ವಾಹನ ದಟ್ಟಣೆ ಪ್ರದೇಶಗಳಲ್ಲಿ ಸಂಚಾರ ನಿಯಂತ್ರಣಕ್ಕೆ 10 ಡ್ರೋನ್ ಬಳಕೆ : ಎಂ.ಎನ್.ಅನುಚೇತ್

ಬೆಂಗಳೂರು : ಹೆಚ್ಚು ವಾಹನ ದಟ್ಟಣೆಯಿರುವ ಪ್ರದೇಶಗಳಲ್ಲಿ ಮಾಹಿತಿ ಪಡೆದು ಸಂಚಾರ ನಿಯಂತ್ರಣ ಮಾಡಲು 10 ಡ್ರೋನ್‍ಗಳನ್ನು ಬಳಸಲಾಗುತ್ತಿದೆ ಎಂದು ಬೆಂಗಳೂರು ನಗರ ಸಂಚಾರ ವಿಭಾಗದ ಜಂಟಿ ಪೊಲೀಸ್ ಆಯುಕ್ತ ಎಂ.ಎನ್.ಅನುಚೇತ್ ತಿಳಿಸಿದ್ದಾರೆ.

ರವಿವಾರ ಈ ಬಗ್ಗೆ ಮಾಧ್ಯಮ ಮಾಹಿತಿ ನೀಡಿರುವ ಅವರು, ಈಗಾಗಲೇ ನಗರದ ಬಹುತೇಕ ರಸ್ತೆಗಳಲ್ಲಿ ಎಐ ತಂತ್ರಜ್ಞಾನ ಆಧರಿತ ಟ್ರಾಫಿಕ್ ಸಿಗ್ನಲ್ ಮತ್ತು ಕ್ಯಾಮೆರಾಗಳನ್ನು ಅಳವಡಿಸಿದ ಬೆನ್ನಲ್ಲೇ 10 ಡ್ರೋನ್‍ಗಳನ್ನು ಪರಿಚಯಿಸಲಾಗಿದೆ. ಹೆಚ್ಚು ವಾಹನ ದಟ್ಟಣೆ ಇರುವ ಸಮಯದಲ್ಲಿ ಈ ಡ್ರೋನ್‍ಗಳನ್ನು ಬಳಕೆ ಮಾಡಲಾಗುತ್ತದೆ ಎಂದಿದ್ದಾರೆ.

ಈ ಡ್ರೋನ್‍ಗಳು ವಿಶ್ಯುಯಲ್ ಏರಿಯಲ್ ನೆಟ್‍ವರ್ಕ್ ಫಾರ್ ನಾಲೆಡೇಬಲ್ ಇನ್‍ಸೈಟ್ಸ್ ತಂತ್ರಜ್ಞಾನವನ್ನು ಒಳಗೊಂಡಿದ್ದು, ಇವುಗಳ ಸಹಾಯದಿಂದ ಯಾವ ಭಾಗದಲ್ಲಿ ಹೆಚ್ಚು ಸಂಚಾರ ದಟ್ಟಣೆಯಾಗಿದೆ ಎಂಬುದನ್ನು ತಿಳಿದುಕೊಳ್ಳಲು ಸಹಾಯವಾಗುತ್ತದೆ. ನಗರದ ಪ್ರಮುಖ ರಸ್ತೆ, ಜಂಕ್ಷನ್‍ಗಳನ್ನು ಸಂಚಾರ ಮೇಲ್ವಿಚಾರಣೆಗಾಗಿ 10 ಡ್ರೋನ್‍ಗಳನ್ನು ಬಳಸಲಾಗುತ್ತದೆ ಎಂದು ಅವರು ತಿಳಿಸಿದ್ದಾರೆ.

2023ರಲ್ಲಿ ಮೊದಲ ಬಾರಿಗೆ ಹೆಬ್ಬಾಳ ಮತ್ತು ಮಾರತ್ತಹಳ್ಳಿ ಭಾಗಗಳಲ್ಲಿ ಪ್ರಾಯೋಗಿಕವಾಗಿ ಡ್ರೋನ್‍ಗಳ ಬಳಕೆ ಮಾಡಲಾಗಿತ್ತು. ಈಗ 10 ಡ್ರೋನ್‍ಗಳನ್ನು ಸಂಚಾರಿ ಪೊಲೀಸ್ ಉಪವಿಭಾಗಗಳಾದ ಉತ್ತರ, ಈಶಾನ್ಯ, ಮಧ್ಯ, ಆಗ್ನೇಯ, ದಕ್ಷಿಣ, ಪೂರ್ವ, ಪಶ್ಚಿಮ, ವೈಟ್‍ಫೀಲ್ಡ್, ಎಚ್‍ಎಸ್‍ಆರ್ ಲೇಔಟ್ ಮತ್ತು ವಿಜಯನಗರಗಳಲ್ಲಿ ವಿತರಿಸಲಾಗಿದೆ ಎಂದು ಎಂ.ಎನ್ ಅನುಚೇತ್ ವಿವರಿಸಿದ್ದಾರೆ.

ಪ್ರತಿಯೊಂದು ಡ್ರೋನ್ ಅದರ ನಿಯೋಜಿತ ಪ್ರದೇಶದೊಳಗೆ ಹಲವಾರು ಜಂಕ್ಷನ್‍ಗಳು ಮತ್ತು ಪ್ರಮುಖ ರಸ್ತೆಗಳನ್ನು ಒಳಗೊಂಡಿದೆ. ವಾಹನ ದಟ್ಟನೆಯ ನೈಜ ಸಮಯವನ್ನು ತಿಳಿದುಕೊಳ್ಳಲು ಈ ಡ್ರೋನ್ ಸಹಾಯಕವಾಗುತ್ತವೆ ಎಂದು ಎಂ.ಎನ್ ಅನುಚೇತ್ ತಿಳಿಸಿದ್ದಾರೆ.

ಡ್ರೋನ್‍ಗಳು ಗರಿಷ್ಠ 120 ಮೀಟರ್ ಎತ್ತರದಲ್ಲಿ 1.5 ಕಿ.ಮೀ. ದೂರದವರೆಗೆ ಹಾರುವ ಸಾಮಥ್ರ್ಯವನ್ನು ಹೊಂದಿವೆ. ಇವುಗಳ ವೈಮಾನಿಕ ಶ್ರೇಣಿಯು ದೂರದಿಂದ ಸಂಚಾರ ದಟ್ಟಣೆಯ ವ್ಯಾಪ್ತಿಯ ಮಾಹಿತಿ ನೀಡುತ್ತವೆ. ಮಳೆಯ ಸಮಯದಲ್ಲಿ ಡ್ರೋನ್‍ಗಳನ್ನು ಹಾರಿಸಲು ಸಾಧ್ಯವಿಲ್ಲ. ಈ ಡ್ರೋನ್‍ಗಳು ವಾಟರ್ ಪ್ರೂಫ್ ವ್ಯವಸ್ಥೆಯನ್ನು ಒಳಗೊಂಡಿಲ್ಲ ಎಂದು ಎಂ.ಎನ್.ಅನುಚೇತ್ ಮಾಹಿತಿ ನೀಡಿದ್ದಾರೆ.