ಗುಜರಾತ್ ವಿಧಾನಸಭಾ ಚುನಾವಣೆಯ ದಿನಾಂಕ ಪ್ರಕಟ

ಹೊಸದಿಲ್ಲಿ, ನ. 3: ಗುಜರಾತ್ ವಿಧಾನಸಭಾ ಚುನಾವಣೆಯು ಡಿಸೆಂಬರ್ 1 ಮತ್ತು 5ರಂದು ಎರಡು ಹಂತಗಳಲ್ಲಿ ನಡೆಯಲಿದೆ ಎಂದು ಚುನಾವಣಾ ಆಯೋಗವು ಗುರುವಾರ ಪ್ರಕಟಿಸಿದೆ. ಫಲಿತಾಂಶವನ್ನು ಡಿಸೆಂಬರ್ 8ರಂದು ಪ್ರಕಟಿಸಲಾಗುವುದು. ಅದೇ ದಿನ ಹಿಮಾಚಲಪ್ರದೇಶ ಚುನಾವಣೆಯ ಫಲಿತಾಂಶವೂ ಪ್ರಕಟಗೊಳ್ಳಲಿದೆ.

ಗುಜರಾತ್ ನ ಮೊರ್ಬಿಯಲ್ಲಿ ಇತ್ತೀಚೆಗೆ ಸಂಭವಿಸಿದ ತೂಗು ಸೇತುವೆ ಕುಸಿತದ ಬೆನ್ನಿಗೇ, ಬಹುದಿನಗಳಿಂದ ಕಾಯಲಾಗುತ್ತಿದ್ದ ಚುನಾವಣಾ ದಿನಾಂಕಗಳನ್ನು ಪ್ರಕಟಿಸಲಾಗಿದೆ. ತೂಗು ಸೇತುವೆ ದುರಂತದಲ್ಲಿ ಕನಿಷ್ಠ 135 ಮಂದಿ ಮೃತಪಟ್ಟಿದ್ದಾರೆ.

ಭೀಕರ ದುರಂತದಲ್ಲಿ ಮೃತಪಟ್ಟವರಿಗೆ ಶ್ರದ್ಧಾಂಜಲಿ ಸಲ್ಲಿಸುತ್ತಲೇ ಮುಖ್ಯ ಚುನಾವಣಾ ಆಯುಕ್ತ ರಾಜೀವ್ ಕುಮಾರ್ ತನ್ನ ಪತ್ರಿಕಾಗೋಷ್ಠಿಯನ್ನು ಆರಂಭಿಸಿದರು.

ಚುನಾವಣಾ ಅಧಿಸೂಚನೆಯನ್ನು ಶನಿವಾರ ಹೊರಡಿಸಲಾಗುವುದು ಹಾಗೂ ನಾಮಪತ್ರ ಸಲ್ಲಿಸಲು ನವೆಂಬರ್ 14 ಕೊನೆಯ ದಿನವಾಗಿರುತ್ತದೆ. ನಾಮಪತ್ರಗಳನ್ನು ವಾಪಸ್ ಪಡೆಯಲು ನವೆಂಬರ್ 17 ಕೊನೆಯ ದಿನವಾಗಿದೆ.

ಮೊದಲ ಹಂತದಲ್ಲಿ, ಅಂದರೆ ಡಿಸೆಂಬರ್ 1ರಂದು 89 ಸ್ಥಾನಗಳಿಗೆ ಮತದಾನ ನಡೆದರೆ, ಎರಡನೇ ಹಂತದಲ್ಲಿ, ಅಂದರೆ ಡಿಸೆಂಬರ್ 5ರಂದು 93 ಸ್ಥಾನಗಳಗಲ್ಲಿ ಮತದಾನ ನಡೆಯುವುದು.

ಗುಜರಾತ್  ನಲ್ಲಿ ಚುನಾವಣೆಯನ್ನು ವಿಳಂಬಿಸಲಾಗುತ್ತಿದೆ ಎಂಬ ಆರೋಪಗಳನ್ನು ಚುನಾವಣಾ ಆಯೋಗವು ತಳ್ಳಿಹಾಕಿತು. ಹಾಲಿ ವಿಧಾನಸಭೆಯ ಅವಧಿ ಮುಂದಿನ ವರ್ಷದ ಫೆಬ್ರವರಿ 18ರಂದು ಕೊನೆಗೊಳ್ಳಲಿದೆ ಎಂದು ಅವರು ಹೇಳಿದರು. ಚುನಾವಣಾ ದಿನಾಂಕಗಳನ್ನು ಅಂತಿಮಗೊಳಿಸುವ ಮುನ್ನ, ಹವಾಮಾನ ಸೇರಿದಂತೆ ಹಲವು ಅಂಶಗಳನ್ನು ಗಣನೆಗೆ ತೆಗೆದುಕೊಳ್ಳಲಾಗಿದೆ ಎಂದು ಮುಖ್ಯ ಚುನಾವಣಾ ಆಯುಕ್ತರು ಹೇಳಿದರು.

25 ವರ್ಷಗಳಿಂದ ಬಿಜೆಪಿ ಅಧಿಕಾರದಲ್ಲಿ ರಾಜಕೀಯ ಭೂಮಿಕೆಗೆ ಅರವಿಂದ ಕೇಜ್ರಿವಾಲ್ ರ ಆಮ್ ಆದ್ಮಿ ಪಕ್ಷ (ಆಪ್) ಸೇರ್ಪಡೆಗೊಳ್ಳುತ್ತಿರುವಂತೆಯೇ, ತ್ರಿಕೋನ ಸ್ಪರ್ಧೆಯ ಚುನಾವಣೆಗೆ ಗುಜರಾತ್ ಅಣಿಗೊಳ್ಳುತ್ತಿದೆ.

ರಾಜ್ಯವನ್ನು ಸುಮಾರು 25 ವರ್ಷಗಳಿಂದ ನಿರಂತರವಾಗಿ ಆಳುತ್ತಿರುವ ಬಿಜೆಪಿಗೆ ಈ ಬಾರಿ ಮೊರ್ಬಿ ತೂಗುಸೇತುವೆ ದುರಂತವು ಭಾರೀ ಹಿನ್ನಡೆಯಾಗಿದೆ. ಸೇತುವೆಯ ನವೀಕರಣದಲ್ಲಿ ಭಾರೀ ಅವ್ಯವಹಾರಗಳು ಮತ್ತು ನಿಯಮಗಳ ಉಲ್ಲಂಘನೆ ನಡೆದಿರುವುದು ಬಹಿರಂಗವಾದ ಬಳಿಕ, ಮುಖ್ಯಮಂತ್ರಿ ಭೂಪೇಂದ್ರ ಪಟೇಲ್ ಸಂಕಷ್ಟವನ್ನು ಎದುರಿಸುತ್ತಿದ್ದಾರೆ.

ಈ ವರ್ಷದ ಆರಂಭದಲಿ ಪಂಜಾಬಿ ನಲ್ಲಿ ಅಮೋಘ ವಿಜಯವನ್ನು ದಾಖಲಿಸಿದ ಬಳಿಕ, ಗುಜರಾತ್ ನಲ್ಲಿ ಛಾಪು ಮೂಡಿಸಲು ಆಪ್ ಅವಿರತವಾಗಿ ಶ್ರಮಿಸುತ್ತಿದೆ.

2017ರ ಚುನಾವಣೆಯಲ್ಲಿ ಕಾಂಗ್ರೆಸ್ ಉತ್ತಮ ನಿರ್ವಹಣೆ ನೀಡಿತ್ತು. ಆದರೂ, ಅಧಿಕಾರವನ್ನು ಉಳಿಸಕೊಳ್ಳುವಲ್ಲಿ ಬಿಜೆಪಿ ಯಶಸ್ವಿಯಾಗಿತ್ತು.

ಆದರೆ, ಈ ಬಾರಿ ಕಾಂಗ್ರೆಸ್ ಕೂಡ ಆಪ್ನಿಂದ ಸವಾಲು ಎದುರಿಸುತ್ತಿದೆ.

ಆದಾಗ್ಯೂ, ಬಿಜೆಪಿಗೆ ಬಲಿಷ್ಠ ಚುನಾವಣಾ ವ್ಯವಸ್ಥೆಯ ಬೆಂಬಲವಿದೆ ಮತ್ತು ವ್ಯಾಪಕ ನೆಲೆಯಿದೆ. ಅದೂ ಅಲ್ಲದೆ, ಗುಜರಾತ್ ಚುನಾವಣೆಯು ಪ್ರಧಾನಿ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್ ಶಾಗೆ ಪ್ರತಿಷ್ಠೆಯ ಪಣವಾಗಿದೆ. ರಾಜ್ಯದಲ್ಲಿ ಚುನಾವಣೆ ಗೆಲ್ಲಲು ಅದು ಎಲ್ಲಾ ರೀತಿಯ ತಂತ್ರೋಪಾಯಗಳನ್ನು ಮಾಡಲಿದೆ.

“100% ನಿಷ್ಪಕ್ಷ": ಚುನಾವಣಾ ಆಯೋಗ :

ಗುಜರಾತ್ ಚುನಾವಣೆಯನ್ನು ಉದ್ದೇಶಪೂರ್ವಕವಾಗಿ ವಿಳಂಬಿಸಲಾಗಿಲ್ಲ ಹಾಗೂ ಯಾವುದೇ ತಾರತಮ್ಯವನ್ನು ಮಾಡಲಾಗುತ್ತಿಲ್ಲ ಎಂದು ಚುನಾವಣಾ ಆಯೋಗ ಗುರುವಾರ ಹೇಳಿದೆ.

ಗುಜರಾತ್ ಚುನಾವಣೆಯ ದಿನಾಂಕಗಳು ನಿಯಮಿತ ವೇಳಾಪಟ್ಟಿಯ ವ್ಯಾಪ್ತಿಯಲ್ಲೇ ಇವೆ ಎಂದು ಮುಖ್ಯ ಚುನಾವಣಾ ಆಯಕ್ತ ರಾಜೀವ್ ಕುಮಾರ್ ಹೇಳಿದರು. ಹಿಮಾಚಲ ಪ್ರದೇಶ ಮತ್ತು ಗುಜರಾತ್ ರಾಜ್ಯಗಳ ಚುನಾವಣಾ ಘೋಷಣೆಗಳ ನಡುವೆ ಎರಡು ವಾರಗಳ ಅಂತರವಿದ್ದರೂ, ಎರಡೂ ರಾಜ್ಯಗಳ ಮತ ಎಣಿಕೆಯನ್ನು ಒಂದೇ ದಿನ ನಡೆಸಲಾಗುವುದು.

ಹಿಮಾಚಲಪ್ರದೇಶದಲ್ಲಿ ನವೆಂಬರ್ 12ರಂದು ಒಂದೇ ಹಂತದಲ್ಲಿ ಮತದಾನ ನಡೆಯುವುದು. ಆದರೆ ಅದು ಫಲಿತಾಂಶಕ್ಕಾಗಿ ಡಿಸೆಂಬರ್ 8ರವರೆಗೆ ಕಾಯಬೇಕಾಗುತ್ತದೆ.

‘‘ಚುನಾವಣಾ ಆಯೋಗದ ನಿಷ್ಪಕ್ಷಪಾತವು ಭವ್ಯ ಪರಂಪರೆಯಾಗಿದೆ. ನಾವು 100 ಶೇಕಡ ನಿಷ್ಪಕ್ಷವಾಗಿದ್ದೇವೆ’’ ಎಂದು ಅವರು ಹೇಳಿದರು.

ಚುನಾವಣಾ ನೀತಿ ಸಂಹಿತೆಯು ಜಾರಿಗೆ ಬರುವ ಮುನ್ನ, ಗುಜರಾತ್ನಲ್ಲಿನ ತನ್ನ ಕಾರ್ಯಕ್ರಮಗಳನ್ನು ಮುಗಿಸಲು ಪ್ರಧಾನಿ ನರೇಂದ್ರ ಮೋದಿಗೆ ಅವಕಾಶ ಮಾಡಿಕೊಡುವುದಕ್ಕಾಗಿ, ಕಳೆದ ತಿಂಗಳು ಹಿಮಾಚಲಪ್ರದೇಶದ ಚುನಾವಣೆಯನ್ನು ಘೋಷಿಸಿದ ಸಂದರ್ಭದಲ್ಲೇ ಗುಜರಾತ್ ಚುನಾವಣೆಯನ್ನು ಚುನಾವಣಾ ಆಯೋಗ ಘೋಷಿಸಲಿಲ್ಲ ಎಂಬುದಾಗಿ ಕಾಂಗ್ರೆಸ್ ಮತ್ತು ಇತರ ಪ್ರತಿಪಕ್ಷಗಳು ಆರೋಪಿಸಿವೆ.

‘‘ಕೆಲವರು ಋಣಾತ್ಮಕ ವಾತಾವರಣವನ್ನು ಸೃಷ್ಟಿಸಲು ಪ್ರಯತ್ನಿಸುತ್ತಾರೆ. ಕೃತ್ಯಗಳು ಮತ್ತು ಫಲಿತಾಂಶಗಳು ಪದಗಳಿಗಿಂತಲೂ ಹೆಚ್ಚು ಪ್ರಭಾವಿಯಾಗಿವೆ. ಹಲವು ಸಂದರ್ಭಗಳಲ್ಲಿ, ಚುನಾವಣಾ ಆಯೋಗವನ್ನು ಟೀಕಿಸುತ್ತಿದ್ದ ಪಕ್ಷಗಳು ಚುನಾವಣೆಗಳಲ್ಲಿ ಅಚ್ಚರಿಯ ಫಲಿತಾಂಶಗಳನ್ನು ಪಡೆದಿವೆ. ಇಲ್ಲಿ ತೃತೀಯ ಅಂಪೈರ್ ಇಲ್ಲ. ಫಲಿತಾಂಶವೇ ಸಾಕ್ಷಿ’’ ಎಂದು ಮುಖ್ಯ ಚುನಾವಣಾ ಆಯುಕ್ತರು ಹೇಳಿದರು.