‘ರೋಲ್ಸ್ ರಾಯ್ಸ್ ಕಾರಿಗೆ ಮರುಳಾಗಿ ತನ್ನ ಬಿಎಂಡಬ್ಲು ಕಾರನ್ನು ಕಳಕೊಂಡ !
ಹಲವು ಮಂದಿಯನ್ನು ಬಲೆಗೆ ಹಾಕಿದ ದುಬೈ ಸರಣಿ ವಂಚಕ
ದುಬೈ, ಜೂ.23: ಈಗಾಗಲೇ ಹಲವಾರು ಜನರಿಗೆ ವಂಚಿಸಿರುವ ‘ರೋಲ್ಸ್ ರಾಯ್ಸ್ ವಂಚಕ’ನಿಗೆ ಇನ್ನೊಬ್ಬ ಬಲಿಬಿದ್ದಿದ್ದಾನೆ. ಸುಡಾನಿ ಪ್ರಜೆ ಮುಹಮ್ಮದ್ ಉಮರ್ ಎಂಬವರನ್ನು ಬಲೆಗೆ ಬೀಳಿಸಿರುವ ಈ ವಂಚಕ ಆತನ ಬಿಎಂಡಬ್ಲು ಮಿನಿ ಕಾರನ್ನು ಒಂದೇ ಒಂದು ದಿರ್ಹಂ ಪಾವತಿಸದೇ ಬಿಟ್ಟಿಯಾಗಿ ಪಡೆದು ಪರಾರಿಯಾಗಿದ್ದಾನೆ.
ವಂಚಕನ ಬಣ್ಣ ಬಣ್ಣದ ಮಾತು ಹಾಗು ಆಕರ್ಷಕ ರೋಲ್ಸ್ರಾಯ್ಸ್ ಕಾರಿಗೆ ಮರುಳಾಗಿರುವ ಉಮರ್ ಹಾಡಹಗಲೇ ವಂಚನೆಗೊಳಗಾಗಿದ್ದಾರೆ. ಬಿಎಂಡಬ್ಲು ಮಿನಿ ಕಾರು ಮಾರಾಟಕ್ಕಿದೆ ಎಂದು ಉಮರ್ ವೆಬ್ಸೈಟ್ನಲ್ಲಿ ಜಾಹೀರಾತು ನೀಡಿದ್ದರು. ಅದನ್ನು ನೋಡಿ ಆತನನ್ನು ಸಂಪರ್ಕಿಸಲು ಬಂದ ವಂಚಕ ತನ್ನ ಶ್ರೀಮಂತಿಕೆಯನ್ನು ಉಮರ್ ಬಳಿ ವರ್ಣಿಸಿದ್ದಾನೆ. ಸಾಲದ್ದಕ್ಕೆ ಆಕರ್ಷಕ ರೋಲ್ಸ್ ರಾಯ್ಸ್ ಕಾರಿನಲ್ಲಿ ಬಂದಿದ್ದಾನೆ.
ನನ್ನ ತಮ್ಮನಿಗೆ ಈ ಕಾರು ಬೇಕು. ನಾಳೆ ಬೆಳಗ್ಗೆಯೇ ಉಮ್ರಾಗೆ ಹೋಗುತ್ತಿದ್ದೇನೆ. ಹಾಗಾಗಿ ಈಗಲೇ ಈ ಡೀಲ್ ಮುಗಿಸಬೇಕು ಎಂದು ಹೇಳಿದ್ದಾನೆ. ಆತ ಅರಬ್ ಆಗಿದ್ದ ಎಂದು ಹೇಳಲಾಗಿದೆ. ಇದನ್ನೆಲ್ಲ ನೋಡಿದ ಉಮರ್ ಆತನನ್ನು ಸಂಪೂರ್ಣ ನಂಬಿ ಕಾರನ್ನು ಮಾರಿದ್ದಾರೆ. ಕೊನೆ ಘಳಿಗೆಯಲ್ಲಿ ನನ್ನಲ್ಲಿ ಈಗ ನಗದು ಇಲ್ಲ ಎಂದು ಚೆಕ್ ನೀಡಿದ್ದಾನೆ. ಈ ವೇಳೆ ಉಮರ್ ಸ್ವಲ್ಪ ಸಂಶಯಕ್ಕೊಳಗಾದರೂ ಈ ವಂಚಕ ಅವರನ್ನು ನಂಬಿಸಿದ್ದಾನೆ. ಹಾಗೆ ಉಮರ್ ಆತನಿಗೆ ಕಾರ್ ನೀಡಿ ಬಂದಿದ್ದಾರೆ.
ಮರುದಿನ ಬ್ಯಾಂಕ್ ಗೆ ಹೋಗಿ ಚೆಕ್ ತೋರಿಸುವಾಗ ವಂಚಕನ ಬಂಡವಾಳ ಬಯಲಾಗಿದೆ. ಯಾಕೆಂದರೆ ಅಲ್ಲಿ ಖಾತೆಯನ್ನೇ ಬಂದ್ ಮಾಡಲಾಗಿತ್ತು. ಹೀಗೆ ಒಂದೇ ಒಂದು ದಿರ್ಹಂ ಪಾವತಿಸದೆ ಬಿಎಂಡಬ್ಲು ಕಾರನ್ನು ಆತ ಪಡೆದಿದ್ದಾನೆ. ಇದೇ ರೀತಿ ಆ ವಂಚಕ ಒಂದು ಡಝನ್ಗೂ ಹೆಚ್ಚು ಮಂದಿಗೆ ವಂಚಿಸಿದ್ದಾನೆ ಎಂದು ಹೇಳಲಾಗಿದೆ.