ಮೊಗಳ್ಳಿ ಕೃತಿಗಳಲ್ಲಿ ದೇಶದ ಜಾತೀಯತೆಯ ಕರಾಳತೆ ಅನಾವರಣ: ನಟರಾಜ್ ಹುಳಿಯಾರ್

ಬೆಂಗಳೂರು : ನಿಜಕ್ಕೂ ಈ ದೇಶದ ಜಾತೀಯತೆಯ ಕರಾಳತೆಯನ್ನು ಅರಿಯಲು ಲೇಖಕ ಮೊಗಳ್ಳಿ ಗಣೇಶ್ ಅವರ ಕೃತಿಗಳನ್ನು ಓದಬೇಕು. ಈ ದೇಶ ನಮಗೆ ಅರಿವಿಲ್ಲದೆಯೇ ನಮ್ಮನ್ನು ಹೇಗೆ ನಿಯಂತ್ರಿಸುತ್ತದೆ ಎಂಬುದನ್ನು ಕಾಣಬಹುದು ಎಂದು ಲೇಖಕ, ಸಂಸ್ಕೃತಿ ಚಿಂತಕ ನಟರಾಜ್ ಹುಳಿಯಾರ್ ತಿಳಿಸಿದ್ದಾರೆ.

ಶುಕ್ರವಾರ ಇಲ್ಲಿನ ಜಯನಗರದಲ್ಲಿರುವ ನ್ಯಾಷನಲ್ ಕಾಲೇಜಿನ ಕನ್ನಡ ವಿಭಾಗ ಮತ್ತು ಪೂರ್ಣಚಂದ್ರ ಕನ್ನಡ ಅಧ್ಯಯನ ಕೇಂದ್ರದ ಸಹಯೋಗದಲ್ಲಿ ನಡೆದ ‘ಮೊಗಳ್ಳಿ ಗಣೇಶ್ ಅವರ ಸಾಹಿತ್ಯ’ ರಾಜ್ಯಮಟ್ಟದ ವಿಚಾರ ಸಂಕಿರಣ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಗಣೇಶ್ ಅವರು ನೇರವಾಗಿ, ಪ್ರಾಮಾಣಿಕವಾಗಿ ಬರೆಯುತ್ತಿದ್ದರು. ಅವರ ‘ತೊಟ್ಟಿಲು’ ಕಾದಂಬರಿ ತುಂಬಾ ಅಚ್ಚುಕಟ್ಟಾಗಿ ಮೂಡಿಬಂದಿದೆ. ಜೀತಪದ್ದತಿಗೆ ಸಿಲುಕಿ ನಾಶವಾಗಬೇಕಿದ್ದ ಮೊಗಳ್ಳಿಯನ್ನು ಸ್ವತಂತ್ರವಾಗಿಸಿದ್ದು ಕತೆ. ಯಾವ ಹಿನ್ನೆಲೆಯೂ ಇಲ್ಲದೆ ಮನೆಯಲ್ಲಿ ಅಕ್ಷರಸ್ಥರೇ ಇಲ್ಲದೆ ಊರಿಂದ ತಪ್ಪಿಸಿಕೊಂಡು ಬಂದಂಥ ಮೊಗಳ್ಳಿ ಗಣೇಶ್ ಉತ್ತಮ ಬರಹಗಾರರಾಗಿ ರೂಪಿತವಾದರು ಎಂದು ನಟರಾಜ್ ಹುಳಿಯಾರ್ ಹೇಳಿದರು.

ಮೊಗಳ್ಳಿ ಗಣೇಶ್ 10ನೇ ತರಗತಿ ಮುಗಿಸಿದ ಬಳಿಕ ಅವರ ತಂದೆ ಅವನನ್ನು ಜೀತಕ್ಕೆ ಕಳುಹಿಸಲು ಮುಂದಾಗಿದ್ದನ್ನು ನಿರಾಕರಿಸಿ ಅಲ್ಲಿಂದ ಕಾಲುಕಿತ್ತು ನಗರ ಪ್ರದೇಶಕ್ಕೆ ಬಂದಾಗ…ಈ ನಗರ ಅವನನ್ನು ಹೇಗೆ ರೂಪಿಸಿತು? ಆ ಜೀತವನ್ನು ತಪ್ಪಿಸಿಕೊಳ್ಳುವುದಕ್ಕಾಗಿ ಆಗ ಓಡಿ ಬಂದಿದ್ದರಿಂದಲೇ ಆತ ಸ್ವತಂತ್ರನಾಗಲು ಸಾಧ್ಯವಾಗಿದ್ದು. ಹಾಗಾಗಿ ನಾವು ನಮ್ಮ ಮನಸ್ಸಿನಲ್ಲಿರುವ ಜೀತ ಪದ್ದತಿಯನ್ನು ಮೊದಲು ತೊಲಗಿಸಿದರೆ ಸ್ವತಂತ್ರರಾಗಬಹುದು ಎಂದು ನಟರಾಜ್ ಹುಳಿಯಾರ್ ಹೇಳಿದರು.

ಗಣೇಶ್ ಅವರ ಕಥೆಗಾರಿಕೆಯನ್ನು ರೂಪಿಸಿದ್ದು ಕೇವಲ ಸಾಹಿತ್ಯದ ಓದು ಅಥವಾ ಬರವಣಿಗೆಯ ಅಭ್ಯಾಸವಲ್ಲ. ಅವರು ಬದುಕಿನಲ್ಲಿ ಎದುರಿಸಿದ ಶೋಷಣೆ, ಜಾತಿ ವ್ಯವಸ್ಥೆಯ ಹಿಂಸೆ ಹಾಗೂ ಗ್ರಾಮೀಣ ಸಮಾಜದ ಅಸಮಾನತೆಗಳೇ ಅವರ ಕಥೆಗಳ ಮೂಲದ್ರವ್ಯವಾದವು. ಹಳ್ಳಿಯ ಜನರು, ಮಹಿಳೆಯರು, ದಲಿತರು ಎದುರಿಸುವ ದೌರ್ಜನ್ಯಗಳನ್ನು ಅವರು ಸಾಹಿತ್ಯದ ಮೂಲಕ ದಾಖಲಿಸಿದರು ಎಂದು ಹುಳಿಯಾರ್ ಹೇಳಿದರು.

ಕಾರ್ಯಕ್ರಮದಲ್ಲಿ ಎನ್‍ಇಎಸ್ ಅಧ್ಯಕ್ಷ ಡಾ.ಎಚ್.ಎನ್.ಸುಬ್ರಹ್ಮಣ್ಯ, ಗೌರವ ಕಾರ್ಯದರ್ಶಿ ವಿ. ವೆಂಕಟಶಿವಾ ರೆಡ್ಡಿ, ಪೂರ್ಣಚಂದ್ರ ಕನ್ನಡ ಅಧ್ಯಯನ ಕೇಂದ್ರದ ನಿರ್ದೇಶಕ ಡಾ.ಕೆ.ಸಿ.ಶಿವಾರೆಡ್ಡಿ, ಕಾರ್ಯದರ್ಶಿ ಎಂ.ಸಿ.ನರೇಂದ್ರ, ಶೈಕ್ಷಣಿಕ ಸಂಚಾಲಕ ಕೇಶವ ಮುಳಗಿ ಹಾಗೂ ನ್ಯಾಷನಲ್ ಕಾಲೇಜು ಚೇರ್ಮನ್ ಪಿ.ಎಲ್.ವೆಂಕಟರಾಮ ರೆಡ್ಡಿ, ಕನ್ನಡ ವಿಭಾಗದ ಮುಖ್ಯಸ್ಥ ಡಾ.ಶಿವಣ್ಣ ಸೇರಿದಂತೆ ಇತರರು ಉಪಸ್ಥಿತರಿದ್ದರು.