ಅಮೆರಿಕಾದಲ್ಲಿ ಕಣ್ಣಿನ ಡ್ರಾಪ್ಸ್ನಿಂದ ಅಡ್ಡಪರಿಣಾಮ: ಚೆನ್ನೈ ಕಂಪೆನಿ ಮೇಲೆ ತಡ ರಾತ್ರಿ ಅಧಿಕಾರಿಗಳ ದಾಳಿ
ಚೆನ್ನೈ: ಚೆನ್ನೈನ ಗ್ಲೋಬಲ್ ಫಾರ್ಮಾ ಹೆಲ್ತ್ಕೇರ್ ತಯಾರಿಕೆಯ ಕಣ್ಣಿನ ಡ್ರಾಪ್ಸ್ (eye drops) ಒಂದು ಅಮೆರಿಕಾದಲ್ಲಿ ದೃಷ್ಟಿ ದೋಷ (Chennai pharma firm) ಹಾಗೂ ಒಂದು ಸಾವಿಗೆ ಕಾರಣವಾಗಿದೆ ಎಂಬ ಅಲ್ಲಿನ ಆರೋಗ್ಯ ಪ್ರಾಧಿಕಾರದ ವರದಿಯ ಹಿನ್ನೆಲೆಯಲ್ಲಿ ಸಂಸ್ಥೆಯ ಫ್ಯಾಕ್ಟರಿಗೆ ಶುಕ್ರವಾರ ತಡರಾತ್ರಿ ಸೆಂಟ್ರಲ್ ಡ್ರಗ್ ಸ್ಟಾಂಡರ್ಡ್ ಕಂಟ್ರೋಲ್ ಆರ್ಗನೈಜೇಶನ್ ಮತ್ತು ತಮಿಳುನಾಡು ಡ್ರಗ್ ಕಂಟ್ರೋಲರ್ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ.
ಈ ನಿರ್ದಿಷ್ಟ ಆರ್ಟಿಫಿಶಿಯಲ್ ಟಿಯರ್ಸ್ ಲುಬ್ರಿಕೆಂಟ್ ಕಣ್ಣಿನ ಡ್ರಾಪ್ಸ್ ಉತ್ಪನ್ನವನ್ನು ಕಂಪೆನಿ ಈಗಾಗಲೇ ಮಾರುಕಟ್ಟೆಯಿಂದ ವಾಪಸ್ ಪಡೆದಿದೆ.
ಉತ್ಪನ್ನದ ವಿತರಕರು, ರಿಟೇಲರ್ಗಳು ಹಾಗೂ ಗ್ರಾಹಕರಿಗೆ ಈ ಉತ್ಪನ್ನ ಬಳಸದಂತೆ ಸೂಚಿಸುತ್ತಿರುವುದಾಗಿ ಕಂಪೆನಿ ತನ್ನ ವೆಬ್ಸೈಟ್ನಲ್ಲಿ ತಿಳಿಸಿದೆಯಲ್ಲದೆ ತಾನು ಅಮೆರಿಕಾದ ಸಂಬಂಧಿತ ಪ್ರಾಧಿಕಾರದೊಂದಿಗೆ ಸಂಪರ್ಕದಲ್ಲಿದ್ದು ಈ ಉತ್ಪನ್ನ ಬಳಸಿ ತೊಂದರೆಗೀಡಾದವರು ತಕ್ಷಣ ವೈದ್ಯಕೀಯ ಸಹಾಯ ಪಡೆಯಬೇಕೆಂದು ಹೆಳಿದೆ.
ಅಮೆರಿಕಾದ ಫುಡ್ ಎಂಡ್ ಡ್ರಗ್ ಅಡ್ಮಿನಿಸ್ಟ್ರೇಶನ್ ಪ್ರಕಾರ ಈ ನಿರ್ದಿಷ್ಟ ಕಣ್ಣಿನ ಡ್ರಾಪ್ಸ್ ಬಳಸಿದವರ ಪೈಕಿ 55 ಮಂದಿ ಕಣ್ಣಿನ ಸೋಂಕು, ಖಾಯಂ ದೃಷ್ಟಿ ದೋಷ ಸಹಿತ ಸಮಸ್ಯೆಗಳನ್ನು ಎದುರಿಸಿದ್ದು ಒಂದು ಸಾವು ಕೂಡ ಸಂಭವಿಸಿದೆ.
ಕಲುಷಿತ ಐ ಡ್ರಾಪ್ಸ್ ಬಳಕೆಯಿಂದ ಕಣ್ಣಿನ ಸೋಂಕುಗಳು ಹಾಗೂ ಅಂಧತ್ವ ಕೂಡ ಉಂಟಾಗಬಹುದೆಂದು ಎಫ್ಡಿಎ ಹೇಳಿದೆ.
ಸಾಮಾನ್ಯವಾಗಿ ಆರ್ಟಿಫಿಶಿಯಲ್ ಟಿಯರ್ಸ್ ಲುಬ್ರಿಕೆಂಟ್ ಕಣ್ಣಿನ ಡ್ರಾಪ್ಸ್ ಅನ್ನು ಕಣ್ಣುಗಳಲ್ಲಿ ತುರಿಕೆ ಅಥವಾ ಶುಷ್ಕ ಕಣ್ಣುಗಳಿಗೆ ಚಿಕಿತ್ಸೆಗಾಗಿ ಬಳಸಲಾಗುತ್ತದೆ. ಆದರೆ ಈ ನಿರ್ದಿಷ್ಟ ಉತ್ಪನ್ನದಲ್ಲಿ ಔಷಧ ಪ್ರತಿರೋಧಕ ಬ್ಯಾಕ್ಟಿರಿಯಾ ಇದೆ ಎಂದು ಎಫ್ಡಿಎ ಹೇಳಿದೆ.
ಈ ಹಿಂದೆ ಭಾರತೀಯ ಕಂಪೆನಿಯೊಂದು ತಯಾರಿಸಿದ್ದ ಕೆಮ್ಮಿನ ಸಿರಪ್ ಸೇವಿಸಿ ಗ್ಯಾಂಬಿಯಾ ಮತ್ತು ಉಜ್ಬೆಕಿಸ್ತಾನದಲ್ಲಿ ಮಕ್ಕಳ ಸಾವು ಸಂಭವಿಸಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿತ್ತು.
ಇದನ್ನೂ ಓದಿ: ನಟಿ ಸನ್ನಿ ಲಿಯೋನ್ ಫ್ಯಾಶನ್ ಶೋ ಕಾರ್ಯಕ್ರಮ ನಡೆಯಲಿರುವ ಸ್ಥಳದ ಸಮೀಪ ಪ್ರಬಲ ಸ್ಫೋಟ