ಮುಂಬೈನ ಅಮೆರಿಕನ್ ಶಾಲೆಯ ಮೇಲೆ ದಾಳಿಗೆ ಸಂಚು: ಟೆಕ್ಕಿಗೆ ಜೀವಾವಧಿ ಶಿಕ್ಷೆ
ಮುಂಬೈ,ಅ.21: ಭಯೋತ್ಪಾದಕ ಗುಂಪು ಐಸಿಸ್ನಿಂದ(ICC) ಪ್ರೇರಿತನಾಗಿ ಅಮೆರಿಕನ್ ಶಾಲೆಯೊಂದು ಸೇರಿದಂತೆ ಮುಂಬೈನಲ್ಲಿರುವ ಅಮೆರಿಕದ ಸಂಸ್ಥೆಗಳ ಮೇಲೆ ದಾಳಿಗಳನ್ನು ನಡೆಸಲು ಸಂಚು ರೂಪಿಸಿದ್ದಕ್ಕಾಗಿ ಸ್ಥಳೀಯ ನ್ಯಾಯಾಲಯವೊಂದು ಕಂಪ್ಯೂಟರ್ ಇಂಜಿನಿಯರ್ ಅನೀಸ್ ಅನ್ಸಾರಿ(Anees Ansari) ಎಂಬಾತನಿಗೆ ಜೀವಾವಧಿ ಶಿಕ್ಷೆಯನ್ನು ವಿಧಿಸಿದೆ. 2014 ಅಕ್ಟೋಬರ್ನಲ್ಲಿ ಮಹಾರಾಷ್ಟ್ರ ಭಯೋತ್ಪಾದನೆ ನಿಗ್ರಹ ದಳವು ಅನ್ಸಾರಿಯನ್ನು ಬಂಧಿಸಿದ್ದು,ಆಗಿನಿಂದಲೂ ಆತ ಜೈಲಿನಲ್ಲಿದ್ದಾನೆ.
ಬಹುರಾಷ್ಟ್ರೀಯ ಸಾಫ್ಟ್ವೇರ್ ಕಂಪನಿಯೊಂದರಲ್ಲಿ ಮಾರ್ಗಸೂಚಕ ನಕಾಶೆಗಳನ್ನು ವಿನ್ಯಾಸಗೊಳಿಸುವ ಕೆಲಸದಲ್ಲಿದ್ದ ಅನ್ಸಾರಿಯ ಫೇಸ್ಬುಕ್ ಚಾಟ್ಗಳು ಬಾಂದ್ರಾದಲ್ಲಿಯ ಶಾಲೆ ಸೇರಿದಂತೆ ಅಮೆರಿಕದ ಸಂಸ್ಥೆಗಳನ್ನು ಗುರಿಯಾಗಿಸಿಕೊಳ್ಳಲು ಸಂಚಿನ ಬಗ್ಗೆ ಸುಳಿವು ನೀಡಿವೆ ಎಂದು ಪೊಲೀಸರು ಹೇಳಿದ್ದರು.
ಕಂಪನಿಯ ಕಂಪ್ಯೂಟರ್ನ್ನು ಬಳಸಿ ಸುಳ್ಳು ಹೆಸರಿನಲ್ಲಿ ಫೇಸ್ಬುಕ್ ಖಾತೆಯನ್ನು ತೆರೆದಿದ್ದ ಅನ್ಸಾರಿ ಬೆದರಿಕೆಗಳು ಮತ್ತು ಇತರ ಬರಹಗಳನ್ನು ಪೋಸ್ಟ್ ಮಾಡಿದ್ದ. ಉಮರ್ ಇಲ್ಹಾಜಿ ಎಂಬಾತನೊಂದಿಗೆ ಆತನ ಫೇಸ್ಬುಕ್ ಚಾಟ್ಗಳು ಅಮೆರಿಕನ್ ಶಾಲೆಯ ಮೇಲೆ ‘ಒಂಟಿ ತೋಳ’ ದಾಳಿಯನ್ನು ನಡೆಸಲು ಆತ ಬಯಸಿದ್ದ ಎನ್ನುವುದನ್ನು ತೋರಿಸಿವೆ ಎಂದು ಪ್ರಾಸಿಕ್ಯೂಷನ್ ವಾದಿಸಿತ್ತು.
ಶುಕ್ರವಾರ ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶ ಎ.ಎ.ಜೋಗಳೇಕರ್ ಅವರು ಐಪಿಸಿ ಮತ್ತು ಮಾಹಿತಿ ತಂತ್ರಜ್ಞಾನ ಕಾಯ್ದೆಯಡಿ ಅನ್ಸಾರಿಯನ್ನು ತಪ್ಪಿತಸ್ಥ ಎಂದು ಘೋಷಿಸಿದರು.
ಅನ್ಸಾರಿ ತನ್ನ ಆನ್ಲೈನ್ ಸಂಭಾಷಣೆಗಳಲ್ಲಿ ಐಸಿಸ್ ಹೋರಾಟಗಾರರ ಬಗ್ಗೆ ಸಹಾನುಭೂತಿಯನ್ನು ವ್ಯಕ್ತಪಡಿಸಿದ್ದ ಮತ್ತು ಅಮೆರಿಕನ್ನರನ್ನು ‘ಹಿಂಸಕರು’ ಎಂದು ಬಣ್ಣಿಸಿದ್ದನೆಂದು ಎಂಟು ವರ್ಷಗಳ ಹಿಂದೆ ಆತನ ಬಂಧನದ ಸಮಯದಲ್ಲಿ ಪೊಲೀಸರು ಹೇಳಿದ್ದರು.
ಅನ್ಸಾರಿ ತನ್ನ ಹೆತ್ತವರು ಮತ್ತು ಇಬ್ಬರು ಒಡಹುಟ್ಟಿದವರೊಂದಿಗೆ ಉಪನಗರ ಕುರ್ಲಾದಲ್ಲಿ ವಾಸವಿದ್ದ. ತನ್ನ ಬಂಧನಕ್ಕೆ ಒಂದು ತಿಂಗಳು ಮೊದಲು ಅನ್ಸಾರಿ ಪಾಸ್ಪೋರ್ಟ್ಗಾಗಿ ಅರ್ಜಿ ಸಲ್ಲಿಸಿದ್ದ ಮತ್ತು ಇದು ಆತ ಐಸಿಸ್ನ್ನು ಬೆಂಬಲಿಸಲು ಅಥವಾ ಸೇರಲು ದೇಶವನ್ನು ತೊರೆಯಲು ಯೋಜಿಸಿದ್ದಾನೆ ಎಂಬ ಶಂಕೆಯನ್ನು ಬಲಗೊಳಿಸಿತ್ತು ಎಂದು ಪೊಲೀಸರು ಹೇಳಿದ್ದರು.