ಯುವಕನ ಹೊಟ್ಟೆಯಲ್ಲಿತ್ತು ಗರ್ಭಕೋಶ, ಅಂಡಾಶಯ!
ಶಸ್ತ್ರಕ್ರಿಯೆ ಮೂಲಕ ಹೊರತೆಗೆದ ಉದಯಪುರ ವೈದ್ಯರು
ಉದಯಪುರ್, ಜೂ.16: ಪರ್ಸಿಸ್ಟೆಂಟ್ ಮುಲ್ಲೇರಿಯನ್ ಡಕ್ಟ್ ಸಿಂಡ್ರೋಮ್ ಎಂಬ ಅತ್ಯಂತ ವಿರಳ ವೈದ್ಯಕೀಯ ಸಮಸ್ಯೆಯಿಂದ ಬಳಲುತ್ತಿದ್ದ 22 ವರ್ಷದ ಯುವಕನ ಉದರದಿಂದ ಇಲ್ಲಿನ ವೈದ್ಯರು ಗರ್ಭಕೋಶ, ಅಂಡಾಶಯ ಹಾಗೂ ಗರ್ಭಕೋಶದ ಕತ್ತು (ಸರ್ವಿಕ್ಸ್) ಹೊರತೆಗೆದಿದ್ದಾರೆ. ಯುವಕನ ಹೆಸರನ್ನು ಗೌಪ್ಯವಾಗಿಡಲಾಗಿದೆ. ಇದೀಗ ಯುವಕ ಆರೋಗ್ಯದಿಂದಿದ್ದಾನೆ.
‘‘ಇಂತಹ ಶಸ್ತ್ರಕ್ರಿಯೆಯನ್ನು ನಾವು ಮೊದಲ ಬಾರಿ ಮಾಡಿದ್ದೇವೆ. ವೈದ್ಯಕೀಯ ಇತಿಹಾಸದಲ್ಲೇ ಇಂತಹ ಸುಮಾರು 400 ಪ್ರಕರಣಗಳು ಇಲ್ಲಿಯ ತನಕ ವರದಿಯಾಗಿರಬಹುದು. ಪುರುಷನ ದೇಹದಿಂದ ಗರ್ಭಕೋಶವನ್ನು ಬೇರ್ಪಡಿಸುವುದು ಒಂದು ಸವಾಲಿನ ಕೆಲಸವಾಗಿತ್ತು’’ ಎಂದು ಶಸ್ತ್ರಕ್ರಿಯೆ ನಡೆಸಿದ ಸ್ತ್ರೀರೋಗ ತಜ್ಞೆ ಡಾ.ಶಿಲ್ಪಾ ಗೋಯೆಲ್ ಹೇಳಿದ್ದಾರೆ. ಮೂತ್ರಶಾಸ್ತ್ರಜ್ಞ ಡಾ.ಮನೀಶ್ ಭಟ್ ಕೂಡ ಈ ಶಸ್ತ್ರಕ್ರಿಯೆಗೆ ನೆರವಾಗಿದ್ದು, ಶಸ್ತ್ರಕ್ರಿಯೆ ಜಿಬಿಎಚ್ ಅಮೆರಿಕನ್ ಹಾಸ್ಪಿಟಲ್ ನಲ್ಲಿ ನಡೆಸಲಾಗಿತ್ತು.
ಆ ಯುವಕ ಎದುರಿಸುತ್ತಿದ್ದಂತಹ ಆರೋಗ್ಯ ಸಮಸ್ಯೆಯಿರುವವರು ಪುರುಷರ ಮತ್ತು ಮಹಿಳೆಯರ ಸಂತಾನೋತ್ಪತ್ತಿ ಅಂಗಗಳನ್ನು ಹೊಂದಿರುತ್ತಾರೆ. ಆದರೆ ಈ ಸಮಸ್ಯೆಯಿರುವ ಪುರುಷರಲ್ಲಿ ಸಾಮಾನ್ಯ ಪುರುಷ ಕ್ರೊಮೋಸೋಮ್ಸ್ ಇರುತ್ತದೆ ಹಾಗೂ ಅವರು ಬಾಹ್ಯವಾಗಿ ಪುರುಷರ ಜನನಾಂಗವನ್ನೇ ಹೊಂದಿರುತ್ತಾರಾದರೂ ಅವರ ವೃಷಣಗಳಲ್ಲಿ ಸಮಸ್ಯೆಯಿರುತ್ತದೆ. ಅಲ್ಲದೆ, ಮಾಂಸಯುಕ್ತ ಹರ್ನಿಯಾ ಸಮಸ್ಯೆ ಕೂಡ ಅವರಿಗಿರುತ್ತದೆ. ಹದಿನೆಂಟು ತಿಂಗಳಿನಿಂದ 29 ವರ್ಷದವರೆಗಿನ ಯುವಕರಲ್ಲಿ ಮಾತ್ರ ಈ ಸಮಸ್ಯೆ ಕಂಡು ಬರಬಹುದು ಎಂದು ವೈದ್ಯರು ಹೇಳುತ್ತಾರೆ.
ಆ ಯುವಕನ ಹೆತ್ತವರಿಗೆ ಆತನ ಸಮಸ್ಯೆಯ ಬಗ್ಗೆ ಅರಿವಿತ್ತಾದರೂ ಆತನಿಗೆ ಮದುವೆ ಮಾಡುವ ಯೋಚನೆ ಬಂದಾಗ ಚಿಕಿತ್ಸೆಗೆ ಮುಂದಾಗಿದ್ದಾರೆ.