ಪೊಲೀಸ್ ಇಲಾಖೆಗೆ ಸೇರಿ ತಂಗಿಯನ್ನೂ ಎಸ್ಸೈ ಆಗಿಸಿದ ಲಾಲೂಸಾಬ್ ಜಂಗ್ಲಿ

‘ಸರಕಾರಿ ಹುದ್ದೆ ಸೇರಲು ಹಿಂಜರಿಕೆ ಬೇಡ’

► ಪೊಲೀಸ್ ಇಲಾಖೆಯಲ್ಲಿ ಎಸ್ಸೈಆಗಿ ಗಮನ ಸೆಳೆದ ರುಬೀನಾ ಬಾನು

ಚಿಕ್ಕಮಗಳೂರು, ಸೆ.21: ಒಂದೇ ಕುಟುಂಬದವರು ಸರಕಾರಿ ಕೆಲಸಗಳಲ್ಲಿರುವುದು ಸಾಮಾನ್ಯ ಸಂಗತಿಯಾಗಿದೆ. ಆದರೆ, ಒಂದೇ ಕುಟುಂಬದವರು ಅದರಲ್ಲೂ ಅಣ್ಣ-ತಂಗಿ ಒಂದೇ ಇಲಾಖೆಯ ಒಂದೇ ಗ್ರೇಡ್‌ನ ಹುದ್ದೆಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವುದು ಅಪರೂಪ. ಆದರೆ, ಹೀಗೆ ಒಂದೇ ಕುಟುಂಬದ ಅಣ್ಣ ತಂಗಿ ಇಬ್ಬರೂ ಒಂದೇ ಇಲಾಖೆ ಒಂದೇ ಗ್ರೇಡ್‌ನ ಹುದ್ದೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅಣ್ಣ-ತಂಗಿ ಚಿಕ್ಕಮಗಳೂರು ಜಿಲ್ಲೆಯಲ್ಲಿದ್ದಾರೆ.

ಅಣ್ಣ ಮುಹಮ್ಮದ್ ಪೈಗಂಬರ್ ಲಾಲೂಸಾಬ್ ಜಂಗ್ಲಿ ಚಿಕ್ಕಮಗಳೂರು ನಗರದ ರಿಸರ್ವ ಎಸ್ಸೈಆಗಿದ್ದರೆ, ತಂಗಿ ರುಬೀನಾ ಬಾನು. ಚಿಕ್ಕಮಗಳೂರು ನಗರಠಾಣೆಯಲ್ಲಿ ಎಸ್ಸೈಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಇಂತಹ ಅಪರೂಪ ಅಧಿಕಾರಿಗಳ ಬಗ್ಗೆ ಎಲ್ಲರಿಗೂ ಕುತೂಹಲ ಇರುವುದು ಸಾಮಾನ್ಯ. ಅಣ್ಣ-ತಂಗಿ ಒಂದೇ ಇಲಾಖೆಯಲ್ಲಿ ಕೆಲಸ ಮಾಡಲು ಕಾರಣ, ಪ್ರೇರಣೆ ಮತ್ತಿತರ ಸಂಗತಿಗಳ ಬಗ್ಗೆ ಮುಹಮ್ಮದ್ ಪೈಗಂಬರ್ ಲಾಲೂಸಾಬ್ ಜಂಗ್ಲಿ ಅವರು ವಾರ್ತಾಭಾರತಿಯೊಂದಿಗೆ ಮಾತನಾಡಿದ್ದಾರೆ.

ವಾ.ಭಾ: ನಿಮ್ಮ ಹುಟ್ಟೂರು, ಶೈಕ್ಷಣಿಕ ಹಿನ್ನೆಲೆ, ಕುಟುಂಬದ ಬಗ್ಗೆ ಸ್ವಲ್ಪ ಮಾಹಿತಿ ಹಂಚಿಕೊಳ್ಳುತ್ತೀರಾ?

► ನಮ್ಮ ಹುಟ್ಟೂರು ಬಾಗಲಕೋಟೆ ಜಿಲ್ಲೆ ಜಮಖಂಡಿ ತಾಲೂಕು ಹಿಪ್ಪರಗಿ ಗ್ರಾಮ. ಅತ್ಯಂತ ಕಡುಬಡತನದ ಕುಟುಂಬ ನಮ್ಮದು. 6 ವರ್ಷಗಳ ಕಾಲ ಧಾರವಾಡದಲ್ಲಿ ಶಿಕ್ಷಣ ಪಡೆದಿದ್ದೇನೆ. ನಾನು ಹಾಗೂ ನನ್ನ ಸಹೋದರಿ ರುಬೀನಾ ಬಾನು ಇಬ್ಬರು ಪದವಿ ಶಿಕ್ಷಣ ಪೂರೈಸಿದ ಬಳಿಕ ಇಲಾಖೆಯ ಸಬ್ ಇನ್‌ಸ್ಪೆಕ್ಟರ್ ಪರೀಕ್ಷೆ ಬರೆದು ನೇಮಕಗೊಂಡಿದ್ದೇವೆ. ಕಂಡಕ್ಟರ್ ಆದರೆ, ಸಾಕೆಂಬುದು ಹೆತ್ತವರ ಬಯಕೆಯಾಗಿತ್ತು. ಪದವಿ ಶಿಕ್ಷಣದ ಬಳಿಕ ನಾನು ಎದುರಿಸಿದ ಮೊದಲ ಪರೀಕ್ಷೆಯಲ್ಲೇ ನೇಮಕಗೊಂಡಿದ್ದೇನೆ. ಪರೀಕ್ಷಾ ಸಿದ್ಧತೆಗಾಗಿ ಯಾವುದೇ ಕೋಚಿಂಗ್ ಕ್ಲಾಸ್‌ಗಳಿಗೂ ಹೋಗಿಲ್ಲ. ನನ್ನ ಸಹೋದರಿ ರುಬೀನಾ ಪದವಿ ಮುಗಿಸಿ ಒಂದೇ ವರ್ಷಕ್ಕೆ ಎಸ್ಸೈ ಹುದ್ದೆಗೆ ನೇಮಕವಾಗಿದ್ದಾರೆ. ತಂಗಿ ರುಬೀನಾ ಬಾನು ಕೂಡ ಕೋಚಿಂಗ್ ಪಡೆದಿಲ್ಲ. ಆಕೆಗೆ ನಾನೇ ಕೋಚ್.

ವಾ.ಭಾ: ನಿಮ್ಮ ಮೊದಲ ಪೋಸ್ಟಿಂಗ್ ಎಲ್ಲಿ?

► ನೇಮಕಾತಿ ಬಳಿಕ ನನ್ನನ್ನು ಮಂಗಳೂರು ಪೊಲೀಸ್ ವಲಯಕ್ಕೆ ಕರ್ತವ್ಯಕ್ಕೆ ನೇಮಿಸಲಾಯಿತು. ನನ್ನ ಸಹೋದರಿಯನ್ನು ಬೆಂಗಳೂರು ವಲಯಕ್ಕೆ ನೇಮಿಸಲಾಯಿತು. ಎರಡನೇ ಪೋಸ್ಟಿಂಗ್‌ನಲ್ಲಿ ನನಗೆ ಚಿಕ್ಕಮಗಳೂರು ಜಿಲ್ಲೆಗೆ ವರ್ಗಾವಣೆ ಮಾಡಲಾಯಿತು. ಇಲ್ಲಿ ರಿಸರ್ವ ಸಬ್‌ಇನ್‌ಸ್ಪೆಕ್ಟರ್‌ಆಗಿ ಸೇವೆ ಸಲ್ಲಿಸುತ್ತಿದ್ದೇನೆ. ಇದೇ ವೇಳೆ ನನ್ನ ತಂಗಿಗೂ ಚಿಕ್ಕಮಗಳೂರು ಜಿಲ್ಲೆಗೆ ಎರಡನೇ ಪೋಸ್ಟಿಂಗ್ ಮಾಡಲಾಯಿತು. ಆಕೆ ನಗರಠಾಣೆಯ ಸಿವಿಲ್ ಎಸ್ಸೈ ಆಗಿ ಸೇವೆಯಲ್ಲಿದ್ದಾರೆ.

ವಾ.ಭಾ: ಪೊಲೀಸ್ ಇಲಾಖೆ ಬಗ್ಗೆ ನಿಮಗೆ ಒಲವು ಮೂಡಿದ್ದು ಹೇಗೆ?

ಉತ್ತರ ಕರ್ನಾಟಕ ಭಾಗದಲ್ಲಿ ಪೊಲೀಸ್ ಇಲಾಖೆಯ ಬಗ್ಗೆ ಜನರು ಅತ್ಯಂತ ಗೌರವದ ಭಾವನೆ ಹೊಂದಿದ್ದಾರೆ. ಪೊಲೀಸ್ ಇಲಾಖೆಯಲ್ಲಿ ಕೆಲಸ ಮಾಡುವವರನ್ನೂ ಅಲ್ಲಿನ ಜನರು ಗೌರವದಿಂದ ಕಾಣುತ್ತಾರೆ. ಪೊಲೀಸ್ ಪೇದೆಗೂ ಎಸ್ಪಿಗೆ ನೀಡುವ ಗೌರವ ನೀಡುತ್ತಾರೆ. ಈ ಹಿನ್ನೆಲೆಯಲ್ಲಿ ನನಗೆ ಪಿಯುಸಿ ಓದುತ್ತಿದ್ದಾಗಲೇ ಪೊಲೀಸ್ ಇಲಾಖೆಗೆ ಸೇರಬೇಕೆಂಬ ಕನಸಿತ್ತು. ಅದರಲ್ಲೂ ಡಬಲ್ ಸ್ಟಾರ್ ಇರುವ ಯೂನಿಫಾರ್ಮ್ ತೊಡಬೇಕೆಂಬುದು ನನ್ನ ಮನದ ಬಯಕೆಯಾಗಿತ್ತು.

ವಾ.ಭಾ: ಪೊಲೀಸ್ ಇಲಾಖೆಗೆ ಸೇರಲು ಮುಖ್ಯ ಕಾರಣ ಏನಾದರೂ ಇದೆಯೇ?

► ಸಾಮಾಜದ ಸ್ವಾಸ್ಥ ಕಾಪಾಡುವ ನಿಟ್ಟಿನಲ್ಲಿ ಪೊಲೀಸ್ ಇಲಾಖೆಗೆ ಮಹತ್ತರವಾದ ಜವಬ್ದಾರಿ ಇದೆ. ಈ ಇಲಾಖೆ ಇಡೀ ಸಾಮಾಜವನ್ನು ಕಂಟ್ರೋಲ್ ಮಾಡುತ್ತದೆ. ಮುಖ್ಯವಾಗಿ ನೊಂದವರ, ದೀನ ದಲಿತರಿಗೆ ಉತ್ತಮ ಸೇವೆ ನೀಡಲು, ನ್ಯಾಯ ಒದಗಿಸಲು ಇಲಾಖೆಯಲ್ಲಿ ಅಪಾರ ಅವಕಾಶಗಳಿವೆ. ಈ ಹಿನ್ನೆಲೆಯಲ್ಲಿ ಸಮಾಜ ಸೇವೆ ಮಾಡಲು ವಿಪುಲ ಅವಕಾಶಗಳಿರುವ ಪೊಲೀಸ್ ಇಲಾಖೆಗೆ ಸೇರುವುದು ನನ್ನ ಕನಸಾಗಿತ್ತು.

ವಾ.ಭಾ: ನಿಮ್ಮ ಸಹೋದರಿಯೂ ಎಸ್ಸೈ ಆಗಿದ್ದಾರೆ. ಇಬ್ಬರೂ ಒಂದೇ ಇಲಾಖೆಗೆ ಸೇರಿಕೊಳ್ಳಲು ಏನಾದರೂ ಪ್ರಮುಖ ಕಾರಣ ಇದೆಯಾ?

► ನನ್ನ ಓರ್ವ ಸಹೋದರಿಯನ್ನು ಬೇಗನೆ ವಿವಾಹ ಮಾಡಿಕೊಟ್ಟಿದ್ದರಿಂದ ನನಗೆ ಬೇಸರವಾಗಿತ್ತು. ಸಮುದಾಯದಲ್ಲಿ ಸುಧಾರಣೆಯ ಅಗತ್ಯವಿದೆ. ಇದನ್ನು ನಾನು ಇನ್ನೊಬ್ಬರಿಗೆ ಹೇಳುವುದಕ್ಕಿಂತ ನನ್ನ ಕುಟುಂಬದಲ್ಲೇ ಸುಧಾರಣೆ ಮಾಡಲು ಯೋಚಿಸಿದ್ದೆ. ನನ್ನ ಕಿರಿಯ ಸಹೋದರಿಯ ಮೂಲಕ ನಮ್ಮ ಸಮಾಜದ ಮನಃಪರಿವರ್ತನೆ ಮಾಡುವ, ಆಕೆಯನ್ನು ಮತ್ತೋರ್ವ ಹೆಣ್ಣು ಮಕ್ಕಳಿಗೆ ಮಾದರಿಯನ್ನಾಗಿಸುವ ಬಗ್ಗೆ ಯೋಚಿಸಿದ್ದೆ. ಆಕೆಗೆ ಪೊಲೀಸ್ ಇಲಾಖೆಗೆ ಸೇರಲು ಪ್ರೇರೇಪಿಸಿದ್ದೆ. ಪೊಲೀಸ್ ಇಲಾಖೆ ಬಗ್ಗೆ ಅರಿವು ಮೂಡಿಸಿದೆ. ಪರೀಕ್ಷೆ ಬರೆದ ಮೊದಲ ಪ್ರಯತ್ನದಲ್ಲೇ ಆಕೆಯೂ ಎಸ್ಸೈ ಆದಳು. 

ವಾ.ಭಾ: ಮುಸ್ಲಿಮರಲ್ಲಿ ಶಿಕ್ಷಣದ ಕೊರತೆ ಇದೆಯೇ?

► ರಾಜ್ಯದ ದಕ್ಷಿಣ ಭಾಗದಲ್ಲಿನ ಮುಸ್ಲಿಮರಲ್ಲಿ ಶಿಕ್ಷಣದ ಮಹತ್ವ ಇತ್ತೀಚೆಗೆ ಹೆಚ್ಚುತ್ತಿದೆ. ಅದರಲ್ಲೂ ಕರಾವಳಿ ಭಾಗದಲ್ಲಿ ಮುಸ್ಲಿಮರು ಹೆಚ್ಚು ಸುಶಿಕ್ಷಿತವಾಗಿದ್ದಾರೆ. ಆದರೆ, ಉ.ಕ. ಭಾಗದ ಮುಸ್ಲಿಮರಲ್ಲಿ ಶಿಕ್ಷಣ ಕೊರತೆ ಹೆಚ್ಚಿದೆ. ಅದರಲ್ಲೂ ಮಹಿಳಾ ಶಿಕ್ಷಣಕ್ಕೆ ಹೆಚ್ಚು ಆದ್ಯತೆ ನೀಡುತ್ತಿಲ್ಲ. ನಮ್ಮೂರಿನಲ್ಲಿ ಹೆಣ್ಣು ಮಕ್ಕಳನ್ನು ಹೆಚ್ಚೆಂದರೆ ಪಿಯುಸಿವರೆಗೆ ಓದಿಸಲಾಗುತ್ತಿದೆ. ಪಿಯುಸಿ ಓದು ಮುಗಿಯುತ್ತಿದ್ದಂತೆ ಹೆಣ್ಣು ಮಕ್ಕಳಿಗೆ ವಿವಾಹ ಮಾಡುವಂತಹ ಮನೋಭಾವನೆ ಮುಸ್ಲಿಮರಲ್ಲಿದೆ. ಮುಸ್ಲಿಮ್ ಹೆಣ್ಣು ಮಕ್ಕಳಿಗೆ ಸಾಧನೆ ಮಾಡುವ ಸಾಮರ್ಥ್ಯ, ಅವಕಾಶ ಇದ್ದಾಗ್ಯೂ ಅದಕ್ಕೆ ಕೌಂಟುಂಬಿಕ ವ್ಯವಸ್ಥೆಯೊಳಗೆ ಪ್ರೋತ್ಸಾಹ ಸಿಗುತ್ತಿಲ್ಲ. ಹೆಣ್ಣು ಮಕ್ಕಳ ಸಾಧನೆ, ಶಿಕ್ಷಣಕ್ಕೆ ಕಟ್ಟುಪಾಡುಗಳು ತೊಡಕಾಗಿವೆ. ಮಹಿಳೆಯರ ಆಸೆ, ಆಕಾಂಕ್ಷೆಗಳನ್ನು ಅಡುಗೆ ಮನೆಗೆ ಮಾತ್ರ ಸೀಮಿತಗೊಳಿಸುವಂತಹ ಮನೋಭಾವ ಮುಸ್ಲಿಮರಲ್ಲೂ ಇದೆ. 

ವಾ.ಭಾ: ಪೊಲೀಸ್ ಇಲಾಖೆಗೆ ಸೇರಲು ಲಂಚ, ಶಿಫಾರಸು ಬೇಕೆನ್ನುತ್ತಾರಲ್ಲಾ?

► ನಾನು 25ನೇ ವಯಸ್ಸಿಗೆ ಎಸ್ಸೈಆಗಿದ್ದೇನೆ. ನನ್ನ ಸಹೋದರಿ ಪದವಿ ಶಿಕ್ಷಣ ಪೂರೈಸಿದ 1 ವರ್ಷದ ಬಳಿಕ ಎಸ್ಸೈ ಆಗಿದ್ದಾಳೆ. ಪರೀಕ್ಷೆ ಎದುರಿಸುವಲ್ಲಿ ಆಕೆಯೂ ಯಾವುದೇ ಕೋಚಿಂಗ್ ಹೋಗದೆ ಕಷ್ಟಪಟ್ಟು ಓದಿದ್ದೇವೆ. ಯಾರಿಂದಲೂ ಶಿಫಾರಸು ಮಾಡಿಸುವ ಕೆಲಸಕ್ಕೆ ಕೈ ಹಾಕಿಲ್ಲ. ಗುರಿ ಹಾಗೂ ಪರಿಶ್ರಮ ಇದ್ದರೇ ಇವುಗಳ ಅಗತ್ಯವೂ ಇಲ್ಲ. ಇಲಾಖೆಯಲ್ಲಿ ಲಂಚ ನೀಡಿದರೆ, ಶಿಫಾರಸು ಮಾಡಿಸಿದರೆ ಮಾತ್ರ ಕೆಲಸ ಎಂಬ ಬಗ್ಗೆ ಸಾರ್ವಜನಿಕವಾಗಿ ಒಂದು ತಪ್ಪು ಕಲ್ಪನೆ ಇದೆ.

ವಾ.ಭಾ: ಇಲಾಖೆಯಲ್ಲಿ ನಿಮ್ಮನ್ನು ಹೇಗೆ ಕಾಣಲಾಗುತ್ತಿದೆ?

► ಇಲಾಖೆಯಲ್ಲಿ ಕೆಲಸ ಮಾಡುತ್ತಿರುವುದಕ್ಕೆ ಹೆಮ್ಮೆ ಇದೆ. ಇಲಾಖೆಗೆ ಸೇರಿ ನನಗೆ 4 ವರ್ಷಗಳ ಅನುಭವ, ನನ್ನ ತಂಗಿಗೆ ಮೂರು ವರ್ಷಗಳ ಅನುಭವ ಆಗಿದೆ. ಈ ಅವಧಿಯಲ್ಲಿ ಜಾತಿ, ಧರ್ಮದ ಕಾರಣಕ್ಕೆ ತಾತ್ಸಾರ, ತಾರತಮ್ಯದಂತಹ ಘಟನೆಗಳು ಒಮ್ಮೆಯೂ ಸಂಭವಿಸಿಲ್ಲ. ಇಲಾಖೆಯಲ್ಲಿ ಇಂತಹದ್ದಕ್ಕೆಲ್ಲ ಅವಕಾಶವೂ ಇಲ್ಲ. ಇಲಾಖೆಯ ಬಗ್ಗೆ ಸಮಾಜದಲ್ಲೇ ಪೂರ್ವಗ್ರಹವಿದೆ. ಹೆಣ್ಣು ಮಕ್ಕಳು ಪೊಲೀಸ್ ಇಲಾಖೆಯಲ್ಲಿ ಕೆಲಸ ಮಾಡುವುದಕ್ಕೆ ಮೂಗುಮುರಿಯುವವರಿದ್ದಾರೆ. 

ವಾ.ಭಾ: ಇಲಾಖೆಗೆ ಸೇರ ಬಯಸುವವರಿಗೆ, ಯುವಜನರಿಗೆ ನಿಮ್ಮ ಸಲಹೆ ಏನು?

► ಸಮಾಜದಲ್ಲಿ ಪ್ರಬಲ ಸಮುದಾಯಗಳಿಗೆ ಮಾತ್ರ ಅವಕಾಶ, ಸರಕಾರಿ ಕೆಲಸ, ಉನ್ನತ ಹುದ್ದೆ ಸಿಗುತ್ತದೆ ಎಂಬ ಮನೋಭಾವನೆ ಇದೆ. ಹಿಂದಿನಿಂದಲೂ ಈ ಪೂರ್ವಗ್ರಹ ಬೆಳೆದು ಬಂದಿದೆ. ಮುಸ್ಲಿಮರಲ್ಲಿಯೂ ಈ ಪೂರ್ವಗ್ರಹವಿದೆ. ಈ ಮನೋಭಾವನೆಯಿಂದಾಗಿ ಮುಸ್ಲಿಮರು ವ್ಯಾಪಾರ, ವಹಿವಾಟಿನತ್ತ ಹೆಚ್ಚು ಮುಖಮಾಡಿದ್ದಾರೆ. ನಾನು ಎಸ್ಸೈ ನೇಮಕಾತಿ ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿದ್ದ ವೇಳೆ ನನಗೂ ಕೆಲವರು ಕಾಲೆಳೆದಿದ್ದಾರೆ. ಆದರೆ, ನಾನು ಮಾತ್ರ ಉನ್ನತ ವಿಚಾರಗಳು, ನಮ್ಮನ್ನು ಉನ್ನತ ಮಟ್ಟಕ್ಕೆ ಕರೆದೊಯ್ಯುತ್ತವೆ ಎಂಬ ಮಾತಿನಂತೆ ನಡೆದುಕೊಂಡೆ. ಯುವಜನತೆ ಇಂತಹ ಕೀಳರಿಮೆಯಿಂದ ಮೊದಲು ಹೊರಬರಬೇಕು. ಅವಕಾಶಗಳು ಕೇವಲ ಪ್ರಬಲ ಸಮುದಾಯಗಳಿಗೆ ಮಾತ್ರವಲ್ಲ, ದುರ್ಬಲ ಸವುುದಾಯಗಳಿಗೂ ಹೆಚ್ಚು ಅವಕಾಶವಿದೆ.

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

Back to Top