ಬೆಂಗಳೂರು ಸೇರಿದಂತೆ ಭಾರತದ ಎಂಟು ನಗರಗಳಲ್ಲಿ ಏರ್ಟೆಲ್ 5ಜಿ ಸೇವೆ ಆರಂಭ
ಹೊಸದಿಲ್ಲಿ: ಭಾರ್ತಿ ಏರ್ಟೆಲ್ ಇಂದಿನಿಂದ ದೇಶದಲ್ಲಿ ಏರ್ಟೆಲ್ 5G ಪ್ಲಸ್ ಸೇವೆಯನ್ನು ಪ್ರಾರಂಭಿಸಿದೆ. ಆರಂಭಿಕ ಹಂತದಲ್ಲಿ ಏರ್ಟೆಲ್ 5G ಪ್ಲಸ್ ಅನ್ನು ಎಂಟು ನಗರಗಳಲ್ಲಿ ಪ್ರಾರಂಭಿಸಲಾಗಿದೆ. ದಿಲ್ಲಿ, ಮುಂಬೈ, ಚೆನ್ನೈ, ಬೆಂಗಳೂರು, ಹೈದರಾಬಾದ್, ಸಿಲಿಗುರಿ, ನಾಗ್ಪುರ ಮತ್ತು ವಾರಣಾಸಿಯಲ್ಲಿ 5ಜಿ ಸೇವೆಯನ್ನು ಅಧಿಕೃತವಾಗಿ ಆರಂಭಿಸಲಾಗಿದೆ . ಈ ಕುರಿತು ಪ್ರಕಟಣೆ ನೀಡಿರುವ ಕಂಪನಿಯು, 5G ನೆಟ್ವರ್ಕ್ ಅನ್ನು ಅಸ್ತಿತ್ವದಲ್ಲಿರುವ ಏರ್ಟೆಲ್ 4G ಸಿಮ್ನಲ್ಲಿ ಮಾತ್ರ ಬಳಸಬಹುದಾಗಿರುವುದರಿಂದ ಗ್ರಾಹಕರು 5G ಪ್ಲಸ್ ಸೇವೆಗಳ ಲಾಭ ಪಡೆಯಲು ತಮ್ಮ ಸಿಮ್ ಕಾರ್ಡ್ ಅನ್ನು ಬದಲಾಯಿಸುವ ಅಗತ್ಯವಿಲ್ಲ ಎಂದು ಹೇಳಿದೆ.
ಇದರೊಂದಿಗೆ ಕಂಪನಿಯು ಇಂದು ಸಂಜೆ 6 ಗಂಟೆಯಿಂದ ಏರ್ಟೆಲ್ 5G ಪ್ಲಸ್ ಸೇವೆಯನ್ನು ಆರಂಭಿಸಿದೆ. ಅಂದರೆ, ಈ ಎಂಟು ನಗರಗಳಲ್ಲಿ ಏರ್ಟೆಲ್ 5ಜಿಯನ್ನು ಬಳಸಬಹುದು. ಏರ್ಟೆಲ್ 5G ಪ್ಲಸ್ನಲ್ಲಿರುವ ಬಳಕೆದಾರರು ಈಗ ಇರುವ ಇಂಟರ್ನೆಟ್ ವೇಗಕ್ಕಿಂತ 30 ಪಟ್ಟು ಹೆಚ್ಚಿನ ವೇಗದಲ್ಲಿ ಇಂಟರ್ನೆಟ್ ಅನ್ನು ಬಳಸಲು ಸಾಧ್ಯವಾಗುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ.
ಭಾರ್ತಿ ಏರ್ಟೆಲ್ನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಗೋಪಾಲ್ ವಿಠಲ್ ಅವರು, ನಮ್ಮ 5G ಸೇವೆಯು ಗ್ರಾಹಕರು ಹೊಂದಿರುವ ಯಾವುದೇ 5G ಹ್ಯಾಂಡ್ಸೆಟ್ ಮತ್ತು ಅಸ್ತಿತ್ವದಲ್ಲಿರುವ SIM ಕಾರ್ಡ್ನಲ್ಲಿ ಕಾರ್ಯನಿರ್ವಹಿಸುತ್ತದೆ ಎಂದು ಹೇಳಿದರು. ಬಳಕೆದಾರರ ಅನುಭವವನ್ನು ಇನ್ನಷ್ಟು ಹೆಚ್ಚಿಸಲು, ನಾವು 5G ಸೇವೆಯನ್ನು ಪರಿಚಯಿಸಿದ್ದೇವೆ ಮತ್ತು ಇದು ಪರಿಸರ ಸ್ನೇಹಿಯಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಏರ್ಟೆಲ್ 5G ಪ್ಲಸ್ ತಂತ್ರಜ್ಞಾನದ ಮೇಲೆ ಕಾರ್ಯನಿರ್ವಹಿಸುತ್ತದೆ, ಅದು ವಿಶ್ವದ ಅತ್ಯಂತ ಅಭಿವೃದ್ಧಿ ಹೊಂದಿದ ಪರಿಸರ ವ್ಯವಸ್ಥೆಯಾಗಿದೆ. ಇದು ಭಾರತದಲ್ಲಿನ ಎಲ್ಲಾ 5G ಸ್ಮಾರ್ಟ್ಫೋನ್ಗಳು ಏರ್ಟೆಲ್ ನೆಟ್ವರ್ಕ್ನಲ್ಲಿ ಕಾರ್ಯನಿರ್ವಹಿಸುವುದನ್ನು ಖಚಿತಪಡಿಸುತ್ತದೆ. ಏರ್ಟೆಲ್ 5G ಪ್ಲಸ್ನೊಂದಿಗೆ ಬಳಕೆದಾರರು ಹೈ-ಡೆಫಿನಿಷನ್ ವೀಡಿಯೊ ಸ್ಟ್ರೀಮಿಂಗ್, ಗೇಮಿಂಗ್, ಮಲ್ಟಿಪಲ್ ಚಾಟಿಂಗ್, ಸೂಪರ್ಫಾಸ್ಟ್ ವೇಗದಲ್ಲಿ ಫೋಟೋಗಳನ್ನು ತ್ವರಿತವಾಗಿ ಅಪ್ಲೋಡ್ ಮಾಡಲು ಸಾಧ್ಯವಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ.