-

ಓ ಮೆಣಸೇ....

-

ಮುಂಬರುವ ಚುನಾವಣೆಯಲ್ಲಿ ಯಾವ ಪಕ್ಷದ ಜೊತೆಗೂ ಮೈತ್ರಿ ಮಾಡಿಕೊಳ್ಳದೆ, ಎರಡೂ ಪಕ್ಷಗಳ ವಿರುದ್ಧ ನಮ್ಮ ಅಭ್ಯರ್ಥಿಗಳನ್ನು ಕಣಕ್ಕಿಳಿಸುತ್ತೇವೆ -ದೇವೇಗೌಡ, ಮಾಜಿ ಪ್ರಧಾನಿ
ಇದೇನು ಚೌಕಾಶಿಯ ಮೊದಲ ಹೆಜ್ಜೆಯೇ?

ಗೊತ್ತಿಲ್ಲದಿರುವ ದಾರಿಯಲ್ಲಿ ಹೋಗುವುದಕ್ಕಿಂತ ಗೊತ್ತಿರುವ ದಾರಿಯಲ್ಲಿ ಹೋಗುವುದು ಉತ್ತಮ -ಸಿ.ಎಂ.ಇಬ್ರಾಹೀಂ, ವಿ.ಪ. ಸದಸ್ಯ
ಅಷ್ಟು ವರ್ಷಗಳ ಬಳಿಕ ಮರಳಿದ್ದರಿಂದ, ಗೊತ್ತಿರುವ ಹಾದಿಯ ಕವಲುಗಳೆಲ್ಲಾ ಮರೆತು ಹೋಗಿವೆ ಎಂದು ಗೊಣಗುತ್ತ ಬೇರೊಂದು ದಾರಿಯತ್ತ ಹೊರಳುವುದು ಯಾವಾಗ?

ಎಂ.ವೀರಪ್ಪ ಮೊಯ್ಲಿ ಸಾಧಕರ ಶಿಲ್ಪಿ ಎಂದು ಹೇಳಿದರೆ ತಪ್ಪಾಗಲಾರದು -ಡಾ.ಜಿ.ಪರಮೇಶ್ವರ್, ಮಾಜಿ ಡಿಸಿಎಂ
ಸಮಯ ಸಾಧಕರ ಶಿಲ್ಪಿಯೇ?

ಎಲ್ಲರೂ ಮೊದಲು ನಿಮ್ಮನ್ನು ನೋಡಿ ನಗುತ್ತಾರೆ, ಮತ್ತೆ ನಿರ್ಲಕ್ಷಿಸುತ್ತಾರೆ, ಕೊನೆಗೆ ಅನುಸರಿಸುತ್ತಾರೆ ಎಂದು ಗಾಂಧೀಜಿ ಹೇಳಿದ ಮಾತು ನನ್ನ ಜೀವನದಲ್ಲಿ ನಿಜವಾಗಿದೆ -ಎಂ.ವೀರಪ್ಪ ಮೊಯ್ಲಿ, ಮಾಜಿ ಮುಖ್ಯಮಂತ್ರಿ
ನಿಜವಾಗಿರುವುದು ಆ ಪೈಕಿ ಮೊದಲೆರಡು ಹಂತಗಳು ಮಾತ್ರ.

ರಾಜಕಾರಣದಲ್ಲಿ ವೌಲ್ಯಾಧಾರಿತ ಆಶಯ ಕಡಿಮೆಯಾಗುತ್ತಿದ್ದು, ಪ್ರಜಾತಂತ್ರ ಕಲುಷಿತವಾಗುತ್ತಿದೆ -ಬಸವರಾಜ ಹೊರಟ್ಟಿ, ವಿ.ಪ. ಸಭಾಪತಿ
ಕನಿಷ್ಠ ನಿಮ್ಮ ಪಕ್ಷದವರಿಗಾದರೂ ಇದನ್ನು ಮನವರಿಕೆ ಮಾಡಿಸಲು ನಿಮಗೆ ಸಾಧ್ಯವಾಗಿದ್ದರೆ..!

ಇಬ್ಬರು ಸಿದ್ದುಗಳಿಂದ ಕಾಂಗ್ರೆಸ್ ನಾಶವಾಗುತ್ತಿದೆ -ಜಗದೀಶ್ ಶೆಟ್ಟರ್, ಮಾಜಿ ಸಿಎಂ
ಪಂಜಾಬಿನ ಸಿದ್ದು ಈಗಾಗಲೇ ಲಂಘನಕ್ಕೆ ಸಿದ್ಧರಾಗಿರುವುದರಿಂದ ನೀವು, ನಿಮ್ಮ ಪಕ್ಷವನ್ನು ನಾಶಮಾಡಲು ಹೊರಟಿರುವ ಇನ್ನೊಬ್ಬ ಸಿದ್ದುವಿನ ಕುರಿತು ಚಿಂತಿಸಿ.

ಇತ್ತೀಚೆಗೆ ಜನರು ಸಾಧನೆ ನೋಡಿ ಮತ ಹಾಕುವುದನ್ನು ಕಡಿಮೆ ಮಾಡಿದ್ದಾರೆ -ಸಿದ್ದರಾಮಯ್ಯ, ಮಾಜಿ ಸಿಎಂ
ಹೀಗೆಲ್ಲಾ ಸಮಾಧಾನ ಪಟ್ಟುಕೊಳ್ಳುವ ಬದಲು, ಮತ ಗಳಿಸುವ ಮಾರ್ಗಗಳ ಬಗ್ಗೆ ಯೋಚಿಸಿ.

ಗಣಿ, ಶಿಕ್ಷಣ, ಅಬಕಾರಿ, ಗುತ್ತಿಗೆ ಹಾಗೂ ಭೂ ಮಾಫಿಯಾಗಳನ್ನೆಲ್ಲ ಯಾವ ಮುಲಾಜಿಲ್ಲದೆ ಬಗ್ಗು ಬಡಿಯುತ್ತೇವೆ -ಬಸವರಾಜ ಬೊಮ್ಮಾಯಿ, ಮುಖ್ಯಮಂತ್ರಿ
ಯಾಕೆ? ಅವುಗಳ ಮೇಲೆ ಏಕಸ್ವಾಮ್ಯ ಸ್ಥಾಪಿಸುವುದಕ್ಕಾಗಿಯೇ?

ರಸ್ತೆ ಅಗೆಯದೆ ಯಾವುದೇ ಕೆಲಸ ಆಗಲ್ಲ -ಡಾ.ಅಶ್ವತ್ಥ ನಾರಾಯಣ, ಸಚಿವ
ಹೌದು ಹೊಂಡಗಳ ನಿರ್ಮಾಣವೇ ಗುರಿಯಾದಾಗ ಅಗೆಯುವ ಕೆಲಸವೇ ಪ್ರಧಾನವಾಗಿ ಬಿಡುತ್ತದೆ.

ಕರ್ನಾಟಕದ ಜನತೆ ಡಬ್ಬಾ ಇಂಜಿನ್ ಸರಕಾರಗಳ ದುರಾಡಳಿತದಿಂದ ಬೇಸತ್ತು ಬದಲಾವಣೆ ಬಯಸುತ್ತಿದ್ದಾರೆ -ಸಲೀಂ ಅಹ್ಮದ್, ಕೆಪಿಸಿಸಿ ಕಾರ್ಯಾಧ್ಯಕ್ಷ
ಹಾಗಂತ ಅವರು ಬರೀ ಖಾಲಿ ಡಬ್ಬಾಗಳಿಗೇನೂ ಮತ ನೀಡುವುದಿಲ್ಲ.

ರಾಜ್ಯ ವಿಧಾನಸಭೆಗೆ ನಾಳೆಯೇ ಚುನಾವಣೆ ನಡೆದರೂ ಎದುರಿಸಲು ಕಾಂಗ್ರೆಸ್ ಸಿದ್ಧ-ಡಿ.ಕೆ.ಶಿವಕುಮಾರ್, ಕೆಪಿಸಿಸಿ ಅಧ್ಯಕ್ಷ
ಸೋಲುವುದಕ್ಕೆ ಯಾವುದೇ ಸಿದ್ಧತೆ ಬೇಕಾಗಿಲ್ಲ ಸಿದ್ದರಾಮಣ್ಣ.

   ಒಂದು ಕಾಲದಲ್ಲಿ ದವಸ ಧಾನ್ಯಗಳಿಗೆ ಬೇರೆ ದೇಶಗಳ ಮುಂದೆ ಕೈ ಚಾಚುವ ಸ್ಥಿತಿಯಲ್ಲಿದ್ದ ಭಾರತ ಈಗ ಆಹಾರ ಉತ್ಪಾದನೆಯಲ್ಲಿ ಸ್ವಾವಲಂಬನೆ ಸಾಧಿಸಿದೆ -ಶೋಭಾ ಕರಂದ್ಲಾಜೆ, ಕೇಂದ್ರ ಸಚಿವೆ
ಈಗ ದೇಶ ಅಂಬಾನಿ, ಅದಾನಿ ಮುಂದೆ ಕೈ ಚಾಚಬೇಕಾಗಿದೆ.

ಯಡಿಯೂರಪ್ಪ ತಮ್ಮ ಪುತ್ರನಿಗೆ ಸಚಿವ ಸ್ಥಾನ ಕೊಡಿಸಲು ಒತ್ತಡ ಹೇರುತ್ತಿದ್ದಾರೆ ಎಂಬುದು ಸತ್ಯಕ್ಕೆ ದೂರ -ಬಿ.ವೈ.ವಿಜಯೇಂದ್ರ, ಬಿಜೆಪಿ ಉಪಾಧ್ಯಕ್ಷ
ಮುಖ್ಯಮಂತ್ರಿ ಸ್ಥಾನಕ್ಕೆ ಒತ್ತಡ ಹಾಕುತ್ತಿರುವುದು ಸತ್ಯಕ್ಕೆ ಹತ್ತಿರ ಎಂದು ಹೇಳುತ್ತಿದ್ದೀರಾ?

ಗೋಹತ್ಯೆ ನಿಷೇಧ ಕಾಯ್ದೆ ಜಾರಿಗೊಂಡ ಬಳಿಕ 12 ಸಾವಿರ ಗೋವುಗಳ ರಕ್ಷಣೆ ಮಾಡಲಾಗಿದೆ -ಪ್ರಭು ಚೌಹಾಣ್, ಸಚಿವ
ಈ ಕಾಯ್ದೆಯ ಮೂಲಕ ಗೋವು ಸಾಕುವ ಎಷ್ಟು ರೈತರನ್ನು ಸಾಯಿಸಲಾಗಿದೆ? ಅದರ ಬಗ್ಗೆ ಲೆಕ್ಕ ಇದೆಯೇ?

ಸಂಪುಟದಲ್ಲಿರಲು ನಾನೇನು ಗೂಟ ಹೊಡೆದು ಕುಳಿತಿಲ್ಲ-ಈಶ್ವರಪ್ಪ, ಸಚಿವ
ಎಬ್ಬಿಸಿ ಓಡಿಸುವ ನಿರ್ಧಾರವಾದರೆ ಗೂಟ ಸಹಿತ ಕಿತ್ತೊಗೆಯುವುದು ಕಷ್ಟವೇನಲ್ಲ.

ಈ ದೇಶಕ್ಕೆ ಬ್ರಿಟಿಷರಿಗಿಂತ ಹೆಚ್ಚು ಮೋಸ ಮಾಡಿದ್ದು ಕಾಂಗ್ರೆಸಿಗರು -ಗೋವಿಂದ ಕಾರಜೋಳ, ಸಚಿವ
ಆದ್ದರಿಂದ ಬ್ರಿಟಿಷರನ್ನು ಮತ್ತೆ ಆಮಂತ್ರಿಸುತ್ತೀರಾ?

ಯಡಿಯೂರಪ್ಪರಿಗೆ ವಯಸ್ಸಾಗಿದೆ. ಅವರು ಆರಾಮವಾಗಿ ಮನೆಯಲ್ಲಿರುವುದು ಒಳ್ಳೆಯದು -ಬಸನಗೌಡ ಪಾಟೀಲ್ ಯತ್ನಾಳ್, ಶಾಸಕ
ಈ ಮೂಲಕ ನೀವು ಎಪ್ಪತ್ತೆರಡರ ಹರೆಯದ ಮೋದಿ ಮಹಾಶಯರಿಗೆ ಸೂಚನೆ ನೀಡುತ್ತಿಲ್ಲ ತಾನೇ?
 
ಮುಖ್ಯಮಂತ್ರಿಯಾದ ಮೇಲೆ ಬಸವರಾಜ ಬೊಮ್ಮಾಯಿಯವರ ಹೃದಯ ಕಲ್ಲಿನಷ್ಟೇ ಕಠಿಣವಾಗಿದೆ -ದೇವನೂರ ಮಹಾದೇವ, ಸಾಹಿತಿ
ಕಲ್ಲಿಗೆ ಕಿವಿ ಇದ್ದಿದ್ದರೆ ಅದು ನಿಮ್ಮ ಈ ಬಗೆಯ ಹೋಲಿಕೆಯನ್ನು ಖಂಡಿತ ಪ್ರಭಟಿಸುತ್ತಿತ್ತು.

ಚುನಾವಣೆ ಸಂದರ್ಭದಲ್ಲಿ ಮಾತ್ರವಲ್ಲ ನಾವು ಎಲ್ಲ ಕಾಲದಲ್ಲೂ ಹಿಂದೂಗಳು -ಸಿ.ಟಿ.ರವಿ, ಶಾಸಕ
ದೇವಸ್ಥಾನದಲ್ಲಿ ಬ್ರಾಹ್ಮಣರ ಪಂಕ್ತಿಯಲ್ಲೊಮ್ಮೆ ಕುಳಿತು ನೋಡಿ.

ನನ್ನ ಜೀವನದಲ್ಲಿ ಕದ್ದುಮುಚ್ಚಿ ಮಾಡಿದ ಯಾವ ಸಂಗತಿಗಳೂ ಇಲ್ಲ -ಕುಮಾರಸ್ವಾಮಿ, ಮಾಜಿ ಸಿಎಂ
ಮುಚ್ಚುಮರೆ ಮಾಡುವುದಕ್ಕೆ ಒಂದಷ್ಟು ಲಜ್ಜೆ ಇರಬೇಕಾಗುತ್ತದೆ.

ಮುಖ್ಯಮಂತ್ರಿ ಮಾಡಿ, ಮುಖ್ಯಮಂತ್ರಿ ಮಾಡಿ ಎಂದು ಯಾರ ಮನೆಗೂ ಹೋಗಿ ಬೇಡುವ ಜಾಯಮಾನ ನನ್ನದಲ್ಲ -ಬಸನಗೌಡ ಪಾಟೀಲ್ ಯತ್ನಾಳ್, ಶಾಸಕ
ಎಲ್ಲರಿಗೂ ಕೇಳಿಸುವಂತೆ ಈರೀತಿ ಚೀರಾಡುತ್ತಿದ್ದರೆ ಮತ್ತೆ ಮನೆ ಗಳಿಗೆ ಹೋಗಿ ದುಂಬಾಲು ಬೀಳುವ ಅಗತ್ಯವೇ ಎಲ್ಲಿ ಉಳಿದಿರುತ್ತದೆ?

ಪ್ರಧಾನಿ ಮೋದಿ ಪ್ರಚಂಡ ಚೈತನ್ಯ ಮತ್ತು ಕ್ರಿಯಾಶೀಲತೆ ಹೊಂದಿರುವ ವ್ಯಕ್ತಿ -ಶಶಿ ತರೂರು, ಸಂಸದ
ಈ.ಡಿ.ಯವರಿಂದ ಸೂಚನೆಯೇನಾದರೂ ಬಂತೇ?

ವಿಧಾನ ಸಭೆಯಲ್ಲಿ ಖಾಲಿ ಇರುವ ಕುರ್ಚಿಯಲ್ಲಿ ಕುಳಿತವರೇ ಸಚಿವರು ಎಂದು ನಿಯಮಕ್ಕೆ ತಿದ್ದುಪಡಿ ತರಬೇಕು -ರಾಜು ಗೌಡ, ಶಾಸಕ
ಕುರ್ಚಿಗಳಲ್ಲಿ ನಿದ್ರಿಸುವವರು ಸಚಿವರಲ್ಲ ಎಂದು ಘೋಷಿಸಿದರೆ ನಿಮ್ಮ ಭಾಗ್ಯದ ಬಾಗಿಲು ತೆರೆದೀತೇನೋ!

ಮಕ್ಕಳಿಗೆ ವಿದ್ಯೆಗಿಂತ ಮುಖ್ಯವಾದದ್ದು ಬೇರೊಂದಿಲ್ಲ -ಬಸವರಾಜ ಬೊಮ್ಮಾಯಿ, ಮುಖ್ಯಮಂತ್ರಿ
ಇದನ್ನು ಅರಿತು ಶಾಲೆಗಳಿಂದ ಕೆಲವು ವಿದ್ಯಾರ್ಥಿನಿಯರನ್ನು ಧಿರಿಸಿನ ಹೆಸರಿನಲ್ಲಿ ಬಹಿಷ್ಕರಿಸಲಾಯಿತೇ?

ಕೋವಿಡ್ ಸಂಪೂರ್ಣವಾಗಿ ಹೋಗಿಲ್ಲ, ಸದ್ಯ ಲಸಿಕೆಯಿಂದ ನಿಯಂತ್ರಿಸಲಾಗಿದೆ -ಡಾ.ಸುಧಾಕರ್, ಸಚಿವ
ಲಸಿಕೆಗೂ ಸಿಗದ ದ್ವೇಷವೆಂಬ ವ್ಯಾಧಿಗೆ ಏನು ಮಾಡೋಣ?

ಜಿಎಸ್‌ಟಿ ನಮ್ಮ ಕೂಸು. ಈ ಬಗ್ಗೆ ಹೆಮ್ಮೆ ಇದೆ. ಆದರೆ ಅದನ್ನು ಜಾರಿಗೊಳಿಸಿದ ರೀತಿ ವಿನಾಶಕಾರಿಯಾಗಿದೆ -ಬಿ.ಕೆ.ಹರಿಪ್ರಸಾದ್, ವಿ.ಪ. ನಾಯಕ
ನಿಮ್ಮ ಇನ್ನೂ ಅನೇಕ ಕೂಸುಗಳು ನೀವು ಬಯಸದ ದಿಕ್ಕಿನಲ್ಲಿ ಬೆಳೆದು ನಿಮಗೆ ಸವಾಲೆಸೆಯುತ್ತಿವೆ.

ಹುಕ್ಕಾ ಬಾರ್ ಮುಚ್ಚುವುದಿಲ್ಲ, ಆದರೆ ಅಲ್ಲಿಗೆ ವಿದ್ಯಾರ್ಥಿಗಳು ಹೋಗುವಂತಿಲ್ಲ -ಆರಗ ಜ್ಞಾನೇಂದ್ರ, ಸಚಿವ
ಅಲ್ಲಲ್ಲಿ ಮಾರಕ ಹೊಂಡಗಳನ್ನು ತೋಡಿಟ್ಟು, ಜೀವ ಬೇಕಾದವರು ಇಲ್ಲಿಗೆ ಬಂದು ಬೀಳಬಾರದು ಎಂದು ಎಚ್ಚರಿಸಿದಂತಿದೆ.

ಕೊಟ್ಟಿರುವ ಖಾತೆಗೂ, ಪಕ್ಷಕ್ಕೂ ನ್ಯಾಯ ಒದಗಿಸದೆ ಪಕ್ಷಕ್ಕೆ ಹೊರೆಯಾಗಿರುವ ಸಚಿವರ ಬಗ್ಗೆ ಮುಖ್ಯಮಂತ್ರಿ ಗಮನಹರಿಸಬೇಕು -ಸಿ.ಟಿ.ರವಿ, ಶಾಸಕ
ನನಗೆ ಸಚಿವ ಸ್ಥಾನ ಕೊಡಿ ಎಂದು ಬಾಯಿ ಬಿಟ್ಟು ಹೇಳುವುದಕ್ಕೆ ಅಷ್ಟೊಂದು ಹಿಂಜರಿಕೆ ಯಾತಕ್ಕೆ?

ಕರ್ನಾಟಕ ಹಾಗೂ ಅದರ ರಾಜಧಾನಿ ಬೆಂಗಳೂರು ಯಾವಾಗಲೂ ನನ್ನ ಹೃದಯಕ್ಕೆ ಬಹಳ ಹತ್ತಿರ -ರಾಜನಾಥ್ ಸಿಂಗ್, ಕೇಂದ್ರ ಸಚಿವ
ಇಲ್ಲಿನ ಖ್ಯಾತ ಹೃದಯಾಲಯಗಳು ಕಾರಣವೇ?

 

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

The views expressed in comments published on www.varthabharati.in are those of the comment writers alone. They do not represent the views or opinions of varthabharati.in or its staff, nor do they represent the views or opinions of  Vartha Bharati Group, or any entity of, or affiliated with, Vartha Bharati Group. varthabharati.in reserves the right to take any or all comments down at any time.
 

Refrain from posting comments that are obscene, defamatory or inflammatory, and do not indulge in personal attacks, name calling or inciting hatred against any community. It is obligatory on www.varthabharati.in to provide the IP address and other details of senders of such comments, to the authority concerned upon request. 

Help us delete comments that do not follow these guidelines by informing us (vbwebdesk@gmail.com). Let's work together to keep the conversation civil. 

www.varthabharati.in ನ ಕಮೆಂಟ್ ವಿಭಾಗದಲ್ಲಿ ಪ್ರಕಟವಾಗುವ ಅಭಿಪ್ರಾಯಗಳು ಆ ಕಮೆಂಟ್ ಬರೆದವರ ವೈಯಕ್ತಿಕ ಅಭಿಪ್ರಾಯ ಮಾತ್ರ. ಅವು  www.varthabharati.in ನ ಅಥವಾ ಅದರ ಸಿಬ್ಬಂದಿಯ, ಅಥವಾ 'ವಾರ್ತಾ ಭಾರತಿ' ಬಳಗಕ್ಕೆ ಸೇರಿದ ಯಾರದ್ದೇ ಅಭಿಪ್ರಾಯಗಳಲ್ಲ. ಈ ಕಮೆಂಟ್ ಗಳನ್ನು ಯಾವುದೇ ಸಂದರ್ಭದಲ್ಲಿ ತೆಗೆದುಹಾಕುವ ಹಕ್ಕನ್ನು  ' ವಾರ್ತಾ ಭಾರತಿ' ಕಾದಿರಿಸಿದೆ. 

ಅಶ್ಲೀಲ, ಮಾನಹಾನಿಕರ ಅಥವಾ ಪ್ರಚೋದನಕಾರಿ ಕಮೆಂಟ್ ಗಳನ್ನು ಹಾಗು ಯಾವುದೇ ವ್ಯಕ್ತಿ, ಸಂಸ್ಥೆ , ಸಮುದಾಯಗಳ ವಿರುದ್ಧ ಹಿಂಸೆ ಪ್ರಚೋದಿಸುವಂತಹ ಕಮೆಂಟ್ ಗಳನ್ನು ಹಾಕಬೇಡಿ. ಅಂತಹ ಕಮೆಂಟ್ ಹಾಕಿದವರ ಐಪಿ ಅಡ್ರೆಸ್ ಹಾಗು ಇತರ ವಿವರಗಳನ್ನು ಸಂಬಂಧಪಟ್ಟ ಅಧಿಕಾರಿಗಳು ಕೇಳಿದಾಗ  ನೀಡುವುದು 'ವಾರ್ತಾ ಭಾರತಿ' ಗೆ ಕಡ್ದಾ ಯವಾಗಿರುತ್ತದೆ.  ಆ ರೀತಿಯ ಯಾವುದೇ ಕಮೆಂಟ್ ಗಳು ಕಂಡು ಬಂದಲ್ಲಿ ಕೂಡಲೇ ನಮಗೆ ತಿಳಿಸಿ (vbwebdesk@gmail.com) ಅದನ್ನು ತೆಗೆದು ಹಾಕಲು ನೇರವಾಗಿ. ಆರೋಗ್ಯಕರ ಚರ್ಚೆಗೆ ಸಹಕರಿಸಿ.

ಇಂದು ಹೆಚ್ಚು ಓದಿದ್ದು


Back to Top