ಬೆಂಗಳೂರು ಉತ್ತರ ಲೋಕಸಭಾ ಕ್ಷೇತ್ರ | ಕಾಂಗ್ರೆಸ್ ಅಭ್ಯರ್ಥಿ ರಾಜೀವ್ ಗೌಡ ಆಸ್ತಿ ಮೌಲ್ಯ 34.58 ಕೋಟಿ ರೂ.

ಬೆಂಗಳೂರು: ಬೆಂಗಳೂರು ಉತ್ತರ ಲೋಕಸಭಾ ಕ್ಷೇತ್ರದಿಂದ ಕಾಂಗ್ರೆಸ್ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಸಿರುವ ಪ್ರೊ.ಎಂ.ವಿ.ರಾಜೀವ್ ಗೌಡ ರಾಜೀವ್ ಗೌಡ 7.84 ಕೋಟಿ ರೂ.ಮೌಲ್ಯದ ಚರಾಸ್ತಿ ಹಾಗೂ 26.74 ಕೋಟಿ ರೂ.ಮೌಲ್ಯದ ಸ್ಥಿರಾಸ್ತಿ ಹೊಂದಿದ್ದಾರೆ.

2022-23ನೆ ಸಾಲಿನಲ್ಲಿ ರಾಜೀವ್ ಗೌಡ ಅವರ ಆದಾಯ 1.09 ಕೋಟಿ ರೂ.ಗಳಾದರೆ, ಅವರ ಪತ್ನಿ ಶರ್ಮಿಳಾ ಭಕ್ತರಾಮ್ ಅವರ ಆದಾಯ 14.57 ಲಕ್ಷ ರೂ.ಗಳು ಎಂದು ಚುನಾವಣಾ ಆಯೋಗಕ್ಕೆ ಸಲ್ಲಿಸಿರುವ ಪ್ರಮಾಣದಲ್ಲಿ ಉಲ್ಲೇಖಿಸಲಾಗಿದೆ. ರಾಜೀವ್ ಗೌಡ ವಿರುದ್ಧ ಯಾವುದೆ ಎಫ್‍ಐಆರ್ ಅಥವಾ ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿಲ್ಲ.

ರಾಜೀವ್ ಗೌಡ ಬಳಿ 4 ಲಕ್ಷ ರೂ.ನಗದು ಹಾಗೂ ಅವರ ಪತ್ನಿ ಬಳಿ 2.50 ಲಕ್ಷ ರೂ.ನಗದು ಇದೆ. ರಾಜೀವ್ ಗೌಡ 32 ಲಕ್ಷ ರೂ.ಮೌಲ್ಯದ ಇನ್ನೋವಾ ಹೈಕ್ರಾಸ್ ವಾಹನ ಹೊಂದಿದ್ದರೆ, ಅವರ ಪತ್ನಿ 1.65 ಲಕ್ಷ ರೂ.ಮೌಲ್ಯದ ಹುಂಡೈ ಐ10 ಕಾರು ಹೊಂದಿದ್ದಾರೆ.

ಪತ್ನಿಯೇ ಶ್ರೀಮಂತೆ: ರಾಜೀವ್ ಗೌಡ ಬಳಿ ಯಾವುದೆ ಚಿನ್ನಾಭರಣಗಳು ಇಲ್ಲ. ಅವರ ಪತ್ನಿ ಶರ್ಮಿಳಾ ಭಕ್ತರಾಮ್ ಬಳಿ 25 ಲಕ್ಷ ರೂ.ಮೌಲ್ಯದ ವಜ್ರ, 12.67 ಲಕ್ಷ ರೂ.ಮೌಲ್ಯದ 200 ಗ್ರಾಂ ಚಿನ್ನಾಭರಣ, 6.85 ಕೋಟಿ ರೂ.ಮೌಲ್ಯದ ಚರಾಸ್ತಿ ಹಾಗೂ 92.57 ಕೋಟಿ ರೂ.ಮೌಲ್ಯದ ಸ್ಥಿರಾಸ್ತಿಯಿದೆ. ಅಲ್ಲದೆ, 1.49 ಲಕ್ಷ ರೂ.ಸಾಲ ಇದೆ.