ಕಾನೂನುಗಳ ಉತ್ಪಾದನೆಗೆ ಬೃಹತ್ ಕಾರ್ಖಾನೆಗಳ ನಿರ್ಮಾಣ!

‘‘ಹೊಸ ಹೊಸ ಕಾನೂನು...ಬಿಸಿ ಬಿಸಿ ಕಾನೂನು....’’ ಅಮೃತ ಕಾಲದ ರೈಲು ನಿಲ್ದಾಣದಲ್ಲಿ ಗ್ರಹ ಸಚಿವರು ಪಕೋಡಾ ಮಾರುತ್ತಿದ್ದರು.

ಕಾಸಿಗೆ ಕುತೂಹಲ. ಮಣಿಪುರದಲ್ಲಿ ಸಾಮೂಹಿಕ ಅತ್ಯಾಚಾರ, ಹಿಂಸಾಚಾರಗಳು ನಡೆಯುತ್ತಿವೆ. ಇಲ್ಲಿ ನೋಡಿದರೆ ಇವರು ಅಮೃತ ರೈಲು ನಿಲ್ದಾಣದಲ್ಲಿ ಪಕೋಡಾ ಮಾರುತ್ತಿದ್ದಾರೆ. ಕಾಸಿ ಮೆಲ್ಲಗೆ ಆ ಕಡೆ ಹೆಜ್ಜೆ ಹಾಕಿದ.

‘‘ಸಾರ್...ಇದೇನಿದು....ಹೊಸ ವ್ಯಾಪಾರ .....’’

‘‘ಅದೇ ದೇಶದ ಸುಭದ್ರತೆಗಾಗಿ ಹೊಸ ಹೊಸ ಬಿಸಿ ಬಿಸಿ ಕಾನೂನುಗಳನ್ನು ಮಾಡಿ ಮಾರಾಟ ಮಾಡುತ್ತಿದ್ದೇವೆ....ದೇಶದಲ್ಲಿ ಕಾನೂನು ಸುವ್ಯವಸ್ಥೆ ಚೆನ್ನಾಗಿರಬೇಕು. ಏಕತೆ, ಸಾರ್ವಭೌಮತೆ..ಸಮಗ್ರತೆ....’’ ಗ್ರಹ ಸಚಿವರು ತಿಳಿಸಿದರು.

‘‘ಇದೆಂತಹ ಪಕೋಡಾ ಸಾರ್...ಬ್ರಿಟಿಷ್ ಕಾಲದ ವಾಸನೆ ಬರುತ್ತಿದೆ....’’ ಕಾಸಿ ಮೂಸಿ ನೋಡಿ ಕೇಳಿದ.

‘‘ಹೇ...ಹಾಗೇನು ಇಲ್ಲ.... ಬ್ರಿಟಿಷ್ ಕಾಲದ ಪಕೋಡಾಗಳನ್ನು ಎಸೆದು ಹೊಸದಾಗಿ ಸ್ವದೇಶಿ ಎಣ್ಣೆಯಲ್ಲಿ ಮಾಡಿದ ಸ್ವದೇಶಿ ‘ದೇಶದ್ರೋಹ ವಿರೋಧಿ’ ಪಕೋಡಾಗಳು....ಈಗಷ್ಟೇ ಬಾಣಲೆಯಿಂದ ತೆಗೆದಿದ್ದೇವೆ....’’ ಗ್ರಹ ಸಚಿವರು ಗಡ್ಡ ಸವರಿ ಹೇಳಿದರು.

‘‘ಸಾರ್...ಈಗಾಗಲೇ ಬಾಣಲೆಯಲ್ಲಿ ಬೇಯುತ್ತಿರುವ ಸಾಮಾಜಿಕ ಹೋರಾಟಗಾರರು, ಪತ್ರಕರ್ತರನ್ನು ಏನು ಮಾಡುತ್ತೀರಿ....’’ ಕಾಸಿ ಅರ್ಥವಾಗದೆ ಕೇಳಿದ.

‘‘ಅವರನ್ನು ಹೊಸ ಬಾಣಲೆಯಲ್ಲಿ ಸ್ವದೇಶಿ ಎಣ್ಣೆಯಲ್ಲಿ ಹೊಸದಾಗಿ ಹಾಕಿ ಕರಿಯುತ್ತೇವೆ....ನೋಡಿ...ಪರಿಮಳ ಹೇಗೆ ಬರುತ್ತಿದೆ....?’’ ಗ್ರಹ ಸಚಿವರು ಮೂಗರಳಿಸಿದರು.

‘‘ಸಾರ್...ಹಳಸಿದ ವಾಸನೆ ಬರುತ್ತಿದೆ. ಎಣ್ಣೆ ಸ್ವದೇಶಿ ಹಾಕಿದ್ದರೂ ಹಳೆ ಬ್ರಿಟಿಷ್ ಕಾಲದ ಪಕೋಡವನ್ನೇ ಅರೆದು ಹೊಸದಾಗಿ ಮಾಡಿರುವ ಹಾಗಿದೆ....’’ ಕಾಸಿ ಕೇಳಿದ.

ಗ್ರಹ ಸಚಿವರ ಕಣ್ಣ ಕೆಂಪಾಯಿತು ‘‘ನೋಡಿ....ನಮ್ಮ ಸ್ವದೇಶಿ ಬಿಸಿಬಿಸಿ ಕಾನೂನಿನ ಪ್ರಕಾರ ನೀವು ಈಗ ಆಡಿದ ಮಾತು ದೇಶದ ಏಕತೆಗೆ, ಸಮಗ್ರತೆಗೆ ಧಕ್ಕೆ ತರುತ್ತದೆ. ನಿಮಗೆ ಜೀವಾವಧಿ ಶಿಕ್ಷೆಯಾಗಬಹುದು....’’ ಗ್ರಹ ಸಚಿವರು ಎಚ್ಚರಿಸಿದರು. ಕಾಸಿ ಬೆಚ್ಚಿ ಬಿದ್ದ. ‘‘ಕ್ಷಮಿಸಿ ಸಾರ್....ಸ್ವಲ್ಪ ಹಳಸಿದ ವಾಸನೆ ಬಂತು. ಅದಕ್ಕೆ ಹೇಳಿದೆ...ಈಗ ನೋಡಿದರೆ ಇದು ಸ್ವದೇಶಿ ಗಂಜಲದ ಪರಿಮಳ ಸಾರ್....ಚೆನ್ನಾಗಿದೆ....’’ ಎಂದು ಬಿಟ್ಟ.

ಗ್ರಹ ಸಚಿವರು ಸಮಾಧಾನವಾದರು.

‘‘ಸಾರ್...ಮಣಿಪುರದಲ್ಲಿ ಹಿಂಸಾಚಾರ, ಸಾಮೂಹಿಕ ಅತ್ಯಾಚಾರ ನಡೆಯುತ್ತಿದೆ....ಹರ್ಯಾಣದಲ್ಲಿ ಕೋಮುಗಲಭೆಗಳು ಸಂಭವಿಸಿವೆ....ದ್ವೇಷ ಭಾಷಣ ಹೆಚ್ಚಿವೆ....ಇವೆಲ್ಲ ದೇಶದ ಸಮಗ್ರತೆಗೆ ಧಕ್ಕೆ ತರುವುದಿಲ್ಲವೆ? ನಿಮ್ಮ ಹೊಸ ಸ್ವದೇಶಿ ಪಕೋಡಾವನ್ನು ಇವರೆಲ್ಲರಿಗೆ ಬಡಿಸಲಾಗುತ್ತದೆಯೆ?’’ ಕಾಸಿ ಕೇಳಿದ

‘‘ಹೆಹೆ...ಇವುಗಳಿಗೆಲ್ಲ ಹಿಂದಿನ ಕಾಂಗ್ರೆಸ್ ಸರಕಾರ ಕಾರಣ. ಇದಕ್ಕಾಗಿ ನಾವು ನೆಹರೂ ವಿರುದ್ಧ ಹೊಸ ಕಾನೂನುಗಳನ್ನು ಬಳಸಲಿದ್ದೇವೆ. ಸರ್ವ ಮೊಕದ್ದಮೆಗಳನ್ನು ನೆಹರೂ ವಿರುದ್ಧ ದಾಖಲಿಸಿ ಅವರನ್ನು ಜೈಲಿಗೆ ತಳ್ಳಲಿದ್ದೇವೆ....’’ ಗ್ರಹ ಸಚಿವರು ಹೇಳಿದರು.

‘‘ಸಾರ್...ಜೈಲಿಗೆ ತಳ್ಳಲು ಅವರು ಈಗ ಇಲ್ಲವಲ್ಲ....’’

‘‘ಇಲ್ಲದಿದ್ದರೇನಾಯಿತು? ಅವರ ವಂಶಸ್ಥರಿದ್ದಾರಲ್ಲ....ಅವರ ಮೇಲೆ ಕೇಸು ದಾಖಲಿಸಿ ಒಳತಳ್ಳಲಿದ್ದೇವೆ....’’

‘‘ಗೋಡ್ಸೆವಾದಿಗಳ ಮೇಲೆ ನಿಮ್ಮ ಕಾನೂನನ್ನು ಬಳಸಲಾಗುತ್ತದೆಯೆ?’’ ಕಾಸಿ ಅನುಮಾನದಿಂದ ಕೇಳಿದ.

‘‘ನೋಡಿ, ಗೋಡ್ಸೆಯನ್ನು ಬ್ರಿಟಿಷರ ಕಾಲದ ಕಾನೂನಿನ ಆಧಾರದಲ್ಲಿ ಗಲ್ಲಿಗೇರಿಸಲಾಗಿದೆ. ಇದು ನಿಜಕ್ಕೂ ತಪ್ಪು. ಗೋಡ್ಸೆ ಬ್ರಿಟಿಷರ ಕಡೆಗೆ ಹಾರಿಸಿದ ಗುಂಡು ಗುರಿ ತಪ್ಪಿ ಗಾಂಧಿಯ ಕಡೆಗೆ ಹಾರಿರಬಹುದು....ಕೆಲವೊಮ್ಮೆ ಇಂತಹ ಪ್ರಮಾದಗಳು ಆಗುತ್ತವೆ. ಗುಜರಾತ್ನಲ್ಲಿ ಕಾರು ವೇಗವಾಗಿ ಓಡುವಾಗ ನಾಯಿಮರಿ ಅಡ್ಡಬಂದದ್ದನ್ನು ಇದಕ್ಕೆ ಉದಾಹರಣೆಯಾಗಿ ತೆಗೆದುಕೊಳ್ಳಬಹುದು. ಹಾಗೆಯೇ ಗೋಡ್ಸೆ ಬ್ರಿಟಿಷರ ಕಡೆಗೆ ಗುಂಡು ಹಾರಿಸುವಾಗ ಗಾಂಧಿ ಅಡ್ಡ ಬಂದಿರಬಹುದು. ಅದನ್ನು ಹೊಸದಾಗಿ ತನಿಖೆ ಮಾಡಲು ನಾವು ಎನ್ಐಎ ಅವರಿಗೆ ವಹಿಸಲಿದ್ದೇವೆ. ಅವರು ಗಾಂಧಿ ಹತ್ಯೆಯ ತನಿಖೆಯನ್ನು ಮಾಡಿ ನಿಜವಾದ ಆರೋಪಿಗಳು ಪಾಕಿಸ್ತಾನದಲ್ಲಿರಲಿ, ಸಿರಿಯಾದಲ್ಲಿರಲಿ ಅವರನ್ನು ಪತ್ತೆ ಹಚ್ಚಲಿದ್ದಾರೆ. ಅವರ ತನಿಖೆ ಮುಗಿಯುವವರೆಗೆ ಗೋಡ್ಸೆವಾದಿಗಳನ್ನು ದೇಶದ್ರೋಹಿಗಳು ಎಂದು ಹೇಳಲು ಆಗುವುದಿಲ್ಲ....’’

‘‘ಸಾರ್...ದಲಿತರ ಮೇಲೆ ದೌರ್ಜನ್ಯಗಳು, ಅತ್ಯಾಚಾರಗಳು ಹೆಚ್ಚುತ್ತಿವೆಯಲ್ಲ?’ ಕಾಸಿ ಕೇಳಿದ.

‘‘ಅದಕ್ಕಾಗಿ ಇನ್ನೂ ಬಗೆ ಬಗೆಯ ಕಾನೂನುಗಳನ್ನು ಜಾರಿಗೆ ತರಲಿದ್ದೇವೆ. ದೇಶದ ಎಲ್ಲ ರೈಲು ನಿಲ್ದಾಣಗಳಲ್ಲಿ ಈ ಬಿಸಿ ಬಿಸಿ ಕಾಯ್ದೆ ಕಾನೂನುಗಳನ್ನು ವಿತರಿಸುವ ಏರ್ಪಾಡು ಮಾಡುತ್ತೇವೆ....ರೇಷನ್ ಅಂಗಡಿಗಳಲ್ಲಿ ಬಿಪಿಎಲ್ ಕಾರ್ಡ್ಗಳನ್ನು ಉಚಿತವಾಗಿ ವಿತರಿಸಲು ಹೇಳಿದ್ದೇವೆ. ಗಲಭೆ ಪೀಡಿತ ಪ್ರದೇಶಗಳಿಗೆ ಉಚಿತವಾಗಿ ಈ ಕಾನೂನುಗಳನ್ನು ಪೂರೈಸಲಿದ್ದೇವೆ’’

‘‘ಸಾರ್...ಪೆಟ್ರೋಲ್ ಬೆಲೆಯೇರಿಕೆಯಾಗುತ್ತಿದೆ...ಹಣದುಬ್ಬರ....’’ ಕಾಸಿ ಕೇಳಿದ.

‘‘ ಪೆಟ್ರೋಲ್ ಬೆಲೆಯೇರಿಕೆಗೂ ಕೆಲವು ಸ್ವದೇಶಿ ಕಾನೂನುಗಳನ್ನು ಜಾರಿಗೊಳಿಸುತ್ತೇವೆ. ಟೊಮೆಟೊ ಬೆಲೆಯೇರಿಕೆಗೂ ಕಾನೂನುಗಳನ್ನು ಜಾರಿಗೊಳಿಸೋಣ....ಒಟ್ಟಿನಲ್ಲಿ ದೇಶಾದ್ಯಂತ ಕಾನೂನುಗಳ ಜಾರಿಗಾಗಿ ಬೃಹತ್ ಕಾರ್ಖಾನೆಗಳನ್ನು ತೆರೆಯಬೇಕು ಎಂದಿದ್ದೇವೆ. ಕಾನೂನುಗಳನ್ನು ಉತ್ಪಾದಿಸಿ ವಿದೇಶಗಳಿಗೆ ರಫ್ತು ಮಾಡಿ ‘ವಿದೇಶ ವಿನಿಮಯ’ ಹೆಚ್ಚಿಸುವ ಪ್ರಯತ್ನವೂ ನಡೆಯುತ್ತಿದೆ....’’

ಕಾಸಿಗೆ ತುಂಬಾ ಸಂತೋಷವಾಯಿತು. ದೇಶಾದ್ಯಂತ ಕಾನೂನಿನ ಉತ್ಪಾದನೆ ಹೆಚ್ಚಿ, ದೇಶ ಶೀಘ್ರದಲ್ಲೇ ವಿಶ್ವಗುರುವಾಗುವುದು ಖಚಿತ ಎನ್ನುತ್ತಾ ಬಿಸಿ ಬಿಸಿ ಕಾನೂನೊಂದನ್ನು ಬಾಯಿಗೆ ಹಾಕಿಕೊಂಡು ಸವಿಯ ತೊಡಗಿದ. ಹಳಸಿದ ವಾಸನೆಯಿಂದ ಹೊಟ್ಟೆ ತೊಳೆಸಿದಂತಾಯಿತು. ಎಲ್ಲಿ ದೋಶದ್ರೋಹದ ಕಾನೂನು ತನ್ನ ಮೇಲೆಯೇ ಜಾರಿಯಾಗುತ್ತದೋ ಎಂದು ಹೆದರಿ ‘‘ಸಾರ್ ಈಗ ಬಂದೆ....ದಿಲ್ಲಿಯ ಶೌಚಾಲಯದ ಸ್ಥಿತಿಗತಿ ಹೇಗಿದೆ ಎಂದು ವೀಕ್ಷಿಸಿ ಬರುವೆ’’ ಎನ್ನುತ್ತಾ ಅಲ್ಲಿಂದ ಜಾಗ ಖಾಲಿ ಮಾಡಿದ.