ನೋಂದಣಿ-ಮುಂದ್ರಾಂಕ ಇಲಾಖೆಯ 33 ಮಂದಿ ಅಧಿಕಾರಿ, ಸಿಬ್ಬಂದಿ ವರ್ಗಾವಣೆ

ಬೆಂಗಳೂರು : ನೋಂದಣಿ ಮತ್ತು ಮುದ್ರಾಂಕ ಇಲಾಖೆಯಲ್ಲಿ ಜಿಲ್ಲಾ ನೋಂದಣಾಧಿಕಾರಿ, ಹಿರಿಯ ಉಪನೋಂದಣಾಧಿಕಾರಿ/ಅಧೀಕ್ಷಕ/ಉಪನೋಂದಣಾಧಿಕಾರಿ/ಪ್ರಥಮ ಮತ್ತು ದ್ವೀತಿಯ ದರ್ಜೆ ಸಹಾಯಕರು ಸೇರಿದಂತೆ ಒಟ್ಟು 33 ಮಂದಿ ಅಧಿಕಾರಿ, ಸಿಬ್ಬಂದಿಯನ್ನು ವರ್ಗಾವಣೆ ಮಾಡಿ ಕಂದಾಯ ಇಲಾಖೆ ಅಧೀನ ಕಾರ್ಯದರ್ಶಿ ಸುನೀತಾ ಎಸ್. ಅವರು ಆದೇಶ ಹೊರಡಿಸಿದ್ದಾರೆ.
ಬೆಂಗಳೂರು, ತುಮಕೂರು, ಹಾಸನ, ಶಿವಮೊಗ್ಗ, ಧಾರವಾಡ, ಕೊಪ್ಪಳ, ರಾಯಚೂರು, ಯಾದಗಿರಿ, ಮಂಡ್ಯ ಮತ್ತು ಇತರ ಜಿಲ್ಲೆಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಹಲವು ಅಧಿಕಾರಿಗಳನ್ನು ಅವರ ಹೆಸರಿನ ಮುಂದಿನ ಸ್ಥಳಕ್ಕೆ ತಕ್ಷಣದಿಂದಲೇ ನಿಯೋಜನೆ ಮಾಡಿ ವರ್ಗಾವಣೆ ಮಾಡಲಾಗಿದೆ.
ಕೊಪ್ಪಳದಲ್ಲಿ ಜಿಲ್ಲಾ ನೋಂದಣಾಧಿಕಾರಿಯಾಗಿದ್ದ ಅನುರಾಧಾ ಎಂ. ಕಿನ್ನಾಳ್ ಅವರನ್ನು ಯಾದಗಿರಿ ಜಿಲ್ಲೆಗೆ, ರಾಯಚೂರಿನ ಜಿಲ್ಲಾ ನೋಂದಣಾಧಿಕಾರಿ ಪ್ರತಿಭಾ ಬಿಡಿಕರ್ ಅವರನ್ನು ಕೊಪ್ಪಳಕ್ಕೆ ವರ್ಗಾಯಿಸಲಾಗಿದೆ.
ಕುಣಿಗಲ್ನಲ್ಲಿ ಹಿರಿಯ ಉಪ-ನೋಂದಣಾಧಿಕಾರಿಯಾಗಿದ್ದ ಮಂಜುನಾಥ್ರನ್ನು ಬೆಂಗಳೂರಿನ ಬಸವನಗುಡಿ, ಬೇಗೂರಿನಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಸಂತೋಷ್ ಕುಮಾರ್ ಕಟ್ಟಿಮನಿ ಅವರನ್ನು ದೊಡ್ಡಬಳ್ಳಾಪುರ, ಬೆಂಗಳೂರಿನಲ್ಲಿರುವ ಇಲಾಖೆಯ ಪ್ರಧಾನ ಕಚೇರಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಸ್ವರ್ಣಲತಾ ಎಸ್.ಎಸ್. ಅವರನ್ನು ಕೆಂಗೇರಿಯ ಉಪ-ನೋಂದಣಾಧಿಕಾರಿಯಾಗಿ ನೇಮಿಸಲಾಗಿದೆ.
ಶೃಂಗೇರಿಯ ಹಿರಿಯ ಉಪ-ನೋಂದಣಾಧಿಕಾರಿ ರಾಮದಾಸೇಗೌಡರನ್ನು ನೆಲಮಂಗಲಕ್ಕೆ ವರ್ಗಾಯಿಸಲಾಗಿದ್ದು, ಗುಡಿಬಂಡೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಶಂಕರಮೂರ್ತಿ ಅವರನ್ನು ಗೌರಿಬಿದನೂರಿಗೆ ನಿಯೋಜಿಸಲಾಗಿದೆ.
ಬಸವನಗುಡಿ ಜಿಲ್ಲಾ ನೋಂದಣಾಧಿಕಾರಿ ಕಚೇರಿಯಿಂದ ರವಿಕುಮಾರ್ ಕೆ.ವಿ.ಅವರನ್ನು ಮಲ್ಲೇಶ್ವರಕ್ಕೆ, ಆಲೂರುನಿಂದ ಚಂದ್ರಕಾಂತಿ ಅವರನ್ನು ತುಮಕೂರಿಗೆ ಮತ್ತು ಮಧುಗಿರಿಯಿಂದ ಸತೀಶ್ ಎಸ್. ಅವರನ್ನು ಪೀಣ್ಯಕ್ಕೆ, ಅನಿಲ್ ಜಮಖಂಡಿ ಅವರನ್ನು ಬಾಗಲಕೋಟೆಯಿಂದ ಧಾರವಾಡಕ್ಕೆ, ಧನಲಕ್ಷ್ಮಿ ಅವರನ್ನು ಮಂಡ್ಯದಿಂದ ಕೊರಟಗೆರೆಗೆ ವರ್ಗಾವಣೆ ಮಾಡಲಾಗಿದೆ. ಇದೇ ವೇಳೆ ಏಳು ಮಂದಿ ಪ್ರಥಮ ದರ್ಜೆ ಸಹಾಯಕರು ಮತ್ತು ಇಬ್ಬರು ದ್ವಿತೀಯ ದರ್ಜೆ ಸಹಾಯಕರನ್ನು ವಿವಿಧ ಸ್ಥಳಗಳಿಗೆ ವರ್ಗಾವಣೆ ಮಾಡಲಾಗಿದೆ.






