ಕುಸ್ತಿಯಲ್ಲೂ ಗುತ್ತಿಗೆ ಪದ್ಧತಿ
ಬಜರಂಗ್, ವಿನೇಶ್, ಪೂಜಾಗೆ ‘ಎ’, ಸುಶೀಲ್, ಸಾಕ್ಷಿಗೆ ‘ಬಿ’ ಶ್ರೇಣಿ
ಹೊಸದಲ್ಲಿ, ನ.30: ಭಾರತದ ಕುಸ್ತಿ ಒಕ್ಕೂಟ(ಡಬ್ಲ್ಯುಎಫ್ಐ)ಶುಕ್ರವಾರ ಕುಸ್ತಿಪಟುಗಳಿಗೆ ಎ, ಬಿ, ಸಿ ಹಾಗೂ ಡಿ ಶ್ರೇಣಿಯ ಗುತ್ತಿಗೆ ಪದ್ಧತಿ ಜಾರಿ ಮಾಡುವ ಮೂಲಕ ಕ್ರಾಂತಿಕಾರಿ ಹೆಜ್ಜೆ ಇಟ್ಟಿದೆ. ಸ್ಟಾರ್ ಕುಸ್ತಿಪಟುಗಳಾದ ಬಜರಂಗ್ ಪೂನಿಯ ಹಾಗೂ ವಿನೇಶ್ ಫೋಗಟ್ ಜೊತೆಗೆ ಪೂಜಾ ಧಾಂಡಾ ‘ಎ’ ಶ್ರೇಣಿಯಲ್ಲಿ ಸ್ಥಾನ ಪಡೆದಿದ್ದಾರೆ. ‘ಎ’ ಶ್ರೇಣಿಯ ಕುಸ್ತಿಪಟುಗಳು ವರ್ಷಕ್ಕೆ 30 ಲಕ್ಷ ರೂ. ಸಂಭಾವನೆ ಪಡೆಯಲಿದ್ದಾರೆ.
ಈ ವರ್ಷ ಕಾಮನ್ವೆಲ್ತ್ ಗೇಮ್ಸ್ ಹಾಗೂ ಏಶ್ಯನ್ ಗೇಮ್ಸ್ನಲ್ಲಿ ಚಿನ್ನದ ಪದಕ ಜಯಿಸಿದ್ದ ಬಜರಂಗ್ ಹಾಗೂ ವಿನೇಶ್ಗೆ ನಿರೀಕ್ಷೆಯಂತೆಯೇ ‘ಎ’ ಶ್ರೇಣಿ ನೀಡಲಾಗಿದೆ. ಇತ್ತೀಚೆಗೆ ಕೊನೆಗೊಂಡ ವಿಶ್ವ ಚಾಂಪಿಯನ್ಶಿಪ್ನಲ್ಲಿ ಪೂಜಾ ಪದಕ ಜಯಿಸಿರುವ ಭಾರತದ ನಾಲ್ಕನೇ ಕುಸ್ತಿತಾರೆ ಎನಿಸಿಕೊಂಡಿದ್ದರು.
ಕಳಪೆ ಫಾರ್ಮ್ನಲ್ಲಿರುವ ಎರಡು ಬಾರಿಯ ಒಲಿಂಪಿಕ್ಸ್ ಚಾಂಪಿಯನ್ ಸುಶೀಲ್ ಕುಮಾರ್ ಹಾಗೂ ರಿಯೋ ಒಲಿಂಪಿಕ್ಸ್ನಲ್ಲಿ ಕಂಚಿನ ಪದಕ ವಿಜೇತೆ ಸಾಕ್ಷಿ ಮಲಿಕ್ ‘ಎ’ ಶ್ರೇಣಿಯಲ್ಲಿ ಸ್ಥಾನ ಪಡೆಯಲು ವಿಫಲರಾದರು.
ಈ ಇಬ್ಬರು ಕುಸ್ತಿಪಟುಗಳು ‘ಬಿ’ ಶ್ರೇಣಿ ಪಡೆದಿದ್ದಾರೆ. ‘ಬಿ’ ಶ್ರೇಣಿಯ ಕುಸ್ತಿಪಟುಗಳು ವಾರ್ಷಿಕ 20 ಲಕ್ಷ ರೂ. ಸ್ವೀಕರಿಸಲಿದ್ದಾರೆ. ಒಂದು ವರ್ಷದ ಬಳಿಕ ಒಪ್ಪಂದ ನವೀಕರಿಸಲಾಗುತ್ತದೆ.
‘ಸಿ’ ಶ್ರೇಣಿಯ ಕುಸ್ತಿಪಟುಗಳು ವರ್ಷಕ್ಕೆ 10 ಲಕ್ಷ ರೂ. ಪಡೆಯಲಿದ್ದು, ಸಿ ಶ್ರೇಣಿಯಲ್ಲಿ ಸಂದೀಪ್ ಥೋಮರ್, ಗ್ರೀಕೊ ರೋಮನ್ ಕುಸ್ತಿಪಟು ಸಾಜನ್ ಭನ್ವಾಲ್, ವಿನೋದ್ ಓಂ ಪ್ರಕಾಶ್, ರಿತು ಫೋಗಟ್, ಸುಮಿತ್ ಮಲಿಕ್, ದೀಪಕ್ ಪೂನಿಯಾ ಹಾಗೂ ದಿವ್ಯಾ ಕಕ್ರಾನ್ ಅವರಿದ್ದಾರೆ.
‘ಡಿ’ ಶ್ರೇಣಿಯಲ್ಲಿರುವ ಕುಸ್ತಿಪಟುಗಳಿಗೆ ವಾರ್ಷಿಕ 5 ಲಕ್ಷ ರೂ. ನೀಡಲಾಗುತ್ತದೆ. ರಾಹುಲ್ ಅವಾರೆ, ನವೀನ್, ಸಚಿನ್ ರಥಿ, ಗ್ರೀಕೊ ರೊಮನ್ ವಿಜಯ್, ರವಿ ಕುಮಾರ್, ಸಿಮ್ರನ್, ಮಾನ್ಸಿ ಹಾಗೂ ಅಂಶು ಮಲಿಕ್ ಅವರಿದ್ದಾರೆ.
ಇಲ್ಲಿನ ನಂದಿನಿ ನಗರದಲ್ಲಿ ಹಿರಿಯರ ರಾಷ್ಟ್ರಿಯ ಕುಸ್ತಿ ಚಾಂಪಿಯನ್ಶಿಪ್ನ್ನು ಉತ್ತರಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಉದ್ಘಾಟಿಸಿದ್ದು, ಈ ಸಂದರ್ಭದಲ್ಲಿ ಡಬ್ಲುಎಫ್ಐ ಅಧ್ಯಕ್ಷ ಬ್ರಿಜ್ಭೂಷಣ್ ಶರಣ್ ಸಿಂಗ್ ಕುಸ್ತಿಪಟುಗಳ ಒಪ್ಪಂದ ಪಟ್ಟಿಯನ್ನು ಘೋಷಿಸಿದರು.