ಮೋದಿಗೆ ಅದಾನಿಯೇ ʻಪವಿತ್ರ ಗೋವುʼ: ಶಿವಸೇನೆ ವ್ಯಂಗ್ಯ

ಮುಂಬೈ: ಫೆಬ್ರವರಿ 14 ರಂದು 'ವೆಲಂಟೈನ್ಸ್‌ ಡೇ' (ಪ್ರೇಮಿಗಳ ದಿನಾಚರಣೆ) ಬದಲು 'ಗೋವು ಆಲಿಂಗನ' (Cow Hug Day) ದಿನವನ್ನಾಗಿ ಆಚರಿಸಬೇಕೆಂಬ ಪ್ರಾಣಿ ಕಲ್ಯಾಣ ಮಂಡಳಿಯ ಸುತ್ತೋಲೆಯ ಕುರಿತು ವ್ಯಂಗ್ಯವಾಡಿರುವ ಉದ್ಧವ್‌ ಠಾಕ್ರೆ ನೇತೃತ್ವದ ಶಿವಸೇನೆ (Shiv Sena (UBT)),  ಪ್ರಧಾನಿ ನರೇಂದ್ರ ಮೋದಿಗೆ ಉದ್ಯಮಿ ಗೌತಮ್‌ ಅದಾನಿ (Gautam Adani) ಅವರೇ 'ಪವಿತ್ರ ಗೋವು' ಆಗಿದ್ದಾರೆ ಎಂದು ಹೇಳಿದೆ.

ಸಾಮ್ನಾದಲ್ಲಿ ಸಂಪಾದಕೀಯದಲ್ಲಿ  ಶಿವಸೇನೆ ಈ ಕುರಿತು ಉಲ್ಲೇಖಿಸಿ, "ಅದಾನಿ ಸ್ಟಾಕ್‌ ಮಾರ್ಕೆಟ್‌ನ ದೊಡ್ಡ ಗೂಳಿ, ಆದರೆ ಮೋದಿಗೆ ಅವರು ಪವಿತ್ರ ಗೋವು," ಎಂದು ಹೇಳಿದೆ. "ಪ್ರಧಾನಿ ಮೋದಿ ದೊಡ್ಡ ಗೂಳಿಯನ್ನು ಆಲಂಗಿಸಿದ್ದಾರೆ ಮತ್ತು ತಮ್ಮ ಆಲಿಂಗನವನ್ನು ಸಡಿಲಗೊಳಿಸಲು ಸಿದ್ಧರಿಲ್ಲ," ಎಂದು ಶಿವಸೇನೆ ಹೇಳಿದೆ.

ಅದಾನಿ ಕುರಿತು ಸಂಸತ್ತಿನಲ್ಲಿ ಕೋಲಾಹಲವುಂಟಾಗಿದ್ದರೂ ಈ ʻಹಗರಣʼದ ಬಗ್ಗೆ ಪ್ರಧಾನಿ ಒಂದು ಶಬ್ದ ಕೂಡ ಆಡಿಲ್ಲ ಎಂದು ಶಿವಸೇನೆ ಹೇಳಿದೆ.

"ಅದಾನಿ ಹಗರಣದ ಕುರಿತಂತೆ ಜನರಿಗೆ ಪ್ರಧಾನಿಯಿಂದ ಸ್ಪಷ್ಟೀಕರಣ ಬೇಕಿದೆ, ಆದರೆ ಮೋದಿ ಸರ್ಕಾರ ಜನರನ್ನು ಸುಮ್ಮನಾಗಿಸಲು ಧರ್ಮದ ಡೋಸ್‌ ನೀಡಿದೆ. ಮೋದಿ ಸಂಸತ್ತಿನಲ್ಲಿ ಅದಾನಿ ಬಗ್ಗೆ ಮಾತನಾಡಿಲ್ಲ, ಆದರೆ ಅವರ ಸರ್ಕಾರ ಗೋವುಗಳ ಬಗ್ಗೆ ಮಾತನಾಡಿದೆ," ಎಂದು ಸಂಪಾದಕೀಯದಲ್ಲಿ ಶಿವಸೇನೆ ಬರೆದಿದೆ.

ಇದನ್ನೂ ಓದಿ: ಬಿಜೆಪಿಯ ವಿಕಾಸ್‌ ರಥ ಯಾತ್ರೆಯ ನಡುವೆ ತುರಿಕೆ ತಾಳಲಾರದೆ ಕುರ್ತಾ ತೆಗೆದು ಸ್ಥಳದಲ್ಲಿಯೇ ಒಗೆದ ಮಧ್ಯ ಪ್ರದೇಶ ಸಚಿವ