ವ್ಯಾಪಾರ ಕೇಂದ್ರಗಳಾಗಿರುವ ಶಿಕ್ಷಣ ಸಂಸ್ಥೆಗಳು : ಡಾ.ಮುಹಮ್ಮದ್ ಸಾದ್ ಬೆಳಗಾಮಿ

ಬೆಂಗಳೂರು : ಶಿಕ್ಷಕರ ಕರ್ತವ್ಯವು ಕೇವಲ ವಿದ್ಯೆಯನ್ನು ಕಲಿಸುವುದು ಅಥವಾ ಉತ್ತೇಜಿಸುವುದು ಮಾತ್ರವಲ್ಲ. ಸದ್ಗುಣಶೀಲ ವ್ಯಕ್ತಿತ್ವಗಳನ್ನು ನಿರ್ಮಿಸಬೇಕು. ದುರದೃಷ್ಟವಶಾತ್, ಇಂದು ಶಿಕ್ಷಣ ಸಂಸ್ಥೆಗಳು ವ್ಯಾಪಾರ ಕೇಂದ್ರಗಳಾಗಿ ಹಣಗಳಿಸುವ ಪೈಪೋಟಿಗೆ ಇಳಿದಿವೆ ಎಂದು ಜಮಾಅತೆ ಇಸ್ಲಾಮಿ ಹಿಂದ್ ರಾಜ್ಯಾಧ್ಯಕ್ಷ ಡಾ.ಮುಹಮ್ಮದ್ ಸಾದ್ ಬೆಳಗಾಮಿ ಬೇಸರ ವ್ಯಕ್ತಪಡಿಸಿದರು.

ನಗರದಲ್ಲಿ ಜಮಾಅತೆ ಇಸ್ಲಾಮಿ ಹಿಂದ್ ಕರ್ನಾಟಕದ ಶಿಕ್ಷಣ ಮತ್ತು ಮಾನವ ಸಂಪನ್ಮೂಲ ಅಭಿವೃದ್ಧಿ ವಿಭಾಗದ ಜಂಟಿ ಆಶ್ರಯದಲ್ಲಿ, ಝೆನಿತ್ ಅಕಾಡಮಿ ಕ್ಯಾಂಪಸ್-2ರಲ್ಲಿ ಮೇ 22 ರಿಂದ 24ರವರೆಗೆ ಆಯೋಜಿಸಲಾಗಿದ್ದ ಮೂರು ದಿನಗಳ ಶಿಕ್ಷಕರ ತರಬೇತಿ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ರಾಜ್ಯಾದ್ಯಂತ ಶಿಕ್ಷಣ ತಜ್ಞರು, ಆಧುನಿಕ ಶಿಕ್ಷಣಶಾಸ್ತ್ರ, ತಂತ್ರಜ್ಞಾನದ ಸಂಯೋಜನೆ ಮತ್ತು ಸಮಗ್ರ ಶಿಕ್ಷಕ ಅಭಿವೃದ್ಧಿಯ ಕುರಿತು ಅಧಿವೇಶನಗಳಿಗಾಗಿ ಈ ಕಾರ್ಯಕ್ರಮದಲ್ಲಿ ಒಟ್ಟುಗೂಡಿದ್ದರು. ಮೊಯಿನಾ ಪರ್ವೀನ್ ಅವರಿಂದ ಪರಿಣಾಮಕಾರಿ ಪಾಠ ಯೋಜನೆ, ಶೋಯೆಬ್ ವಲಾಯಿ ಅವರಿಂದ ಬೋಧನೆಯಲ್ಲಿ ಕೃತಕ ಬುದ್ಧಿಮತ್ತೆಯ ಸಂಯೋಜನೆ, ಮತ್ತು ಡಾ.ಅಮೀರ್ ಹುಸೇನ್ ಅವರಿಂದ ಬೋಧನೆಯಲ್ಲಿ ತಂತ್ರಜ್ಞಾನದ ಬಳಕೆ ಎಂಬ ಪ್ರಮುಖ ವಿಷಯದ ಮೇಲೆ ಅಧಿವೇಶನಗಳು ನಡೆದವು.

ಇತರ ಗಣ್ಯ ಭಾಷಣಕಾರರಲ್ಲಿ ಡಾ.ಸೈಯದ್ ಕಾಝಿಮ್, ಹಾರೂನ್ ಬಾಷಾ, ಜಮಾಅತೆ ಇಸ್ಲಾಮಿ ಹಿಂದ್ ರಾಷ್ಟ್ರೀಯ ಕಾರ್ಯದರ್ಶಿ ಸೈಯದ್ ತನ್ವೀರ್ ಅಹ್ಮದ್, ಸೈಯದ್ ಸದಾತ್ ಪಾಷಾ ಮತ್ತು ಡಾ.ಎಂ.ಎಚ್.ಷರೀಫ್ ಅವರು ತರಗತಿ ನಿರ್ವಹಣೆಯಿಂದ ಹಿಡಿದು ನಂಬಿಕೆ ಆಧಾರಿತ ವ್ಯಕ್ತಿತ್ವ ವಿಕಸನ ಮತ್ತು ಶಿಕ್ಷಕರ ಪ್ರೇರಣೆಯವರೆಗಿನ ವಿಷಯಗಳ ಮೇಲೆ ಸವಿಸ್ತಾರವಾಗಿ ಬೆಳಕು ಚೆಲ್ಲಿದರು.

ಕಾರ್ಯಾಗಾರದ ಸಂದರ್ಭದಲ್ಲಿ ಡಾ.ಮುಹಮ್ಮದ್ ಸಾದ್ ಬೆಳಗಾಮಿ ಅವರು ಇತರ ಗಣ್ಯರೊಂದಿಗೆ, ಡಾ.ಸೈಯದ್ ಕಾಝಿಮ್ ರಚಿಸಿದ ಮತ್ತು ಜಮಾಅತೆ ಇಸ್ಲಾಮಿ ಹಿಂದ್ ಕರ್ನಾಟಕದ ಮಾನವ ಸಂಪನ್ಮೂಲ ಅಭಿವೃದ್ಧಿ ವಿಭಾಗದಿಂದ ಪ್ರಕಟಿಸಲಾದ ‘ಇಸ್ಲಾಮಿಕ್ ಮೂವ್‌ಮೆಂಟ್ ಆ್ಯಂಡ್ ಹ್ಯೂಮನ್ ರಿಸೋರ್ಸ್ ಡೆವಲಪ್‌ಮೆಂಟ್’ ಎಂಬ ಪುಸ್ತಕವನ್ನು ಬಿಡುಗಡೆ ಮಾಡಿದರು. ಈ ಪುಸ್ತಕವನ್ನು ಉರ್ದು ಭಾಷೆಗೆ ಲಈಕುಲ್ಲಾಹ್ ಖಾನ್ ಮನ್ಸೂರಿ ಅನುವಾದಿಸಿದ್ದಾರೆ.

ತರಬೇತಿಯು ರಿಯಾಝ್ ಅಹ್ಮದ್ ಅವರ ಕುರ್‌ಆನ್ ಪಠಣದೊಂದಿಗೆ ಪ್ರಾರಂಭವಾಯಿತು. ಸಮಾರೋಪ ಭಾಷಣವನ್ನು ರಾಜ್ಯ ಕಾರ್ಯದರ್ಶಿ ಮೌಲಾನಾ ಎ.ಜಿ. ಹಾಮೀದ್ ಉಮರಿ ಮಾಡಿದರು, ನಂತರ ಪ್ರಮಾಣಪತ್ರ ವಿತರಣೆ ನಡೆಯಿತು. ಈ ಕಾರ್ಯಕ್ರಮವನ್ನು ಬಿಐಇ, ಆಯಿಟಾ ಮತ್ತು ಫೇಮಿ ಸಹಯೋಗದೊಂದಿಗೆ ಆಯೋಜಿಸಲಾಗಿತ್ತು ಎಂದು ಪ್ರಕಟಣೆ ತಿಳಿಸಿದೆ.