ಬಾಂಗ್ಲಾ ವಿರುದ್ಧ ಕಿವೀಸ್ಗೆ ಟ್ವೆಂಟಿ-20 ಸರಣಿ ಜಯ
ಮೂರನೆ ಪಂದ್ಯದಲ್ಲಿ 27 ರನ್ಗಳ ಜಯ * ಸರಣಿ 3-0 ಕ್ಲೀನ್ ಸ್ವೀಪ್
ವೌಂಟ್ ವೌಂಗನುಯಿ ಜ.8: ಆಲ್ರೌಂಡರ್ ಕೋರಿ ಆ್ಯಂಡರ್ಸನ್ 41 ಎಸೆತಗಳಲ್ಲಿ ಬಾರಿಸಿದ 94 ರನ್ಗಳ ನೆರವಿನಲ್ಲಿ ನ್ಯೂಝಿಲೆಂಡ್ ತಂಡ ಇಲ್ಲಿ ನಡೆದ ಎರಡನೆ ಟ್ವೆಂಟಿ-20 ಪಂದ್ಯದಲ್ಲಿ ಬಾಂಗ್ಲಾ ವಿರುದ್ಧ 27 ರನ್ಗಳ ಜಯ ಗಳಿಸಿದೆ.
ಇಲ್ಲಿನ ಬೇ ಓವಲ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಗೆಲುವಿಗೆ 195 ರನ್ಗಳ ಸವಾಲು ಪಡೆದ ಬಾಂಗ್ಲಾದೇಶ ತಂಡ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟದಲ್ಲಿ 167 ರನ್ ಗಳಿಸಿತು. ಈ ಗೆಲುವಿನೊಂದಿಗೆ ನ್ಯೂಝಿಲೆಂಡ್ 3 ಪಂದ್ಯಗಳ ಸರಣಿಯಲ್ಲಿ 3-0 ಗೆಲುವಿನೊಂದಿಗೆ ಕ್ಲೀನ್ ಸ್ವೀಪ್ ಸಾಧಿಸಿತು.
ಬಾಂಗ್ಲಾಕ್ಕೆ ಸವಾಲು ಕಠಿಣವಾಗಿದ್ದರೂ ಮೊದಲ 6 ಓವರ್ಗಳಲ್ಲಿ 1 ವಿಕೆಟ್ ನಷ್ಟದಲ್ಲಿ 69 ರನ್ ಗಳಿಸುವ ಮೂಲಕ ದಿಟ್ಟ ಹೆಜ್ಜೆ ಇರಿಸಿತ್ತು. ಆದರೆ ಬಳಿಕ ನ್ಯೂಝಿಲೆಂಡ್ ಬೌಲರ್ಗಳ ದಾಳಿಯನ್ನು ಎದುರಿಸುವಲ್ಲಿ ಮುಗ್ಗರಿಸಿತು.
ಆರಂಭಿಕ ದಾಂಡಿಗರಾದ ತಮೀಮ್ ಇಕ್ಬಾಲ್ ಮತ್ತು ಸೌಮ್ಯ ಸರ್ಕಾರ್ ಮೊದಲ ವಿಕೆಟ್ಗೆ 4.4 ಓವರ್ಗಳಲ್ಲಿ 44ರನ್ ಸೇರಿಸಿದರು. 15 ಎಸೆತಗಳಲ್ಲಿ 3 ಬೌಂಡರಿ ಮತ್ತು 1 ಸಿಕ್ಸರ್ ಒಳಗೊಂಡ 24 ರನ್ ಸೇರಿಸಿದ ತಮೀಮ್ ಇಕ್ಬಾಲ್ ಅವರು ಬೌಲ್ಟ್ಗೆ ವಿಕೆಟ್ ಒಪ್ಪಿಸುವುದರೊಂದಿಗೆ ಬಾಂಗ್ಲಾದ ಮೊದಲ ವಿಕೆಟ್ ಪತನಗೊಂಡಿತು.
ಎರಡನೆ ವಿಕೆಟ್ಗೆ ಸೌಮ್ಯ ಸರ್ಕಾರ್ ಮತ್ತು ಶಬೀರ್ರಹ್ಮಾನ್ 38 ರನ್ಗಳ ಜೊತೆಯಾಟ ನೀಡಿದರು. ಸೌಮ್ಯ ಸರ್ಕಾರ್ 42 ರನ್(28ಎ, 6ಬೌ) ಗಳಿಸಿ ಸೋಧಿಗೆ ರಿಟರ್ನ್ ಕ್ಯಾಚ್ ನೀಡಿದರು.
ಶಬೀರ್ರಹ್ಮಾನ್ 18 ರನ್ ಗಳಿಸಿ ವಿಲಿಯಮ್ಸ್ ಎಸೆತದಲ್ಲಿ ಬೌಲ್ಡ್ ಆಗಿ ಪೆವಿಲಿಯನ್ ಸೇರಿದರು. ಮಹ್ಮುದುಲ್ಲಾ 18 ರನ್ ಗಳಿಸಿದರು. ಶಾಕೀಬ್ ಅಲ್ ಹಸನ್ 41 ರನ್(34ಎ, 4ಬೌ) ಗಳಿಸಿದರು. ಮೊಸಾದಿಕ್ ಹುಸೈನ್ 12 ರನ್, ನೂರುಲ್ ಹಸನ್ ಔಟಾಗದೆ 7 ರನ್ ಮತ್ತು ರುಬೆಲ್ ಹುಸೈನ್ ಔಟಾಗದೆ 1 ರನ್ ಕೊಡುಗೆ ನೀಡಿದರೂ ತಂಡದ ಗೆಲುವಿಗೆ ಸಾಕಾಗಲಿಲ್ಲ. ಬಾಂಗ್ಲಾದೇಶ ಒಂದು ಹಂತದಲ್ಲಿ 10 ಓವರ್ಗಳಲ್ಲಿ 2 ವಿಕೆಟ್ ನಷ್ಟದಲ್ಲಿ 89 ರನ್ ಗಳಿಸಿತ್ತು. ಸೌಮ್ಯ ಸರ್ಕಾರ್ ಔಟಾದ ಬಳಿಕ ಬಾಂಗ್ಲಾದ ರನ್ರೇಟ್ ಕುಸಿಯಿತು. 14 ಓವರ್ಗಳಲ್ಲಿ 3 ವಿಕೆಟ್ ನಷ್ಟದಲ್ಲಿ 120 ರನ್ ಗಳಿಸಿದ್ದ ಬಾಂಗ್ಲಾಕ್ಕೆ ಬಳಿಕ ಐಶ್ ಸೋಧಿ ಪ್ರಹಾರ ನೀಡಿದರು.
ಸೋಧಿ 22ಕ್ಕೆ 2 ವಿಕೆಟ್, ಟ್ರೆಂಟ್ ಬೌಲ್ಟ್ 48ಕ್ಕೆ 2, ಸ್ಟೈನರ್ 37ಕ್ಕೆ 1, ವಿಲಿಯಮ್ಸನ್ 9ಕ್ಕೆ 1 ವಿಕೆಟ್ ಪಡೆದರು.
ನ್ಯೂಝಿಲೆಂಡ್ 194/4: ಇದಕ್ಕೂ ಮೊದಲು ಟಾಸ್ ಸೋತ ನ್ಯೂಝಿಲೆಂಡನ್ನು ಬಾಂಗ್ಲಾ ಬ್ಯಾಟಿಂಗ್ಗೆ ಇಳಿಸಿತ್ತು. ನ್ಯೂಝಿಲೆಂಡ್ ತಂಡ ನಾಯಕ ವಿಲಿಯಮ್ಸನ್ ಮತ್ತು ಕೋರಿ ಆ್ಯಂಡರ್ಸನ್ ಅರ್ಧಶತಕಗಳ ನೆರವಿನಲ್ಲಿ 20 ಓವರ್ಗಳಲ್ಲಿ 4 ವಿಕೆಟ್ ನಷ್ಟದಲ್ಲಿ 194 ರನ್ ಗಳಿಸಿತ್ತು.
ನ್ಯೂಝಿಲೆಂಡ್ ರುಬೆಲ್ ಹುಸೈನ್ (31ಕ್ಕೆ 3) ದಾಳಿಗೆ ಸಿಲುಕಿ 6.1 ಓವರ್ಗಳಲ್ಲಿ 41 ರನ್ಗಳಿಗೆ 3 ಕಳೆದುಕೊಂಡಿತ್ತು. ನೇಶಮ್ (15), ಮುನ್ರೊ (0), ಬ್ರೂಸೆ (5) ಬೇಗನೆ ಔಟಾದರು. ನಾಲ್ಕನೆ ವಿಕೆಟ್ಗೆ ಆ್ಯಂಡರ್ಸನ್ ಮತ್ತು ನಾಯಕ ಕೇನ್ ವಿಲಿಯಮ್ಸನ್ 124 ರನ್ಗಳ ಜೊತೆಯಾಟ ನೀಡಿ ತಂಡವನ್ನು ಆಧರಿಸಿದರು. ಕೋರಿ ಆ್ಯಂಡರ್ಸನ್ ಔಟಾಗದೆ 68 ನಿಮಿಷಗಳ ಬ್ಯಾಟಿಂಗ್ನಲ್ಲಿ 41 ಎಸೆತಗಳನ್ನು ಎದುರಿಸಿದರು. 2 ಬೌಂಡರಿ ಮತ್ತು 10 ಸಿಕ್ಸರ್ ಇರುವ ಜೀವನಶ್ರೇಷ್ಠ 94 ರನ್ ಗಳಿಸಿದರು.ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು. ನಾಯಕ ವಿಲಿಯಮ್ಸನ್ 88 ನಿಮಿಷಗಳ ಬ್ಯಾಟಿಂಗ್ನಲ್ಲಿ 57 ಎಸೆತಗಳನ್ನು ಎದುರಿಸಿದರು. 6 ಬೌಂಡರಿ ಮತ್ತು 1 ಸಿಕ್ಸರ್ ಒಳಗೊಂಡ 60 ರನ್ ಗಳಿಸಿ ರುಬೆಲ್ ಹುಸೈನ್ ಎಸೆತದಲ್ಲಿ ಬೌಲ್ಡ್ ಆಗಿ ಪೆವಿಲಿಯನ್ ಸೇರಿದರು.
ಆ್ಯಂಡರ್ಸನ್ 28ನೆ ಟ್ವೆಂಟಿ-20 ಪಂದ್ಯದಲ್ಲಿ 27 ಎಸೆತಗಳಲ್ಲಿ 2 ಬೌಂಡರಿ ಮತ್ತು 5 ಸಿಕ್ಸರ್ ನೆರವಿನಿಂದ ಅರ್ಧಶತಕ ಗಳಿಸಿದರು. ಇದು ಅವರ 2ನೆ ಅರ್ಧಶತಕ. ವಿಲಿಯಮ್ಸನ್ 44 ಎಸೆತಗಳಲ್ಲಿ 6 ಬೌಂಡರಿ ಮತ್ತು 1 ಸಿಕ್ಸರ್ ಸಹಾಯದಿಂದ ಅರ್ಧಶತಕ ಪೂರ್ಣಗೊಳಿಸಿದರು. 38ನೆ ಪಂದ್ಯವನ್ನಾಡಿದ ಆ್ಯಂಡರ್ಸನ್ 7ನೆ ಅರ್ಧಶತಕ ದಾಖಲಿಸಿದ್ದಾರೆ.
ಸಂಕ್ಷಿಪ್ತ ಸ್ಕೋರ್ ವಿವರ
ನ್ಯೂಝಿಲೆಂಡ್ 20 ಓವರ್ಗಳಲ್ಲಿ 194/4(ಆ್ಯಂಡರ್ಸನ್ ಔಟಾಗದೆ 94, ವಿಲಿಯಮ್ಸನ್ 60; ಹುಸೈನ್ 31ಕ್ಕೆ 3).
ಬಾಂಗ್ಲಾದೇಶ 20 ಓವರ್ಗಳಲ್ಲಿ 167/6( ಸೌಮ್ಯ ಸರ್ಕಾರ್ 42, ಶಾಕಿಬ್ 41; ಸೋಧಿ 22ಕ್ಕೆ 2, ಬೌಲ್ಟ್ 48ಕ್ಕೆ 2).
ಪಂದ್ಯಶ್ರೇಷ್ಠ: ಕೋರಿ ಆ್ಯಂಡರ್ಸನ್.