‘ಬಸವ ಮಂಟಪ’ ಪುಸ್ತಕ ವಿವಾದ : ಬಂಧನ ಭೀತಿ ಬೆನ್ನಲ್ಲೇ ಅಮೆರಿಕಕ್ಕೆ ಹಾರಿದ ರವಿ ಹಂಜ್ !

ಬೆಂಗಳೂರು : ಲಿಂಗಾಯತ ಧರ್ಮ ಹಾಗೂ ಜಗಜ್ಯೋತಿ ಬಸವಣ್ಣನವರ ಕುರಿತು ಇತ್ತೀಚಿಗೆ ಬಿಡುಗಡೆಗೊಂಡ ವೀರಶೈವ-ಲಿಂಗಾಯತ ಸತ್ಯದರ್ಶನ ಹೆಸರಿನಲ್ಲಿರುವ ‘ಬಸವ ಮಂಟಪ’ ಪುಸ್ತಕ ತೀವ್ರ ವಿವಾದದ ಸ್ವರೂಪ ಪಡೆದುಕೊಂಡಿರುವುದು ಮಾತ್ರವಲ್ಲದೆ, ಬಂಧನಕ್ಕೆ ಆಗ್ರಹಗಳು ಕೇಳಿಬರುತ್ತಿರುವ ಬೆನ್ನಲ್ಲೇ ಕೃತಿಕಾರ ರವಿ ಹಂಜ್ ಅಮೆರಿಕಕ್ಕೆ ತೆರಳಿದ್ದಾರೆ ಎಂದು ಗೊತ್ತಾಗಿದೆ.
ಬಸವಣ್ಣನವರ ಕುರಿತು ಪುಸ್ತಕ ಪ್ರಕಟಿಸಿ ಅವಹೇಳನ ಮಾಡಿರುವ ಹಿನ್ನೆಲೆ ಪುಸ್ತಕ ಪ್ರಸಾರ ಮತ್ತು ಆ ಕುರಿತು ವಿಡಿಯೊ ಹೇಳಿಕೆಗಳ ಬಗ್ಗೆ ಲಿಂಗಾಯತ ಸಮುದಾಯ ತೀವ್ರ ಆಕ್ರೋಶ ವ್ಯಕ್ತಪಡಿಸಿದೆ. ಈ ಸಂಬಂಧ ಬೆಂಗಳೂರಿನ ಹೈಗ್ರೌಂಡ್ಸ್ ಪೊಲೀಸ್ ಠಾಣೆ ಸೇರಿದಂತೆ ವಿವಿಧ ಜಿಲ್ಲೆಗಳ ಪೊಲೀಸ್ ಠಾಣೆಗಳಲ್ಲಿ ದೂರು ಸಲ್ಲಿಸಿರುವ ಲಿಂಗಾಯತ ಸಮುದಾಯದ ನಾಯಕರು, ಕೃತಿಕಾರ ರವಿ ಹಂಜ್ನನ್ನು ಬಂಧಿಸುವಂತೆ ಪಟ್ಟು ಹಿಡಿದಿದ್ದಾರೆ. ಇದರ ನಡುವೆ ನಿನ್ನೆಯೇ ರವಿ ಹಂಜ್ ಅಮೆರಿಕಕ್ಕೆ ತೆರಳಿದ್ದಾರೆ ಎಂದು ತಿಳಿದುಬಂದಿದೆ.
ಇನ್ನೂ, ಬಸವ ಮಂಟಪ ಕೃತಿ ನಿಷೇಧ ಹಾಗೂ ಬಂಧನ ಕುರಿತ ಲಿಂಗಾಯತ ಸಮುದಾಯ ನಾಯಕರ ಬೇಡಿಕೆಗಳ ಬಗ್ಗೆ ತಮ್ಮ ಫೇಸ್ಬುಕ್ ಖಾತೆಯಲ್ಲಿ ವ್ಯಂಗ್ಯವಾಡಿರುವ ಕೃತಿಕಾರ ರವಿ ಹಂಜ್, ಈಗಷ್ಟೇ ಅಮೆರಿಕಕ್ಕೆ ವಾಪಸ್ಸಾದೆ. ಮೊದಲೇ ತಿಳಿದಿದ್ದರೆ ಅಲ್ಲಿಯೇ ಇರುತ್ತಿದ್ದೆ ಎಂದು ಹೇಳಿದ್ದಾರೆ.
ಏನಿದು ವಿವಾದ? :
ನ.15 ರಂದು ಬೆಂಗಳೂರಿನ ಎಫ್ಕೆಸಿಸಿಐ ಸಭಾಂಗಣದಲ್ಲಿ ಕೃತಿಕಾರ ರವಿ ಹಂಜ್ ಅವರ ಬಸವ ಮಂಟಪ - ವೀರಶೈವ ಲಿಂಗಾಯತ ಸತ್ಯದರ್ಶನ (ಸುಮಾರು 600 ಪುಟ) ಪುಸ್ತಕ ಬಿಡುಗಡೆಯಾಯಿತು. ಇದರಲ್ಲಿ ವೀರಶೈವ ಮತ್ತು ಲಿಂಗಾಯತ ಒಂದೇ, ಬೇರೆ ಬೇರೆಯಲ್ಲ ತಾನು ಬರೆದ ಪ್ರತಿ ವಾಕ್ಯಕ್ಕೂ ದಾಖಲೆ, ಪುರಾವೆ ಇದೆ ಎನ್ನುವುದು ಲೇಖಕರ ವಾದ. ಜತೆಗೆ, ಬಸವಣ್ಣ ಸನಾತನ ಧರ್ಮ ವಿರೋಧಿ ಅಲ್ಲ ಎಂದು ಸಂದರ್ಶನದಲ್ಲಿ ಹೇಳಿರುವುದು ವಿವಾದಕ್ಕೆ ಎಡೆಮಾಡಿಕೊಟ್ಟಿದೆ.
ಇತ್ತ ಬಸವಣ್ಣನವರ ಬಗ್ಗೆ ಕಳಬೇಡ, ಕೊಲಬೇಡ ವಚನವನ್ನು ತಪ್ಪಾಗಿ ಅರ್ಥೈಸಿ, ಬಿಜ್ಜಳನ ಖಜಾನೆ ದುರುಪಯೋಗ ಮತ್ತು ಬಿಜ್ಜಳನ ಹತ್ಯೆಯಲ್ಲಿ ಪಾತ್ರ ಇತ್ತು ಎಂದು ಬಿಂಬಿಸಿದ್ದಾರೆ ಎಂದು ಬಸವ ತತ್ವವಾದಿಗಳು ಆರೋಪಿಸಿದ್ದಾರೆ. ಅದೇ ರೀತಿ, ಬೀದರ್, ಬೆಂಗಳೂರು, ಆಳಂದ, ಮೈಸೂರು ಸೇರಿದಂತೆ ವಿವಿಧ ಕಡೆಗಳಲ್ಲಿ ಪುಸ್ತಕ ನಿಷೇಧಕ್ಕೆ ಮತ್ತು ಬಂಧನಕ್ಕೆ ಒತ್ತಾಯಿಸಿ ಪ್ರತಿಭಟನೆ, ಪ್ರತಿಕೃತಿ ದಹನ ನಡೆದಿದೆ.
ಗುರುವಾರ ಬೆಂಗಳೂರಿನಲ್ಲಿಯೂ ಸಚಿವರಾದ ಎಂ.ಬಿ.ಪಾಟೀಲ್, ಶರಣಪ್ರಕಾಶ ಪಾಟೀಲ್ ಅವರು ಪತ್ರಿಕಾಗೋಷ್ಠಿ ನಡೆಸಿ ರಾಜ್ಯ ಸರಕಾರ ತುರ್ತು ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರಿಗೆ ಮನವಿ ಮಾಡಿದ್ದಾರೆ.






