'ಅವರ ಕ್ಯಾಮೆರಾ ಆಫ್ ಮಾಡಿ': ಕಾನೂನು ಉಲ್ಲಂಘನೆ ಕುರಿತ ಪತ್ರಕರ್ತನ ಪ್ರಶ್ನೆಗೆ ಸಿಡಿಮಿಡಿಗೊಂಡ ಸದ್ಗುರು
ಚೆನ್ನೈ: ಇಶಾ ಫೌಂಡೇಶನ್ ಸ್ಥಾಪಕ ಜಗ್ಗಿ ವಾಸುದೇವ್ ಅಲಿಯಾಸ್ 'ಸದ್ಗುರುʼ ಅವರು ಸಂದರ್ಶನವೊಂದರಲ್ಲಿ ನಿರೂಪಕ ಕೇಳಿದ ಪ್ರಶ್ನೆಗೆ ಕೋಪಗೊಂಡಿದ್ದು, ಕ್ಯಾಮೆರಾ ಬಂದ್ ಮಾಡುವಂತೆ ಸೂಚಿಸಿರುವ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದೆ. ಕಾನೂನು ಉಲ್ಲಂಘನೆಯ ಕುರಿತಂತೆ ನಿರೂಪಕ ಸದ್ಗುರುವನ್ನು ಪ್ರಶ್ನಿಸಿದ್ದು, ಈ ಪ್ರಶ್ನೆಯಿಂದ ವಿಚಲಿತರಾದ ಜಗ್ಗಿ ವಾಸುದೇವ್ ಸಿಡಿಮಿಡಿಗೊಂಡು ಕ್ಯಾಮೆರಾ ಬಂದ್ ಮಾಡಿ ಎಂದು ಹೇಳುವುದು ವಿಡಿಯೋದಲ್ಲಿ ಕಂಡು ಬಂದಿದೆ.
ಜಗ್ಗಿ ವಾಸುದೇವ್ ನೇತೃತ್ವದ ಇಶಾ ಫೌಂಡೇಶನ್ ಸಂಸ್ಥೆಯ ಯೋಜನೆಗಳಿಗೆ ಪರಿಸರ ಅನುಮತಿಯನ್ನು ಏಕೆ ಪಡೆದಿಲ್ಲ ಎಂದು ಪ್ರಶ್ನೆ ಕೇಳಿದ 'ಬಿಬಿಸಿ ತಮಿಳು' ವಾಹಿನಿಯ ನಿರೂಪಕನ ಮೇಲೆ ಸದ್ಗುರು ಸಿಟ್ಟಾಗಿದ್ದಾರೆ ಎಂದು newslaundry.com ವರದಿ ಮಾಡಿದೆ.
"ಯಾವುದೇ ಅಕ್ರಮ ನಡೆದಿಲ್ಲ, ಎಲ್ಲವೂ ಪರಿಪೂರ್ಣವಾಗಿದೆ ಎಂದು ಸರಕಾರ ಹೇಳಿದೆ....ಈ ನೆಲದಲ್ಲಿ ಕಾನೂನು ಇಲ್ಲವೇ? ಸರಕಾರ ಇಲ್ಲವೇ? ಅವರ ಕೆಲಸ ಅವರೇ ಮಾಡಲಿ. ನೀವು ಏನಕ್ಕೆ ಕೇಳುತ್ತಿದ್ದೀರಿ?" ಎಂದು ಸದ್ಗುರು ಪ್ರತಿಕ್ರಿಯಿಸಿದ್ದಾರೆ.
ವಾಸುದೇವ್ ಸಿಟ್ಟಾದರೂ ತನ್ನ ಪ್ರಶ್ನೆಯಿಂದ ಹಿಂದೆ ಸರಿಯದ ಸಂದರ್ಶಕ "ನಿಮಗೆ ಪರಿಸರದ ಬಗ್ಗೆ ತುಂಬಾ ಕಾಳಜಿ ಇದ್ದರೆ, ನೀವು ಈ ಕಟ್ಟಡಗಳನ್ನು ಪ್ರಾರಂಭಿಸುವ ಮೊದಲು ಏಕೆ ಸರಿಯಾದ ರೀತಿ ಅನುಮತಿ ತೆಗೆದುಕೊಳ್ಳಬಾರದು?" ಎಂದು ಮತ್ತೊಮ್ಮೆ ಪ್ರಶ್ನಿಸಿದ್ದಾರೆ.
ವಾಸುದೇವ್ ಸಂದರ್ಶಕನನ್ನು ಸುಮ್ಮನಿರುವಂತೆ ಸೂಚಿಸಿದ್ದು, ಸರ್ಕಾರದ ಕೆಲಸ ಅವರೇ ಮಾಡಲಿ, ನೀವು ಏನು ಮಾಡುತ್ತಿದ್ದೀರ ಎಂದು ಮರು ಪ್ರಶ್ನೆ ಹಾಕಿ ಸಂದರ್ಶಕನ ಪ್ರಶ್ನೆಯಿಂದ ನುಣುಚಿಕೊಳ್ಳಲು ಪ್ರಯತ್ನ ಪಟ್ಟಿರುವುದು ವಿಡಿಯೋದಲ್ಲಿ ಕಾಣುತ್ತದೆ.
ಸಂದರ್ಶಕ ತನ್ನ ಪ್ರಶ್ನೆಗೆ ಬದ್ಧವಾಗಿ ನಿಂತಾಗ, "ಮತ್ತೊಮ್ಮೆ, ನಿಮ್ಮ ನಾನ್ಸೆನ್ಸ್ ನೀವು ಹೇಳುತ್ತಿರುವಿರಿ ... ಅವರ ಕ್ಯಾಮೆರಾವನ್ನು ಆಫ್ ಮಾಡಿ. ಸಾಕು ... ಕೇಳು, ಮನುಷ್ಯ, ನನ್ನ ಮಾತುಗಳನ್ನು ಕೇಳು. ದೇಶದಲ್ಲಿ ಇರುವ ಪ್ರತಿಯೊಂದು ಕಾನೂನನ್ನು ಅನುಸರಿಸಲಾಗಿದೆ. ಸಣ್ಣ ಪುಟ್ಟ ತಕರಾರಿದ್ದದ್ದನ್ನು ಬಹಳ ಹಿಂದೆಯೇ, 20 ವರ್ಷಗಳ ಹಿಂದೆ, ಸರಿ ಮಾಡಿದ್ದೇವೆ..." ಎಂದು ಸದ್ಗುರು ಹೇಳುತ್ತಾರೆ. ಆಗಲೇ ಮಧ್ಯಪ್ರವೇಶಿಸಿದ ಸಂದರ್ಶಕ, ನಾನು 2012 ರ ವಿಷಯವನ್ನು ಪ್ರಸ್ತಾಪಿಸುತ್ತಿದ್ದೇನೆ ಎನ್ನುತ್ತಾರೆ. ಈ ಹಂತದಲ್ಲಿ ಸಂದರ್ಶನವನ್ನು ಕಡಿತಗೊಳಿಸಲಾಗಿದೆ.
ಈ ವೇಳೆ "ಜಗ್ಗಿ ವಾಸುದೇವ್ ಅವರ ಜೊತೆಗಿದ್ದ ಜನರು BBC ಯ ಮೂರು ಕ್ಯಾಮೆರಾಗಳನ್ನು ಬಲವಂತವಾಗಿ ಬಂದ್ ಮಾಡಿಸಿದರು" ಎಂದು BBC ನ್ಯೂಸ್ ಹೇಳಿದೆ. ಸದ್ಯ ಈ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದ್ದು, ಜಗ್ಗಿ ವಾಸುದೇವ್ ಪತ್ರಕರ್ತನ ಒಂದು ಪ್ರಶ್ನೆಗೆ ಉತ್ತರಿಸದೆ ಕ್ಯಾಮೆರಾ ಆಫ್ ಮಾಡಿಸಿರುವುದು ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ.
I was really expecting him to add, 'Dosti bani rahe', but it seems his people forcefully stopped BBC's 3 cameras (before those 3 golden words could be uttered). pic.twitter.com/Ks5eXj8QoP
— Karthik (@beastoftraal) June 10, 2022