ಶಾಲೆಗಳಲ್ಲಿ ‘ಸರ್’, ‘ಮೇಡಮ್’ ಎನ್ನುವಂತಿಲ್ಲ; ‘ಟೀಚರ್’ ಮಾತ್ರ: ಕೇರಳ ಮಕ್ಕಳ ಹಕ್ಕುಗಳ ಆಯೋಗ

ತಿರುವನಂತಪುರಂ, ಜ. 13: ಶಾಲಾ ಶಿಕ್ಷಕರ ಲಿಂಗ ಯಾವುದೇ ಇರಲಿ, ಅವರನ್ನು ‘ಸರ್’(sir) ಅಥವಾ ‘ಮೇಡಮ್’(Madam) ಎಂದು ಕರೆಯದೆ ‘ಟೀಚರ್’(Teacher) ಎಂಬುದಾಗಿ ಮಾತ್ರ ಕರೆಯಬೇಕು ಎಂದು ಕೇರಳ ರಾಜ್ಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗ (KSCPCR)ವು ರಾಜ್ಯದ ಎಲ್ಲಾ ಶಾಲೆಗಳಿಗೆ ಸೂಚನೆ ನೀಡಿದೆ.

ಶಿಕ್ಷಕರನ್ನು ಸಂಭೋದಿಸಲು ‘ಸರ್’ ಅಥವಾ ‘ಮೇಡಮ್’ ಎಂಬ ಗೌರವಸೂಚಕ ಪದಗಳಿಗಿಂತ, ಲಿಂಗ-ತಟಸ್ಥ ‘ಟೀಚರ್’ ಪದವೇ ಹೆಚ್ಚು ಸೂಕ್ತವಾಗಿದೆ ಎಂದು ಆಯೋಗ ಹೇಳಿದೆ.

ರಾಜ್ಯದ ಎಲ್ಲಾ ಶಾಲೆಗಳಲ್ಲಿ ‘ಟೀಚರ್’ ಎಂಬ ಪದವನ್ನು ಬಳಸುವಂತೆ ಸೂಚನೆಗಳನ್ನು ನೀಡುವಂತೆ ಆಯೋಗದ ಅಧ್ಯಕ್ಷ ಕೆ.ವಿ. ಮನೋಜ್ ಕುಮಾರ್ ಮತ್ತು ಸದಸ್ಯ ಸಿ. ವಿಜಯಕುಮಾರ್ ಅವರನ್ನೊಳಗೊಂಡ ಪೀಠವೊಂದು ಬುಧವಾರ ಸಾರ್ವತ್ರಿಕ ಶಿಕ್ಷಣ ಇಲಾಖೆಗೆ ಸೂಚನೆ ನೀಡಿದೆ.

‘ಸರ್’ ಅಥವಾ ‘ಮೇಡಮ್’ ಬದಲು ‘ಟೀಚರ್’ ಎಂದು ಕರೆಯುವುದರಿಂದ ಎಲ್ಲಾ ಶಾಲೆಗಳ ಮಕ್ಕಳ ನಡುವೆ ಸಮಾನತೆ ಕಾಯ್ದುಕೊಳ್ಳಲು ಸಾಧ್ಯವಾಗುತ್ತದೆ ಹಾಗೂ ಅದು ಶಿಕ್ಷಕರೊಂದಿಗಿನ ಮಕ್ಕಳ ಬಾಂಧವ್ಯವನ್ನೂ ವೃದ್ಧಿಸುತ್ತದೆ ಎಂದು ಆಯೋಗ ಅಭಿಪ್ರಾಯಪಟ್ಟಿದೆ.

ಶಿಕ್ಷಕರ ಲಿಂಗಕ್ಕೆ ಅನುಗುಣವಾಗಿ ಅವರನ್ನು ‘ಸರ್’ ಅಥವಾ ‘ಮೇಡಮ್’ ಎಂಬುದಾಗಿ ಕರೆಯುವುದರಿಂದ ಉಂಟಾಗುವ ತಾರತಮ್ಯವನ್ನು ಕೊನೆಗೊಳಿಸುವಂತೆ ಕೋರಿ ವ್ಯಕ್ತಿಯೊಬ್ಬರು ಸಲ್ಲಿಸಿರುವ ಅರ್ಜಿಯ ವಿಚಾರಣೆ ನಡೆಸಿದ ಬಳಿಕ, ಆಯೋಗವು ಈ ನಿರ್ದೇಶನಗಳನ್ನು ಹೊರಡಿಸಿದೆ ಎಂದು ಮೂಲಗಳು ತಿಳಿಸಿವೆ.