ಇಂದು ಫೈನಲ್: ಚಾಂಪಿಯನ್ ಫ್ರಾನ್ಸ್ ಗೆ ಅರ್ಜೆಂಟೀನ ಎದುರಾಳಿ
-
Photo : twitter/FIFAWorldCup
ದೋಹಾ, ಡಿ.18: ಸುಮಾರು ಒಂದು ತಿಂಗಳಿನಿಂದ ಅರಬರ ನಾಡಿನಲ್ಲಿ ನಡೆಯುತ್ತಿರುವ ಫುಟ್ಬಾಲ್ ಹಬ್ಬ ಫಿಫಾ ವಿಶ್ವಕಪ್ ರವಿವಾರ ಕ್ಲೈಮ್ಯಾಕ್ಸ್ ಹಂತ ತಲುಪಲಿದ್ದು, ಲಿಯೊನೆಲ್ ಮೆಸ್ಸಿ ನೇತೃತ್ವದ ಅರ್ಜೆಂಟೀನ ತಂಡ ಹಾಲಿ ಚಾಂಪಿಯನ್ ಫ್ರಾನ್ಸ್ ತಂಡವನ್ನು ಪ್ರಶಸ್ತಿ ಸುತ್ತಿನಲ್ಲಿ ಮುಖಾಮುಖಿಯಾಗಲಿದೆ. ಮೆಸ್ಸಿ ಅವರು ಮಿರುಗುವ ಟ್ರೋಫಿಗೆ ಮುತ್ತಿಡುವ ಮೂಲಕ 1986ರಲ್ಲಿ ಲೆಜೆಂಡರಿ ಡಿಗೊ ಮರಡೋನ ನಿರ್ಮಿಸಿರುವ ದಾಖಲೆಯನ್ನು ಸರಿಗಟ್ಟುವ ವಿಶ್ವಾಸದಲ್ಲಿದ್ದಾರೆ. ಫ್ರಾನ್ಸ್ ತಂಡ 1962ರ ನಂತರ ಪ್ರಶಸ್ತಿಯನ್ನು ತನ್ನಲ್ಲೇ ಉಳಿಸಿಕೊಂಡ ಮೊದಲ ತಂಡವೆಂಬ ಕೀರ್ತಿಗೆ ಭಾಜನವಾಗಿ ಇತಿಹಾಸ ನಿರ್ಮಿಸುವ ಉತ್ಸಾಹದಲ್ಲಿದೆ.
ಅರಬ್ ದೇಶದಲ್ಲಿ ಮೊದಲ ಬಾರಿ ಆಯೋಜಿಸಲ್ಪಟ್ಟ ವಿಶ್ವಕಪ್ ಎಲ್ಲ ನಿರೀಕ್ಷೆಯನ್ನು ಮೀರಿ ಯಶಸ್ಸು ಸಾಧಿಸಿದೆ. ವಿಶ್ವದ ಎರಡನೇ ಅತ್ಯಂತ ದೊಡ್ಡ ಕ್ರೀಡಾ ಸ್ಪರ್ಧೆ ಫುಟ್ಬಾಲ್ ವಿಶ್ವಕಪ್ ಆತಿಥ್ಯಕ್ಕೆ ಪುಟ್ಟ ರಾಷ್ಟ್ರ ಖತರ್ ಅನ್ನು ಆಯ್ಕೆ ಮಾಡಿದ್ದನ್ನು ಟೀಕಿಸಿ ಸಾಕಷ್ಟು ಬರೆಯಲಾಯಿತು. ವಿಶ್ವಕಪ್ ಮುಗಿದ ಬಳಿಕವೂ ಈ ಕುರಿತಾಗಿ ಚರ್ಚೆ ಮುಂದುವರಿಯುವ ಸಾಧ್ಯತೆಯಿದೆ.
ಸ್ಟಾರ್ ಆಟಗಾರರಾದ ಮೆಸ್ಸಿ, ಕಿಲಿಯನ್ ಎಂಬಾಪೆ, ನೇಮರ್ ಹಾಗೂ ಕ್ರಿಸ್ಟಿಯಾನೊ ರೊನಾಲ್ಡೊ ಮೈದಾನದಲ್ಲಿ ಮಿಂಚು ಹರಿಸಿದ್ದಾರೆ. ಸೌದಿ ಅರೇಬಿಯ, ಜಪಾನ್, ದಕ್ಷಿಣ ಕೊರಿಯಾ ಹಾಗೂ ಟ್ಯುನೀಶಿಯ ಬಲಿಷ್ಠ ತಂಡಕ್ಕೆ ಮಣ್ಣುಮುಕ್ಕಿಸಿ ಗಮನ ಸೆಳೆದವು. ಹೊಸ ಹೀರೊಗಳು ಉದಯಿಸಿದರು. ಅಟ್ಲಾಸ್ ಲಯನ್ಸ್ ಖ್ಯಾತಿಯ ಮೊರೊಕ್ಕೊ ವಿಶ್ವಕಪ್ ಇತಿಹಾಸದಲ್ಲಿ ಮೊದಲ ಬಾರಿ ಸೆಮಿ ಫೈನಲ್ಗೆ ತಲುಪಿ ಘರ್ಜಿಸಿದಾಗ ಆ ತಂಡದ ಸಾವಿರಾರು ಅಭಿಮಾನಿಗಳು ಭಾರೀ ಸಂಭ್ರಮಪಟ್ಟರು. ಮೊರೊಕ್ಕೊ ತಂಡ ಬೆಲ್ಜಿಯಮ್, ಸ್ಪೇನ್ ಹಾಗೂ ಪೋರ್ಚುಗಲ್ ತಂಡವನ್ನು ಸೋಲಿಸಿ ಅಂತಿಮ-4 ಸುತ್ತು ತಲುಪಿದ ಮೊದಲ ಆಫ್ರಿಕನ್ ಹಾಗೂ ಮೊದಲ ಅರಬ್ ರಾಷ್ಟ್ರ ಎನಿಸಿಕೊಂಡಿತು.
ಸರಿಸುಮಾರು 4 ವಾರಗಳ ಹಿಂದೆ ಸೌದಿ ಅರೇಬಿಯ ವಿರುದ್ಧ ಆಡಿದ ತನ್ನ ಮೊದಲ ಗ್ರೂಪ್ ಪಂದ್ಯದಲ್ಲಿ 1-2 ಅಂತರದಿಂದ ಸೋಲನುಭವಿಸಿದ ಅರ್ಜೆಂಟೀನ ವಿಶ್ವಕಪ್ನಲ್ಲಿ ಆಘಾತ ಅನುಭವಿಸಿತ್ತು. ಈ ಸೋಲಿನಿಂದ ಬೇಗನೆ ಪುಟಿದೆದ್ದ ಮೆಸ್ಸಿ ಬಳಗ ಇದೀಗ ಫೈನಲ್ ಹಂತ ತಲುಪಿದೆ. ಸೋಲಿನೊಂದಿಗೆ ಆರಂಭಿಸಿದ ತನ್ನ ವಿಶ್ವಕಪ್ ಅಭಿಯಾನವನ್ನು ಗೆಲುವಿನೊಂದಿಗೆ ಅಂತ್ಯಗೊಳಿಸುವ ವಿಶ್ವಾಸದಲ್ಲಿದೆ.
ಫ್ರಾನ್ಸ್ ತಂಡ ಕೂಡ ಗ್ರೂಪ್ ಹಂತದ ಕೊನೆಯ ಪಂದ್ಯದಲ್ಲಿ ಟ್ಯುನೀಶಿಯ ವಿರುದ್ಧ 0-1 ಅಂತರದಿಂದ ಆಘಾತಕಾರಿ ಸೋಲನುಭವಿಸಿತ್ತು. ಎಂಬಾಪೆಗೆ ಆ ಪಂದ್ಯದಲ್ಲಿ ವಿಶ್ರಾಂತಿ ನೀಡಿದ್ದ ಫ್ರಾನ್ಸ್ ಹೊಸ ಆಟಗಾರರಿಗೆ ಅವಕಾಶ ನೀಡಿತ್ತು. ಈ ಸೋಲು ಅದರ ಫೈನಲ್ ಹಾದಿಗೆ ಅಡ್ಡಿಯಾಗಲಿಲ್ಲ.
ರೊನಾಲ್ಡೊ ತನ್ನ ಕೊನೆಯ ವಿಶ್ವಕಪ್ನಲ್ಲಿ ಕಾಣಿಸಿಕೊಂಡಿದ್ದು, ಐದು ವಿಶ್ವಕಪ್ನಲ್ಲಿ ಗೋಲು ಗಳಿಸಿದ ಮೊದಲ ಆಟಗಾರ ಎನಿಸಿಕೊಂಡು ದಾಖಲೆ ಬರೆದರು. ಮೊರೊಕ್ಕೊ ವಿರುದ್ಧ ಕ್ವಾರ್ಟರ್ ಫೈನಲ್ನಲ್ಲಿ ಬದಲಿ ಅಟಗಾರನಾಗಿ ರೊನಾಲ್ಡೊ ಕಣಕ್ಕಿಳಿದಿದ್ದರು. ಪೋರ್ಚುಗಲ್ 0-1ರಿಂದ ಸೋತ ಕಾರಣ ವಿಶ್ವಕಪ್ಗೆ ಕಣ್ಣೀರಿನ ವಿದಾಯ ಹೇಳಿದರು. ಕ್ರೊಯೇಶಿಯ ವಿರುದ್ಧ ಕ್ವಾರ್ಟರ್ ಫೈನಲ್ನಲ್ಲಿ ಬ್ರೆಝಿಲ್ ಪೆನಾಲ್ಟಿ ಶೂಟೌಟ್ನಲ್ಲಿ ಸೋಲುಂಡ ಕಾರಣ ನೇಮರ್ ಅವರ ವಿಶ್ವಕಪ್ ಕನಸು ಕೈಗೂಡಲಿಲ್ಲ. ನೇಮರ್ ಕೂಡ ವಿಶ್ವಕಪ್ ಗೆಲ್ಲಲಾಗದೆ ನೋವಿನಲ್ಲಿ ಕಣ್ಣೀರಿಟ್ಟರು.
► 36 ವರ್ಷಗಳ ಪ್ರಶಸ್ತಿ ಬರ ನೀಗಿಸಿಕೊಳ್ಳುವ ವಿಶ್ವಾಸದಲ್ಲಿ ಅರ್ಜೆಂಟೀನ
ಈ ಹಿಂದೆ ಎರಡು ಬಾರಿ ವಿಶ್ವಕಪ್ ಟ್ರೋಫಿಯನ್ನು ಜಯಿಸಿರುವ ಅರ್ಜೆಂಟೀನ ಹಾಗೂ ಫ್ರಾನ್ಸ್ ತಂಡಗಳು ತಮ್ಮ ಮೂರನೇ ಪ್ರಶಸ್ತಿಗಾಗಿ ರವಿವಾರ ಖತರ್ನ ಲುಸೈಲ್ ಸ್ಟೇಡಿಯಮ್ನಲ್ಲಿ ಸೆಣಸಾಡಲಿವೆ.
ಉಭಯ ತಂಡಗಳು ಮೂರನೇ ಬಾರಿ ಪ್ರಶಸ್ತಿ ಗೆಲ್ಲಲು ಇನ್ನೊಂದು ತಡೆ ದಾಟಬೇಕಾಗಿದೆ. 1986ರಲ್ಲಿ ಕೊನೆಯ ಬಾರಿ ವಿಶ್ವಕಪ್ ಜಯಿಸಿದ್ದ ಅರ್ಜೆಂಟೀನದ 36 ವರ್ಷಗಳ ಕಾಯುವಿಕೆಗೆ ಅಂತ್ಯ ಹಾಡಲು ಬಯಸಿದೆ. ಸ್ಟಾರ್ ಆಟಗಾರ ಲಿಯೊನೆಲ್ ಮೆಸ್ಸಿ ತನ್ನ ಕೊನೆಯ ಪಂದ್ಯದಲ್ಲಿ ಮೊತ್ತ ಮೊದಲ ವಿಶ್ವಕಪ್ ಪ್ರಶಸ್ತಿ ಎತ್ತಿ ಹಿಡಿಯುವ ಕನಸು ಕಾಣುತ್ತಿದ್ದಾರೆ.
ಒಂದು ವೇಳೆ ಅರ್ಜೆಂಟೀನ ಪ್ರಶಸ್ತಿ ಜಯಿಸಿದರೆ ಮೂರು ಇಲ್ಲವೇ ಅದಕ್ಕಿಂತ ಹೆಚ್ಚು ವಿಶ್ವಕಪ್ ಪ್ರಶಸ್ತಿ ಜಯಿಸಿದ ವಿಶ್ವದ ನಾಲ್ಕನೇ ತಂಡ ಎನಿಸಿಕೊಳ್ಳುತ್ತದೆ. ಒಟ್ಟು 5 ಬಾರಿ ಪ್ರಶಸ್ತಿ ಜಯಿಸಿರುವ ಬ್ರೆಝಿಲ್ ಈಗಲೂ ವಿಶ್ವಕಪ್ನ ಅತ್ಯಂತ ಯಶಸ್ವಿ ತಂಡವಾಗಿದೆ. ಜರ್ಮನಿ ಹಾಗೂ ಇಟಲಿ(ತಲಾ 4) ಆ ನಂತರದ ಸ್ಥಾನದಲ್ಲಿವೆ.
2022ರ ವಿಶ್ವಕಪ್ ಅರ್ಜೆಂಟೀನದ ಪಾಲಾದರೆ ಯುರೋಪ್ ತಂಡಗಳ ಪ್ರಾಬಲ್ಯವನ್ನು ಮುರಿದು 2002ರ ಬ್ರೆಝಿಲ್ ಸಾಧನೆಯ ಬಳಿಕ ವಿಶ್ವಕಪ್ ಗೆದ್ದ ಮೊದಲ ದಕ್ಷಿಣ ಅಮೆರಿಕ ತಂಡ ಎನಿಸಿಕೊಳ್ಳುತ್ತದೆ. ಹಿಂದಿನ ನಾಲ್ಕು ಆವೃತ್ತಿಯ ವಿಶ್ವಕಪ್ಗಳನ್ನು ಯುರೋಪ್ ತಂಡಗಳಾದ ಇಟಲಿ-2006, ಸ್ಪೇನ್-2010, ಜರ್ಮನಿ-2014 ಹಾಗೂ ಫ್ರಾನ್ಸ್-2018 ಗೆದ್ದುಕೊಂಡಿದ್ದವು.
ಅರ್ಜೆಂಟೀನ 1978 ಹಾಗೂ 1986ರಲ್ಲಿ ಪ್ರಶಸ್ತಿ ಜಯಿಸಿತ್ತು. ಆದರೆ 1930, 1990 ಹಾಗೂ 2014ರ ಆವೃತ್ತಿಯಲ್ಲಿ ಫೈನಲ್ನಲ್ಲಿ ಎಡವಿತ್ತು. ಫ್ರಾನ್ಸ್ ತಂಡವನ್ನು ಫೈನಲ್ನಲ್ಲಿ ಮಣಿಸಿದರೆ ಅರ್ಜೆಂಟೀನ ತಂಡ 2002ರ ಬಳಿಕ ವಿಶ್ವಕಪ್ ಫೈನಲ್ನಲ್ಲಿ ಯುರೋಪ್ನ ಎದುರಾಳಿಯನ್ನು ಮಣಿಸಿದ ಮೊದಲ ದಕ್ಷಿಣ ಅಮೆರಿಕ ತಂಡವೆಂಬ ಹಿರಿಮೆಗೆ ಪಾತ್ರವಾಗಲಿದೆ. ಬ್ರೆಝಿಲ್ 2002ರ ಫೈನಲ್ನಲ್ಲಿ ಜರ್ಮನಿಯನ್ನು 2-0 ಅಂತರದಿಂದ ಮಣಿಸಿತ್ತು. ಮೆಸ್ಸಿ ಫೈನಲ್ನಲ್ಲಿ ಇನ್ನೊಂದು ಗೋಲು ಗಳಿಸಿದರೆ ಒಂದೇ ಆವೃತ್ತಿಯ ವಿಶ್ವಕಪ್ನಲ್ಲಿ ಆರನೇ ಗೋಲು ಗಳಿಸಿದಂತಾಗುತ್ತದೆ. ಒಂದೇ ಆವೃತ್ತಿಯ ವಿಶ್ವಕಪ್ನಲ್ಲಿ ಅವರು ಗಳಿಸಿದ ಗರಿಷ್ಠ ಗೋಲು ಇದಾಗುತ್ತದೆ. ಬ್ರೆಝಿಲ್ನಲ್ಲಿ ನಡೆದ 2014ರ ಆವೃತ್ತಿಯಲ್ಲಿ 5 ಗೋಲು ಗಳಿಸಿದ್ದರು.
► ಐತಿಹಾಸಿಕ ಸಾಧನೆಯತ್ತ ಫ್ರಾನ್ಸ್ ಚಿತ್ತ
ರವಿವಾರದ ಫೈನಲ್ನಲ್ಲಿ ಫ್ರಾನ್ಸ್ ತಂಡ ಅರ್ಜೆಂಟೀನವನ್ನು ಮಣಿಸಿ 60 ವರ್ಷಗಳ ಬಳಿಕ ಪ್ರಶಸ್ತಿಯನ್ನು ತನ್ನಲ್ಲೇ ಉಳಿಸಿಕೊಂಡ ಮೊದಲ ತಂಡ ಎನಿಸಿಕೊಳ್ಳುವತ್ತ ಚಿತ್ತಹರಿಸಿದೆ. 1962ರಲ್ಲಿ ಬ್ರೆಝಿಲ್ ತಂಡ ಈ ಸಾಧನೆ ಮಾಡಿತ್ತು. ಬ್ರೆಝಿಲ್ 1958ರ ಆವೃತ್ತಿಯಲ್ಲ್ಲೂ ಪ್ರಶಸ್ತಿ ಗೆದ್ದುಕೊಂಡಿತ್ತು.
ಒಂದು ವೇಳೆ ಫ್ರಾನ್ಸ್ ಮತ್ತೊಮ್ಮೆ ವಿಶ್ವಕಪ್ ಜಯಿಸಿದರೆ ಈ ಸಾಧನೆ ಮಾಡಿದ ವಿಶ್ವದ ಮೂರನೇ ತಂಡವೆಂಬ ಕೀರ್ತಿಗೆ ಭಾಜನವಾಗಲಿದೆ. ಇಟಲಿಯು 1934 ಹಾಗೂ 1938 ಹಾಗೂ ಬ್ರೆಝಿಲ್ 1958 ಹಾಗೂ 1962ರಲ್ಲಿ ಈ ದಾಖಲೆ ನಿರ್ಮಿಸಿದ್ದವು. ಫ್ರಾನ್ಸ್ ಕೋಚ್ ಡಿಡಿಯೆರ್ ಡೆಸ್ಚಾಂಪ್ಸ್ 1938ರ ಬಳಿಕ ಸತತ ವಿಶ್ವಕಪ್ ಪ್ರಶಸ್ತಿ ಜಯಿಸಿದ ಮೊದಲ ಕೋಚ್ ಎನಿಸಿಕೊಳ್ಳುವ ವಿಶ್ವಾಸದಲ್ಲಿದ್ದಾರೆ. ಡೆಸ್ಚಾಂಪ್ಸ್ 1998ರಲ್ಲಿ ಫ್ರಾನ್ಸ್ ತಂಡ ವಿಶ್ವಕಪ್ ಗೆದ್ದಾಗ ತಂಡದ ನಾಯಕನಾಗಿದ್ದರು. 2018ರಲ್ಲಿ ಫ್ರಾನ್ಸ್ ಪ್ರಶಸ್ತಿ ಗೆದ್ದಾಗ ಕೋಚ್ ಆಗಿದ್ದರು. ಫ್ರಾನ್ಸ್ ಒಂದು ವೇಳೆ ಮೇಲುಗೈ ಸಾಧಿಸಿದರೆ ವಿಶ್ವಕಪ್ ಫೈನಲ್ನಲ್ಲಿ ಯುರೋಪ್ ತಂಡಗಳ ಪ್ರಾಬಲ್ಯ ಮುಂದುವರಿಯುತ್ತದೆ. 2006ರಿಂದ ಸತತ ಐದನೇ ಆವೃತ್ತಿಯಲ್ಲಿ ಯುರೋಪ್ ತಂಡವೊಂದು ವಿಶ್ವಕಪ್ ಮುಡಿಗೇರಿಸಿಕೊಂಡಂತಾಗುತ್ತದೆ. ಫೈನಲ್ನಲ್ಲಿ ಫ್ರಾನ್ಸ್ ಜಯಭೇರಿ ಬಾರಿಸಿದರೆ ಅರ್ಜೆಂಟೀನ ವಿಶ್ವಕಪ್ ಇತಿಹಾಸದಲ್ಲಿ ನಾಲ್ಕನೇ ಬಾರಿ ರನ್ನರ್ಸ್ ಅಪ್ಗೆ ತೃಪ್ತಿಪಡಬೇಕಾಗುತ್ತದೆ. ಅರ್ಜೆಂಟೀನವು ಈ ಹಿಂದೆ 1930, 1990 ಹಾಗೂ 2014ರಲ್ಲಿ ಫೈನಲ್ನಲ್ಲಿ ಸೋತಿತ್ತು.
► ಚಾಂಪಿಯನ್ ತಂಡಕ್ಕೆ 342 ಕೋ.ರೂ. ಬಹುಮಾನ
ಪ್ರಸಕ್ತ ವಿಶ್ವಕಪ್ನಲ್ಲಿ ಚಾಂಪಿಯನ್ ಪಟ್ಟಕ್ಕೇರುವ ತಂಡ 342 ಕೋ.ರೂ. ಬಹುಮಾನ ಗೆಲ್ಲಲಿದೆ. 2ನೇ ಸ್ಥಾನ ಪಡೆಯುವ ತಂಡ 244 ಕೋ.ರೂ. ತನ್ನದಾಗಿಸಿಕೊಳ್ಳಲಿದೆ.
‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ?
ಬೆಂಬಲಿಸಲು ಇಲ್ಲಿ ಕ್ಲಿಕ್ ಮಾಡಿ
The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request.
Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil.
www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು ' ವಾರ್ತಾ ಭಾರತಿ' ಕಾದಿರಿಸಿದೆ.
ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ. ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.
ಇಂದು ಹೆಚ್ಚು ಓದಿದ್ದು
ಎಂ.ಬಿ ಪಾಟೀಲ್ | ಸೂಲಿಬೆಲೆ
