ನಾಳೆ ಡಾ.ನಟರಾಜ್ ಹುಳಿಯಾರ್ ಸಾಹಿತ್ಯದ ಕುರಿತು ವಿಚಾರ ಸಂಕಿರಣ

ಬೆಂಗಳೂರು : ಪೂರ್ಣಚಂದ್ರ ಕನ್ನಡ ಅಧ್ಯಯನ ಕೇಂದ್ರ ಹಾಗೂ ಸರಕಾರಿ ಕಲಾ ಕಾಲೇಜಿನ ಕನ್ನಡ ಸ್ನಾತಕೋತ್ತರ ಅಧ್ಯಯನ ಮತ್ತು ಸಂಶೋಧನಾ ಕೇಂದ್ರದ ಸಹಯೋಗದೊಂದಿಗೆ ನ.5ರಂದು ಲೇಖಕ ಡಾ.ನಟರಾಜ್ ಹುಳಿಯಾರ್ ಅವರ ಸಮಗ್ರ ಸಾಹಿತ್ಯದ ಕುರಿತು ಒಂದು ದಿನದ ರಾಜ್ಯಮಟ್ಟದ ವಿಚಾರ ಸಂಕಿರಣವನ್ನು ಆಯೋಜಿಸಲಾಗಿದೆ.

ವಿಚಾರ ಸಂಕಿರಣವು ನ.5ರ ಬೆಳಗ್ಗೆ 10ಗಂಟೆಯಿಂದ ಸಂಜೆ 5 ಗಂಟೆಯ ವರೆಗೆ ನಗರದ ಸರಕಾರಿ ಕಲಾ ಕಾಲೇಜು ಆವರಣದಲ್ಲಿ ನಡೆಯಲಿದ್ದು, ವಿಚಾರ ಸಂಕಿರಣವನ್ನು ದಸಂಸ ಪ್ರಧಾನ ಸಂಚಾಲಕ ಮಾವಳ್ಳಿ ಶಂಕರ್ ಉದ್ಘಾಟಿಸಲಿದ್ದು, ಅಧ್ಯಕ್ಷತೆಯನ್ನು ಸರಕಾರಿ ಕಲಾ ಕಾಲೇಜಿನ ಪ್ರಾಂಶುಪಾಲ ಡಾ.ಬಿ.ಸಿ. ನಾಗೇಂದ್ರ ಕುಮಾರ್ ವಹಿಸಿಕೊಳ್ಳಲಿದ್ದಾರೆ.

ಪ್ರಾಧ್ಯಾಪಕ ಡಾ.ತಾಂಡವಗೌಡ ಟಿ.ಎನ್., ಲೇಖಕ ಡಾ.ನಟರಾಜ್ ಹುಳಿಯಾರ್, ಡಾ.ಕಿಶೋರ್ ಚಿಂತಾಮಣಿ, ಪೂರ್ಣಚಂದ್ರ ಕನ್ನಡ ಅಧ್ಯಯನ ಕೇಂದ್ರದ ನಿರ್ದೇಶಕ ಕೆ.ಶಿ.ಶಿವಾರೆಡ್ಡಿ, ಎಂ.ಸಿ.ನರೇಂದ್ರ, ಕನ್ನಡ ಸ್ನಾತಕೋತ್ತರ ಅಧ್ಯಯನ ಮತ್ತು ಸಂಶೋಧನಾ ಕೇಂದ್ರದ ಸಂಯೋಜಕ ಡಾ.ಪಿ.ನಂಜುಂಡ ಮತ್ತಿತರರು ಉಪಸ್ಥಿತರಿರುತ್ತಾರೆ.

ವಿಚಾರ ಗೋಷ್ಠಿಗಳು: ಮೊದಲನೇ ಗೋಷ್ಠಿಯಲ್ಲಿ ಡಾ.ನಟರಾಜ್ ಹುಳಿಯಾರ್ ಅವರ ಸಂಶೋಧನಾ ಬರವಣಿಗೆಯ ಹೊರಳು ನೋಟದ ಕುರಿತು ಕತೆಗಾರ ದಯಾನಂದ, ಎರಡನೇ ಗೋಷ್ಠಿಯಲ್ಲಿ ನಾಟಕಗಳ ಅವಲೋಕನದ ಕುರಿತು ಡಾ. ನಟರಾಜ್ ತಲಘಟ್ಟಪುರ, ಮೂರನೇ ಗೋಷ್ಠಿಯಲ್ಲಿ ಕಥನ ಲೋಕದ ಕುರಿತು ಡಾ.ಸಿರಾಜ್ ಅಹ್ಮದ್, ನಾಲ್ಕನೇ ಗೋಷ್ಠಿಯಲ್ಲಿ ಸಾಂಸ್ಕೃತಿಕ ಬರಹಗಳ ಮರು ಓದು ವಿಷಯದ ಕುರಿತು ಡಾ.ಪಿ.ನಂಜುಂಡ, ಐದನೇ ಗೋಷ್ಠಿಯಲ್ಲಿ ಡಾ.ನಟರಾಜ್ ಹುಳಿಯಾರ್ ಅವರ ಕಾವ್ಯಗಳ ಮರುಪ್ರಯಾಣದ ಕುರಿತು ಡಾ.ಎಲ್.ಜಿ.ಮೀರಾ ಅವರು ಮಾತನಾಡಲಿದ್ದಾರೆ. ಆರನೇ ಗೋಷ್ಠಿಯಲ್ಲಿ ಲೇಖಕರೊಂದಿಗೆ ಸಂವಾದ ನಡೆಯಲಿದೆ. ಸಂಜೆ 4:30ರಿಂದ 5 ಗಂಟೆಯವರೆಗೆ ಸಮಾರೋಪ ಸಮಾರಂಭ ನಡೆಯಲಿದೆ.