ನೋಟು ಅಮಾನ್ಯೀಕರಣಗೊಂಡ ಆರು ವರ್ಷಗಳ ನಂತರ ನಗದು ಚಲಾವಣೆ ದುಪ್ಪಟ್ಟು

ಹೊಸದಿಲ್ಲಿ: ಆರು ವರ್ಷಗಳ ಹಿಂದೆ ಕೇಂದ್ರ ಸರ್ಕಾರವು ನೋಟು ಅಮಾನ್ಯೀಕರಣ (demonetisation ) ನಿರ್ಣಯ ತೆಗೆದುಕೊಂಡು, ಸಾರ್ವಜನಿಕ ಚಲಾವಣೆಯಲ್ಲಿ ಶೇ. 86ರಷ್ಟಿದ್ದ ರೂ. 500 ಮತ್ತು ರೂ. 1000 ಮುಖಬೆಲೆಯ ನೋಟುಗಳನ್ನು ಹಿಂಪಡೆದ ನಂತರ, ಇಂದಿಗೂ ನಗದು ವಹಿವಾಟೇ ಪ್ರಮುಖ ಪಾತ್ರ ನಿರ್ವಹಿಸುತ್ತಿದ್ದು, ಕಳೆದ ಆರು ವರ್ಷಗಳಲ್ಲಿ ಸಾರ್ವಜನಿಕ ನಗದು ಚಲಾವಣೆ ದುಪ್ಪಟ್ಟುಗೊಂಡಿದೆ ಎಂದು ಅಧಿಕೃತ ದತ್ತಾಂಶಗಳು ಹೇಳುತ್ತಿವೆ. ಡಿಸೆಂಬರ್ 23, 2022ಕ್ಕೆ ಅಂತ್ಯಗೊಂಡಂತೆ ಸಾರ್ವಜನಿಕ ನಗದು ಚಲಾವಣೆ (ಅಥವಾ ಸಾರ್ವಜನಿಕರು ಹೊಂದಿರುವ ನಗದು) ಮೌಲ್ಯವು ರೂ. 34.42 ಲಕ್ಷ ಕೋಟಿಗೆ ತಲುಪಿದೆ ಎಂದು ರಿಸರ್ವ್ ಬ್ಯಾಂಕ್ ಇಂಡಿಯಾ (RBI) ದತ್ತಾಂಶಗಳಿಂದ ತಿಳಿದು ಬಂದಿದೆ ಎಂದು ndtv.com ವರದಿ ಮಾಡಿದೆ.

ಕಪ್ಪು ಹಣ ನಿಯಂತ್ರಣ ಹಾಗೂ ಭ್ರಷ್ಟಾಚಾರದ ವಿರುದ್ಧ ಹೋರಾಡಲು ಪ್ರಧಾನಿ ನರೇಂದ್ರ ಮೋದಿ, ನೋಟು ಅಮಾನ್ಯೀಕರಣ ನಿರ್ಧಾರ ಪ್ರಕಟಿಸಿದ ಕೆಲವೇ ದಿನಗಳ ಹಿಂದೆ, ನವೆಂಬರ್ 4ರಂದು ಸಾರ್ವಜನಿಕ ಚಲಾವಣೆಯಲ್ಲಿದ್ದ ನಗದು ಮೌಲ್ಯವು ರೂ. 17.74 ಲಕ್ಷ ಕೋಟಿಯಷ್ಟಿತ್ತು. ನೋಟು ಅಮಾನ್ಯೀಕರಣದ ನಂತರ ನಗದು ಚಲಾವಣೆಯು ರೂ. 9 ಲಕ್ಷ ಕೋಟಿಗೆ ಕುಸಿದಿತ್ತು.

ಜನವರಿ 6, 2017ಕ್ಕೆ ಹೋಲಿಸಿದರೆ ನಗದು ಚಲಾವಣೆಯು ಮೂರು ಪಟ್ಟು ಅಥವಾ ಶೇ. 260ರಷ್ಟು ಏರಿಕೆಯಾಗಿದ್ದು, ನವೆಂಬರ್ 4, 2016ಕ್ಕೆ ಹೋಲಿಸಿದರೆ ಶೇ. 83ರಷ್ಟು ಏರಿಕೆಯಾಗಿದೆ.

ನೋಟು ಅಮಾನ್ಯೀಕರಣದ ನಿರ್ಧಾರ ಪ್ರಕಟಿಸಿದ ನಂತರ ಸರ್ಕಾರವು ಸಾರ್ವಜನಿಕರಿಗೆ ತಮ್ಮ ಬಳಿಯಿರುವ ನಿಷೇಧಿತ ನೋಟುಗಳನ್ನು ಬದಲಿಸಿಕೊಳ್ಳಲು ಅಲ್ಪ ಕಾಲಾವಕಾಶ ಮಾತ್ರ ನೀಡಿತ್ತು. ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಪ್ರಕಾರ, ಬಹುತೇಕ ಒಟ್ಟಾರೆ ಮೌಲ್ಯದ ನಿಷೇಧಿತ ನೋಟುಗಳು ಬ್ಯಾಂಕ್‌ಗಳಿಗೆ ಮರಳಿದ್ದವು.

ನವೆಂಬರ್ 8, 2016ರಂದು ಸಾರ್ವಜನಿಕ ಚಲಾವಣೆಯಲ್ಲಿದ್ದ ರೂ. 15.4 ಲಕ್ಷ ಕೋಟಿ ಮೌಲ್ಯದ ನಿಷೇಧಿತ ನೋಟುಗಳ ಪೈಕಿ ರೂ. 15.3 ಲಕ್ಷ ಕೋಟಿ ಮೌಲ್ಯದ ನೋಟುಗಳು ಅಥವಾ ಶೇ. 99.3ರಷ್ಟು ಮೌಲ್ಯದ ನೋಟುಗಳು ಬ್ಯಾಂಕ್‌ಗೆ ಮರಳಿದ್ದವು. ಇದರ ಬೆನ್ನಿಗೇ ತೀವ್ರ ಆರ್ಥಿಕ ಹಿಂಜರಿತ ಹಾಗೂ ಸಾರ್ವಜನಿಕರ ಸಂಕಷ್ಟಕ್ಕೆ ಕಾರಣವಾಗಿದ್ದ ಆಘಾತಕಾರಿ ನಡೆಯ ಅಗತ್ಯದ ಬಗ್ಗೆ ಪ್ರಶ್ನೆಗಳೆದ್ದಿದ್ದವು.

ನೋಟು ಅಮಾನ್ಯೀಕರಣವನ್ನು ಪ್ರಶ್ನಿಸಿ ಸಲ್ಲಿಕೆಯಾಗಿದ್ದ ಅರ್ಜಿಗಳ ವಿಚಾರಣೆ ನಡೆಸಿದ ಸುಪ್ರೀಂಕೋರ್ಟ್, ಸೋಮವಾರ 4-1 ಬಹುಮತದ ತೀರ್ಪಿನಲ್ಲಿ ಆ ಕ್ರಮವನ್ನು ಎತ್ತಿ ಹಿಡಿದಿತ್ತು.

ಇದನ್ನೂ ಓದಿ: ನಟ ಕಿಶೋರ್ ಟ್ವಿಟರ್ ಖಾತೆ ಅಮಾನತು