಮಾಷೆ: ಉಕ್ರೇನ್

‌ಯುದ್ಧಾಪರಾಧದ ಅಪರಾಧಿ ವಿಶ್ವಸಂಸ್ಥೆ ಭದ್ರತಾ ಮಂಡಳಿಯ ಅಧ್ಯಕ್ಷತೆ ವಹಿಸಿರುವುದು ಎಪ್ರಿಲ್ ಫೂಲ್ಸ್ ದಿನಕ್ಕೆ ಸಂಬಂಧಿಸಿದ ಇದುವರೆಗಿನ ಅತ್ಯುತ್ತಮ ತಮಾಷೆಯಾಗಿದೆ ಮತ್ತು ಅಂತರಾಷ್ಟ್ರೀಯ ಭದ್ರತಾ ಸಂಸ್ಥೆ ಕಾರ್ಯನಿರ್ವಹಿಸುತ್ತಿರುವ ರೀತಿಯಲ್ಲಿ ಏನೋ ಒಂದು ತಪ್ಪಾಗಿದೆ ಎಂಬುದಕ್ಕೆ ನಿದರ್ಶನವಾಗಿದೆ  ಎಂದು ಉಕ್ರೇನ್ನ ವಿದೇಶಾಂಗ ಸಚಿವ ಡಿಮಿಟ್ರಿ ಕ್ಯುಲೆಬಾ ಲೇವಡಿ ಮಾಡಿದ್ದಾರೆ.

ಈ ನಡೆಯು ಅಂತರಾಷ್ಟ್ರೀಯ ಕಾನೂನಿನ ಮೇಲೆ ನಡೆದಿರುವ ಮತ್ತೊಂದು ಅತ್ಯಾಚಾರವಾಗಿದೆ. ಆಕ್ರಮಣಕಾರಿ ಯುದ್ಧ ಸಾರಿರುವ, ಮಾನವೀಯ ಮತ್ತು ಕ್ರಿಮಿನಲ್ ನಿಯಮಗಳನ್ನು ಸಾರಾ ಸಗಟಾಗಿ ಉಲ್ಲಂಘಿಸುವ, ವಿಶ್ವಸಂಸ್ಥೆಯ ಸನದು(ಚಾರ್ಟರ್) ಅನ್ನು ನಾಶಗೊಳಿಸಿರುವ, ಪರಮಾಣು ಸುರಕ್ಷತೆಯನ್ನು ನಿರ್ಲಕ್ಷಿಸಿರುವ ದೇಶವೊಂದು ಜಾಗತಿಕ ಭದ್ರತಾ ಸಂಸ್ಥೆಯ ಅಧ್ಯಕ್ಷನಾಗಿರಲು ಸಾಧ್ಯವಿಲ್ಲ ಎಂದು ಉಕ್ರೇನ್ ಅಧ್ಯಕ್ಷರ ಸಲಹೆಗಾರ ಮಿಖಾಯಿಲೊ ಪೊಡೊಲ್ಯಾಕ್ ಪ್ರತಿಕ್ರಿಯಿಸಿದ್ದಾರೆ.