ಕೋತಿಗಳ ಮೇಲೆ ಕೊವ್ಯಾಕ್ಸಿನ್ ಪ್ರಯೋಗ ಯಶಸ್ವಿ: ಭಾರತ್ ಬಯೊಟೆಕ್ ಸಂಸ್ಥೆಯ ವರದಿ
ಹೊಸದಿಲ್ಲಿ, ಸೆ.12: ಕೋತಿಗಳು ಮೇಲೆ ಕೊವಾಕ್ಸಿನ್ ಲಸಿಕೆಯ ಪ್ರಯೋಗ ಯಶಸ್ವಿಯಾಗಿದ್ದು, ಲಸಿಕೆಯು ಸಾಂಕ್ರಾಮಿಕ ರೋಗ ಕೊರೋನ ವೈರಸ್ಗೆ ಬಲಿಷ್ಟ ಮತ್ತು ಸದೃಢ ಪ್ರತಿರಕ್ಷಣಾ(ರೋಗನಿರೋಧಕ) ಪ್ರತಿವರ್ತನೆಯನ್ನು ವೃದ್ಧಿಪಡಿಸಲು ನೆರವಾಗಿದೆ ಎಂದು ಭಾರತ್ ಬಯೊಟೆಕ್ ಸಂಸ್ಥೆಯ ವರದಿ ತಿಳಿಸಿದೆ.
ಸಂಕ್ಷೇಪವಾಗಿ ಹೇಳುವುದಾದರೆ, ಲಸಿಕೆಯನ್ನು ಪಡೆದವರ ದೇಹದಲ್ಲಿ ಸದೃಢ ಪ್ರತಿರೋಧಕ ಶಕ್ತಿ ಉತ್ಪನ್ನವಾಗಿರುವುದು ಕಂಡುಬಂದಿದೆ. ಲಸಿಕೆ ಪಡೆದ ಕೋತಿಗಳ ದೇಹದಲ್ಲಿ ಸೋಂಕಿನ ವಿರುದ್ಧ ಪ್ರತಿರೋಧಕ ಪ್ರತಿವರ್ತನೆ ಹೆಚ್ಚಿರುವುದು ಸಾಬೀತಾಗಿದೆ. ಪರೀಕ್ಷಾ ಪ್ರಯೋಗ ನಡೆಸಲಾದ ಜೀವಿಯಲ್ಲಿ ರಕ್ಷಣಾತ್ಮಕ ಕ್ಷಮತೆ ಹೆಚ್ಚಿರುವುದನ್ನು ಈ ಫಲಿತಾಂಶ ತೋರಿಸಿಕೊಟ್ಟಿದೆ ಎಂದು ಭಾರತ್ ಬಯೋಟೆಕ್ನ ವೆಬ್ಸೈಟ್ನ ಹೇಳಿಕೆ ತಿಳಿಸಿದೆ.
ಚಿಕ್ಕಬಾಲದ ಕೋತಿಗಳ ತಳಿಯನ್ನು ಈ ಪ್ರಯೋಗಕ್ಕೆ ಆರಿಸಲಾಗಿದ್ದು, 20 ಕೋತಿಗಳನ್ನು 4 ಗುಂಪುಗಳಲ್ಲಿ ವಿಭಜಿಸಿ, ವಿವಿಧ ಡೋಸ್ನಲ್ಲಿ ಲಸಿಕೆಯನ್ನು ಪ್ರಯೋಗಿಸಲಾಗಿದೆ. ಎರಡನೇ ಡೋಸ್ ನೀಡಿದ 14 ದಿನದ ಬಳಿಕ ಈ ಕೋತಿಗಳನ್ನು ವೈರಾಣುವಿನ ಸೋಂಕಿಗೆ ಅನಾಚ್ಛಾದಿತ(ಅನಾವೃತ)ಗೊಳಿಸಲಾಗಿದೆ. ಲಸಿಕೆಯು ಕೋತಿಗಳ ಮೂಗಿನ ಕುಳಿಯಲ್ಲಿ , ಗಂಟಲಿನಲ್ಲಿ, ಶ್ವಾಸಕೋಶದ ಅಂಗಾಂಶದಲ್ಲಿ ವೈರಸ್ನ ಪುನರಾವರ್ತನೆಯನ್ನು ಕಡಿಮೆಗೊಳಿಸುತ್ತದೆ ಎಂಬುದು ಪ್ರಯೋಗದಿಂದ ದೃಢಪಟ್ಟಿದೆ. ಲಸಿಕೆಯ ಪ್ರಯೋಗಕ್ಕೆ ಗುರಿಯಾದ ಜೀವಿಗಳಲ್ಲಿ ನ್ಯುಮೋನಿಯಾದ ಯಾವುದೇ ಲಕ್ಷಣಗಳು ಕಂಡುಬಂದಿಲ್ಲ. ಎರಡು ಡೋಸ್ ಲಸಿಕೆಯ ಹಂತದಲ್ಲೂ ಪ್ರಾಣಿಗಳ ದೇಹದಲ್ಲಿ ಅಡ್ಡಪರಿಣಾಮ ಕಂಡುಬಂದಿಲ್ಲ ಎಂದು ಭಾರತ್ ಬಯೋಟೆಕ್ ಹೇಳಿದೆ.
ಇಂಡಿಯನ್ ಕೌನ್ಸಿಲ್ ಫಾರ್ ಮೆಡಿಕಲ್ ರಿಸರ್ಚ್(ಐಸಿಎಂಆರ್)ನಿಂದ ಅನುಮತಿ ಪಡೆದ ಬಳಿಕ ಜುಲೈಯಿಂದ ಮಾನವವ ಮೇಲೆ ಕೊವಾಕ್ಸಿನ್ ಲಸಿಕೆಯ ಪರೀಕ್ಷಾ ಪ್ರಯೋಗ ಆರಂಭಿಸಲಾಗಿದೆ. ಕೊವಾಕ್ಸಿನ್ ಲಸಿಕೆ ಆಗಸ್ಟ್ 15ರೊಳಗೆ ಮಾರುಕಟ್ಟೆಯಲ್ಲಿ ಲಭ್ಯವಾಗಲಿದೆ ಎಂದು ಈ ಹಿಂದೆ ತಿಳಿಸಿದ್ದರೂ, ಕನಿಷ್ಟ ಮುಂದಿನ ವರ್ಷದವರೆಗೆ ಕೊರೋನ ಲಸಿಕೆ ಮಾರುಕಟ್ಟೆಯಲ್ಲಿ ಲಭ್ಯವಾಗದು ಎಂದು ಸರಕಾರಿ ಅಧಿಕಾರಿಗಳು ಸಂಸತ್ತಿನ ಸ್ಥಾಯಿ ಸಮಿತಿಗೆ ಮಾಹಿತಿ ನೀಡಿದ್ದಾರೆ.