ಕಿರಿಕ್ ಪಾರ್ಟಿ ಜೋಡಿ ಬಗ್ಗೆ ಎಕ್ಸ್ ಕ್ಲೂಸಿವ್ ಸುದ್ದಿ: ಹಸಮಣೆ ಏರಲಿರುವ ಸಾನ್ವಿ-ಕರ್ಣ
ಬೆಂಗಳೂರು, ಜೂ.7: ಕಿರಿಕ್ ಪಾರ್ಟಿ ಹೀರೋ ರಕ್ಷಿತ್ ಶೆಟ್ಟಿ ತನ್ನ ಗೆಳತಿ ರಶ್ಮಿಕಾ ಮಂದಣ್ಣ ಅವರನ್ನು ವಿವಾಹವಾಗುತ್ತಾರೆ ಎಂಬ ವಿಚಾರ ಇದೀಗ ಭಾರೀ ಸುದ್ದಿಯಾಗುತ್ತಿದೆ. ಈ ಮದುವೆ ಗಾಸಿಪ್ ಇದೀಗ ನಿಜವಾಗಲಿದ್ದು, ಒಂದಷ್ಟು ಮಾತುಗಳನ್ನು ಹಂಚಿಕೊಂಡಿದ್ದಾರೆ ಈ ಕರಾವಳಿಯ ಪ್ರತಿಭೆ.
ನಟ ರಕ್ಷಿತ್ ಶೆಟ್ಟಿ ಹಾಗೂ ಕೊಡಗಿನ ಕುವರಿ ರಶ್ಮಿಕಾ ಮದುವೆ ಪ್ರಕ್ರಿಯೆಗೆ ಜುಲೈ 3ರಂದು ಮುನ್ನುಡಿ ಸಿಗಲಿದೆ. ಅಂದರೆ ಅಂದು ನಿಶ್ಚಿತಾರ್ಥ ನೆರವೇರಲಿದೆ. ಈ ಬಗ್ಗೆ ರಕ್ಷಿತ್ ಅತೀವ ಸಂತಸ ವ್ಯಕ್ತಪಡಿಸಿದ್ದಾರೆ. "ನಾನು ರಶ್ಮಿಕಾ ಅವರ ಕುಟುಂಬದ ಸದಸ್ಯನಾಗುತ್ತಿದ್ದೇನೆ. ಎರಡೂ ಕುಟುಂಬಗಳ ಒಪ್ಪಿಗೆಯಿಂದಲೇ ನಾವು ಮದುವೆಯಾಗುತ್ತಿದ್ದೇವೆ. ನಮ್ಮ ನಿಶ್ಚಿತಾರ್ಥವನ್ನು ತಿಳಿಸುವ ವಿಚಾರದಲ್ಲೂ ನನಗೆ ಸಂತಸವಾಗುತ್ತಿದೆ" ಎಂದು ರಕ್ಷಿತ್ ಹೇಳಿದ್ದಾರೆ.
"ನಿಮ್ಮದು ಎಷ್ಟು ವರ್ಷಗಳ ಪ್ರೀತಿ" ಎಂಬ ಪ್ರಶ್ನೆಗೆ ನಗುತ್ತಲೇ ಉತ್ತರಿಸಿದ ರಕ್ಷಿತ್ ಶೆಟ್ಟಿ, ನಮ್ಮದೂ ಇತ್ತೀಚಿನ ಪ್ರೀತಿ. ಆದರೂ ಇನ್ನೂ ಎರಡೂ ವರ್ಷಗಳ ಕಾಲ ಮದುವೆಯಾಗಲೂ ಕಾಯಲು ಸಿದ್ದರಿದ್ದೇವೆ. ನನ್ನ ವೃತ್ತಿ ಜೀವನದಲ್ಲಿ ಕಾಯುವುದು ಕಷ್ಟವಲ್ಲ. ಸಾಧನೆ ಮಾಡಲು ತುಂಬಾ ಇರುವುದರಿಂದ ಇನ್ನೂ ಎರಡು ವರ್ಷಗಳ ಕಾಲ ಕಾಯಲು ಸಿದ್ಧ ಎಂದಿದ್ದಾರೆ.
ಜುಲೈ 3ರಂದು ಎಂಗೇಜ್ ಮೆಂಟ್ ಫಿಕ್ಸ್ ಆಗಿದೆ. ಆದರೆ ಮದುವೆಗೆ ಮಾತ್ರ ಇನ್ನೂ ಕಾಯಬೇಕು ಎಂದು ರಕ್ಷಿತ್ ಶೆಟ್ಟಿ ಹೇಳಿದ್ದಾರೆ.